ក្នុងគម្រោងវិនិយោគលើក្បាច់គុនល្បុកតោ អតីតតារាសម្ដែងអ្នកនាងពេជ្រ ខេនឌី គ្រោងចំណាយត្រឹមតែ១៤ម៉ឺនដុល្លារប៉ុណ្ណោះឲ្យបានរួចរាល់។ ប៉ុន្តែមកទល់នឹងជិតរួចរាល់គម្រោងនេះ អ្នកនាងបានអះអាងថាដើមទុនបានឈានដល់ជាង៣០ម៉ឺនដុល្លារហើយ ខណ:ដែលថ្ងៃសម្ពោធគម្រោងក៏នឹងចំណាយរហូតដល់ម៉ឺនដុល្លារបន្ថែមទៀត។

អ្នកនាងពេជ្រ ខេនឌី និយាយថាដោយសារតែផ្នែកល្បុកតោនៅមិនទាន់មានអ្នកណាបោះទុនវិនិយោគនៅឡើយ ទើបអ្នកនាងសម្រេចចំណាយទុនបើកភោជនីយដ្ឋានធំមួយនៅខេត្តសៀមរាបឈ្មោះថា«ល្បុកតោក្លិប» ដោយក្នុងហាងនេះ នឹងក្លាយជាទីលានហ្វឹកហាត់ និងសម្ដែងក្បាច់គុនល្បុកតោជារៀងរាល់ថ្ងៃដល់ភ្ញៀវទេសចរណ៍។ អ្នកនាងថាកាលពីមុនដើម្បីបានទស្សនាការសម្ដែងក្បាច់គុនបុរាណមួយនេះ គឺលុះទ្រាក្នុងពិធីអង្គរសង្ក្រាន្ត ឬក្នុងពិធីបុណ្យជាតិធំៗ ប៉ុន្តែក្រោយការប្រកាសដំណើរការនូវភោជនីយដ្ឋានរបស់នាង គឺអ្នកណាក៏អាចទស្សនាបានដែរ ដោយនាងបានរៀបចំឲ្យកីឡាករកីឡាការិនីល្បុកតោជំនាញៗ បង្ហាញក្បាច់បាត និងក្បាច់គុនសំខាន់ៗជារៀងរាល់យប់នោះផង ដើម្បីកំដរភ្ញៀវ និង ក្នុងបំណងផ្សព្វផ្សាយល្បុកតោឲ្យកាន់តែទូលំទូលាយផង។ អ្នកនាងភោជនីយដ្ឋាន«ល្បុកតោក្លិប»គឺជាវិនិយោគធំមួយរបស់អ្នកនាង និងស្វាមី ដើម្បីឲ្យក្បាច់គុនល្បុកតោកាន់តែមានការទទួលស្គាល់ និងដើម្បីឲ្យកីឡាករកីឡាការិនីក្នុងវិស័យនេះមានចំណូលទៀងទាត់។ អ្នកនាងនិយាយថាការចំណាយមកទល់នឹងហាងបានជិតរួចរាល់នាពេលនេះ គឺអស់៣០ម៉ឺនដុល្លារហើយ ក្នុងពេលដែលការថែមថយគឺមិនទាន់កំណត់ ហើយការសម្ពោធនៅចុងខែ៥ទៀតសោត ក៏ពិតជាត្រូវចំណាយមិនទាបម៉ឺនដុល្លារ ដោយសារតែនាងអញ្ជើញសុទ្ធតែមន្ត្រីជាន់ខ្ពស់មកពីក្រសួងទេសចរណ៍ និងមន្ត្រីសហព័ន្ធល្បុកតោឲ្យចូលរួម។ ការចំណាយដ៏ច្រើននេះ គឺដោយសារតែត្រូវធ្វើឆាកសម្ដែងធំទូលាយ និងត្រូវធ្វើក្លិបមួយនៅក្នុងហាង ដើម្បីទទួលភ្ញៀវទេសចរណ៍ជាតិ និងអន្តរជាតិ ក៏ដូចជាអ្នកចង់ហ្វឹកហាត់ឲ្យមានកន្លែងហាត់រៀនជំនាញ។ អ្នកនាងថាខ្លួនជាចៅរបស់លោកតាសាន គឹមស៊ាន អ្នកចងក្រងក្បាច់គុនល្បុកតោ ទើបក្រោយពេលមានបានក៏បោះទុនវិនិយោគលើគម្រោងលើកស្ទួយកីឡានេះ ដើម្បីឲ្យអ្នកជំនាញល្បុកតោមានចំណូលទៀងទាត់តាមរយ:ការសម្ដែងប្រចាំក្នុងហាងរបស់នាង និងដើម្បីឲ្យភ្ញៀវចេញចូលខេត្តសៀមរាបបានទស្សនាជាប្រចាំនូវការសម្ដែងល្បុកតោជារៀងរាល់ថ្ងៃ។ យ៉ាងណាមិញ អ្នកនាងថាការសម្ដែងគឺមានលក្ខណ:ខុសៗគ្នា ដោយរៀងរាល់ថ្ងៃយប់ថ្ងៃសៅរ៍ ថ្ងៃអាទិត្យ និងថ្ងៃបុណ្យជាតិ នឹងមានការសម្ដែងជាទ្រង់ទ្រាយធំពីល្បាច់គុនល្បុកតោ។ បើទោះជាអស់លើគម្រោងដល់ជាង៣០ម៉ឺនដុល្លារ តែអ្នកនាងប្រាប់ថាសប្បាយចិត្ត ជាពិសេសនៅពេលដែលភោជនីយដ្ឋាន«ល្បុកតោក្លិប»ជិតសម្ពោធដំណើរការនៅចុងខែ៥៕