មុននេះបន្តិចមានការទម្លាយយ៉ាងគគ្រឹកគគ្រេងនៅលើបណ្ដាញព័ត៌មានជុំវិញរឿងរ៉ាវក្មេងស្រីម្នាក់ត្រូវឪពុកចុងជាអតីតព្រះសង្ឃប្រើអំពើហិង្សា ហើយត្រូវបានឪពុកដើមប្ដឹងយកសិទ្ធិមកគ្រប់គ្រងវិញ ហើយក៏ត្រូវស្រ្តីជាម្ដាយ និងឪពុកចុងនោះប្ដឹងពីបទជំរិត និងបង្ខាំងក្មេង។ មានការទម្លាយថាក្មេងស្រីនោះជាក្មួយស្រីបង្កើតរបស់តារាចម្រៀងលោក ជុំ លីណូ ដោយលោកបញ្ជាក់ថាក្រោយការប្ដឹងផ្ដល់ឪពុកដើមដែលត្រូវជាពូបង្កើតរបស់លោក ទទួលបានយុត្តិធម៌រឿងអាចយកកូនមកគ្រប់គ្រងវិញ តែបណ្ដឹងទាមទារឲ្យឪពុកចុងទទួលខុសត្រូវលើករណីហិង្សាបណ្ដាលឲ្យមានស្នាកស្នាមលើក្មួយស្រីរបស់លោក នៅមិនទាន់ដោះស្រាយនោះទេ ទើបលោកទទូចឲ្យឈប់បន្តការពន្យារពេល ដោយសារតែរឿងក្ដីនោះអូសបន្លាយយូរមកហើយ។

លោកវេជ្ជបណ្ឌិត្យ មាស ឡេង ជាពូបង្កើតរបស់លោកជុំ លីណូ បានអះអាងថាក្នុងឆ្នាំ២០១៤ភរិយារបស់លោក គឺអ្នកស្រីពេជ្រ ចិន្តា បានប្រើលេសសុំលែងលះជាមួយលោក ដោយអះអាងថាចង់រៀបការជាមួយបុរសជាអាណិកជននៅអូស្រ្តាលី ដើម្បីធានាយកកូនទាំង៣ទៅរស់នៅទីនោះ។ ដោយមើលឃើញពីហេតុផលរបស់ភរិយាសមស្រប លោកក៏យល់ព្រមលែង និងប្រគល់សិទ្ធិឲ្យគ្រប់គ្រងកូនទាំង៣ ដោយគ្មានចម្រូងចម្រាស់។ ប៉ុន្តែក្រោយពេលលែងលះអតីតភរិយា មិនត្រឹមតែគ្មានគម្រោងចេញទៅអូស្រ្តាលីប៉ុណ្ណោះទេ គឺបែរជាទៅមានទំនាក់ទំនងជាមួយព្រះសង្ឃមួយអង្គដែលជាប្រធានអង្គការផង ហើយក៍រៀមការជាមួយគ្នាផ្ទុយពីអ្វីដែលបានព្រមព្រៀង។ លោកថារឿងនោះគ្រាន់តែធ្វើឲ្យលោកឈឺចិត្តមួយផ្នែកប៉ុណ្ណោះ តែអ្វីលោកទទួលយកមិនបានគឺ ឳពុកចុងកូនលោកបានប្រើអំពើហិង្សាលើកូនស្រីលោក២នាក់ ដោយកូនស្រីទី២ឈ្មោះទូច សុម៉ានិតា អាយុ១១ឆ្នាំនាពេលនោះទទួកហិង្សាឡើងចង់បាក់ស្បាត។ ដោយសារតែបានដឹងពីរឿងនោះហើយ ទើបលោកសម្រេចចិត្តប្ដឹងសុំសិទ្ធិគ្រប់គ្រងកូនទាំង៣នាក់ឡើងវិញ ហើយខាងមន្ត្រីអាជ្ញាធរក៍បានផ្ដល់សិទ្ធិឲ្យលោកដកកូនត្រលប់មកវិញ តែបែរជាភរិយា និងស្វាមីក្រោយមិនសុខចិត្ត ហើយដាក់បណ្ដឹងប្ដឹងលោក និងអ្នកជួយយកកូនស្រីលោកពីការប្រើហិង្សា ពីបទបង្ខាំង និងពង្រាត់ចាប់ក្មេងឲ្យមិនឲ្យដឹងមុន។ លោកថាបណ្ដឹងមានសភាពវក់វីឥតស្វាងតាំងពីខែធ្នូ ចុងឆ្នាំ២០១៥ ដោយលោកខាតបង់មិនតិចជាង៣ម៉ឺនដុល្លារនោះទេ ទម្រាំតែទទួលបានសិទ្ធិក្នុងការគ្រប់គ្រងកូនទាំង៣។ យ៉ាងណាមិញ លោកថាបញ្ហាបណ្ដឹងមិនបានបញ្ចប់នោះទេ ដោយសារតែបានសម្រេចប្ដឹងប្ដីចុងរបស់អតីតភរិយា ពីបទហិង្សាដោយចេតនាមកលើកូនស្រីទី២របស់លោកវិញ។ លោកនិយាយថា«ពីមុនខ្ញុំអត់មានប្ដឹងរឿងហ្នឹងទេ គឺគ្រាន់តែប្ដឹងសុំសិទ្ធិយកកូនមកគ្រប់គ្រងប៉ុណ្ណោះ ប៉ុន្តែមកពីគាត់(អតីតភរិយា) និងប្ដីចង់ប្ដឹងខ្ញុំចាប់ដាក់គុក និងទារជំងឺចិត្តខ្ញុំរឿងខ្ញុំយកកូនមកផ្ទះរហូតដល់១០ម៉ឺនដុល្លារ ទើបខ្ញុំប្ដឹងពីបទ ហិង្សា និងទារសំណងលើការវាយដំកូនខ្ញុំ៥ម៉ឺនដុល្លារវិញ»។ លោកប្រកាសមិនដកពាក្យបណ្ដឹងវិញទេ បើទោះជាស្វាមីក្រោយរបស់អតីតភរិយាបានឡើងជាទីប្រឹក្សារបស់មន្ត្រីជាន់ខ្ពស់ម្នាក់ ដែលបណ្ដាលឲ្យបណ្ដឹងរបស់លោក អូសបន្លាយតាំងពីខែធ្នូ ឆ្នាំ២០១៥ មកទល់ពរលនេះ នៅចោទអ្នកប្រើហិង្សាលើកូនស្រីលោកមិនបាន។ លោកថាគឺជារឿងអយុត្តិធម៌ដែលខាងតុលាការពន្យារពេលចុះឡើងៗលើករណីនេះ ដោយលើកថ្ងៃបើកសវនាការម្ដងជាពីរដងបណ្ដាលឲ្យសាក្សីរបស់លោកខាតពេល និងធុញទ្រាន់ រហូតចង់ឈប់ធ្វើសាក្សីឲ្យលោក។

លោកជុំ លីណូ បានអះអាងថានៅថ្ងៃទី២២ ឧសភា តុលាការនឹងបើកការកាត់ក្ដីម្ដងទៀតលើករណីហិង្សាចំពោះក្មួយស្រីនេះ ដោយលោកនឹងចូលរួមក្នុងសវនាការនោះ ។ លោកថាបើសវនាការលើកនេះ នៅតែមិនមានលទ្ធផលណាមួយ នោះលោកនឹងប្រកាសជាសាធារណ:អំពាវនាវឲ្យមានការដោះស្រាយ មិនខុសគ្នាពីករណីលោក សុខ ជំនោរ បង្ហោះរិះគន់តុលាការរឿងមិនដោះស្រាយ ឲ្យតារាវម្រៀងវ៉ានីឡានោះទេ។ លោកថាក្មួយលោករងគ្រោះចង់២ឆ្នាំហើយ ហេតុអ្វីជនដែលបង្កស្នាមរបួសដល់ក្មួយស្រីរបស់លោក ដោយមានទាំងភស្ដុតាងច្បាស់លាស់ផង មិនត្រូវបាននាំទៅផ្តន្ទាទោស។ លោកទទូចយ៉ាងរន្ថើនឲ្យដោះស្រាយលើបញ្ហានេះ ដោយលោកបព្ជាក់ថាបើយុត្តិធម៌នៅតែគ្មានចំពោះក្មួយស្រី គឺមិនខុសពីលើកទឹកចិត្តអ្នកប្រើហិង្សាលើក្មេងជាអនិតិជន បន្តកើតមានឡើងនៅកម្ពុជាឡើយ៕