ប្រភពផ្លូវការបានអះអាងថាតារាសម្ដែងអ្នកនាង ម៉ីន ហ្សិនយ៉ា ដែលប្រើឈ្មោះក្នុងហ្វេសប៊ុកថា Nin Meya បានរងអំពើហិង្សាយ៉ាងធ្ងន់ធ្ងរពីស្វាមីរបស់ខ្លួន ដែលជាមន្ត្រីក្រសួងផែនការ។ ប្រភពចុងក្រោយបញ្ជាក់ថា អ្នកនាងត្រូវបានមន្ត្រីក្រសួងដដែលនេះ វាយដំរហូតដល់របួសជាទម្ងន់ថ្មីទៀតកាលពីព្រឹកថ្ងៃទី៣០ មេសា ដោយក្រៅពីការវាយដំជាទម្លាប់ លោកក៏ជាស្វាមីក្ដាប់លុយម្នាក់ឯង និងមានទម្លាប់បំបិទសិទ្ធិគ្រប់ផ្នែកផងដែរ ទើបគេឃើញតារាស្រីរូបនេះត្រលប់មករកការសម្ដែងជាថ្មីដើម្បីរកលុយក្នុងសិល្ប:។

ប្រភពពីអ្នកចេញចូលហាងបុកគ្រឹះសំណង់របស់អ្នកនាង ម៉ី ហ្សិនយ៉ា ស្ថិតនៅម្ដុំជម្ពូរវ័ន្តបានទម្លាយចេញកាលពីព្រឹកថ្ងៃទី៣០ មេសាថា អ្នកនាង និងស្វាមីបានផ្ទុះជម្លោះគ្នាជាថ្មីទៀតហើយ ដោយក្នុងជម្លោះចុងក្រោយ គឺលោក ស៊ុង និត ដែលត្រូវគេស្គាល់ថាមន្ត្រីក្នុងក្រសួងផែនការវ័យ៤៨ឆ្នាំ វាយដំបណ្ដាលឲ្យកម្រើកខ្លួនលែងចង់រួច ដែលត្រូវគេប៉ាន់ស្មានថាអាចនឹងបាក់ឆ្អឹងខាងក្នុង។ ប្រភពនោះបញ្ជាក់ថាលោក ស៊ុង តិច បានបែកគំនិតកាន់លុយ និងប្រើអំពើហិង្សាចំពោះភរិយាឡើងក្លាយជាទម្លាប់ទៅហើយ ប៉ុន្តែអ្វីដែលគេងឿងឆ្ងល់គឺតារាសម្ដែងនាង ម៉ី ហ្សិនយ៉ា មិនធ្លាប់ទម្លាយរឿងរ៉ាវអាស្រូវនោះទាល់តែសោះ។ អ្នកនាងត្រូវបានគេអះអាងថា ត្រូវមន្ត្រីក្រសួងផែនការជាស្វាមីវាយធ្វើបាប រហូតសម្លាប់ខ្លួនដោយលេបថ្នាំ២ដងមកហើយ ដោយស្ថានភាពជម្លោះកាន់តែអាក្រក់ខ្លាំងឡើង ក្រោយពីលោកស៊ុង តិច កាន់លុយ ហើយមានស្រីបណ្ដាក់គ្នា ដែលមានជម្លោះតែបន្តិចក៏វាយដំតែម្ដង។ ប្រភពនោះបញ្ជាក់ថាជម្លោះបណ្ដាលឲ្យវាយដំអ្នកនាងម៉ី ហ្សិនយ៉ា ធ្ងន់ធ្ងរដល់ឆ្អឹងខាងក្នុងចុងក្រោយ កើតឡើងដោយសារតែលោក ស៊ុង តិច ជាស្វាមីដាច់យប់កាលពីយប់ថ្ងៃទី២៩ មេសា ហើយបានបន្តយកឡានរបស់ភរិយាទៅជិះទៀត ដោយអ្នកនាងម៉ី ហ្សិនយ៉ា ទទូចឲ្យស្បថបើលោកមិនបានយកឡាននោះទៅដឹកស្រី។

អ្នកនាងម៉ី ហ្សិនយ៉ា ពានសារភាពថាអ្នកនាងពិតជាមានជម្លោះរាប់ភ្លេចជាមួយស្វាមីដែលជាមន្ត្រីក្រសួងផែនការឈ្មោះ ស៊ុង តិចប្រាកដមែន។ ប៉ុន្តែអ្នកនាងថាមិនចង់និយាយនោះទេ ដោយសារតែអ្នកនាងខ្មាស់គេ និងមិនចង់ឲ្យកូន៣នាក់ក្លាយជាកូនកំព្រា។ អ្នកនាងបង្ហើបថាសម្ពាធរឿងលោកកាន់លុយ និងប្រើហិង្សាកន្លងមកអ្នកនាងសុខចិត្តស៊ូទ្រាំដើម្បីកុំឲ្យបែកគ្នា ប៉ុន្តែអ្វីដែលអ្នកនាងទ្រាំមិនបានចុងក្រោយ គឺប្ដីមានស្រី ហើយឲ្យតែអ្នកនាងសួរនាំក៏កើតជាជម្លោះវាយដំ។ អ្នកនាងថាធ្លាប់ប្ដឹងប៉ូលិសសង្កាត់សំរោងក្រោម និងខ័ណ្ឌពោធិសែនជ័យពីរឿងរងហិង្សារច្រើនលើកហើយ ប៉ុន្តែប៉ូលិសទាំងនោះមិនដែលអើពើនោះទេ ដោយសារតែពួកលោកភាគច្រើន សុទ្ធតែជាអ្នកផឹកស៊ីជាមួយលោក ស៊ុង តិច ជាស្វាមី។

ចំពោះករណី ទម្លាយនេះ នៅមិនទាន់ទទួលបានការបកស្រាយពី លោក ស៊ុង តិចនៅឡើយទេ៕