ស្ត្រីចំណាស់ម្នាក់បានអះអាងថា គាត់គឺជាអតីតជាតារាចម្រៀងសម័យម្នាក់តាំងពីទស្សវត្សរ៍ឆ្នាម១៩៧០ រហូតមកដល់បច្ចុប្បន្ននេះ បានធ្លាក់ខ្លួនឈឺធ្ងន់គ្មានប្រាក់ព្យាបាលជំងឺ មានជីវភាពខ្វះខាតរកអង្ករច្រកឆ្នាំងគ្មាន ជាពិសេសគ្មានទីជម្រកថែមទៀត។គាត់និងចៅស្រីបានធ្វើដំណើរទៅកាន់សាលាសង្កាត់ចោមចៅកាល ពីវេលាព្រឹកថ្ងៃទី១៧ ខែឧសភា ឆ្នាំ២០១៧ ដើម្បីស្វែងរកសប្បុរសជនឲ្យជួយគាត់ក្នុងស្ថានភាពទ្រុឌទ្រោមយ៉ាងខ្លាំងគួរឲ្យអាណិត។គាត់បានលើកដៃសំពះសុំឲ្យសប្បុរសជនជួយ។

លោកយាយបានឲ្យដឹងថា គាត់ឈ្មោះហង្ស ស៊ីថា អាយុ៦២ឆ្នាំ ជាអតីតតារាចម្រៀង គាត់មានជំងឺទឹកនោមផ្អែម ខូចក្រលៀន និងតម្រងនោមនិងសួតយ៉ាងធ្ងន់ធ្ងរ ។គាត់មានប្ដីឈ្មោះវ៉ាន់ ស៊ីវុត្ថា (ស្លាប់)ជាតន្ត្រីករកាន់ហ្គីតាសូឡូ ដែលគាត់និងប្ដីគឺជាអ្នកចម្រៀងនិងជាតន្ត្រីករតាំងពីពីទស្សវត្សរ៍ឆ្នាំ១៩៧០ រហូតមកដល់អំឡុងឆ្នាំ២០០០។កាលពីសង្គមរាស្រ្តនិយមគាត់ជាអ្នកចម្រៀងប្រចាំកងពលតូចលេខ២៣និងកងពលធំលេខ៦នៅកំបូល ហើយពេលជំនាន់ប៉ុលពតគាត់ក៏ត្រូវអង្គការឲ្យច្រៀងដែរ។ក្រោយរបបប៉ុលពតដួលរលំគាត់បានភៀសខ្លួនទៅនៅជំរំណងច័ន្ច ហើយក្រោយមកទៀតបានមករស់ក្នុងខេត្តបន្ទាយមានជ័យ។

បន្ទាប់មកទៀតត្រូវបានតារាកំប្លែងជីវ៉ាន់ស៊ុយនាំមកច្រៀងនៅមជ្ឈមណ្ឌលម៉ុងឌីយ៉ាល់រាជធានីភ្នំពេញ។មិនតែប៉ុណ្ណោះគាត់និងប្ដីធ្លាប់ជាអ្នករួមក្រុមជាមួយលោកគ្រូភ្លេង ស្វាយ សរ ដែលជាតន្ត្រីករជើងចាស់ផងដែរ។ជាងនេះទៀតតន្រ្តីករ
ហង្សសាខន ត្រូវជាបងប្រុសគាត់និងអ្នកចម្រៀងហង្ស សុជាតា គឺជាក្មួយស្រីគាត់ផង។គាត់មកភ្នំពេញរស់នៅផ្ទះជួលគ្មានផ្ទះខ្លួនឯងស្នាក់នៅទេ ហើយក្រោយមកប្ដីគាត់បានស្លាប់ចោលគាត់បានរស់នៅជាមួយកូនប្រុស២នាក់
កូនប្រុស២នាក់នោះក្រោយមកបានចេញទៅនៅជាមួយប្រពន្ធនៅខេត្តអស់

កូនប្រុសគាត់ម្នាក់ឈ្មោះសុខ រ៉ាក់ មានប្រពន្ធមានកូនហើយ ប៉ុន្តែបានកូនមួយហើយត្រូវប្រពន្ធរត់ចោល ហើយបន្ទាប់មកទៀតបានទៅនៅឯប៉ោយប៉ែតបាត់ដោយបានទុកកូនស្រីឲ្យគាត់ចិញ្ចឹមដែលពេលនេះនាងមានអាយុ១០ឆ្នាំហើយ ចំណែកកូនប្រុសម្នាក់ទៀតឈ្មោះសុខសេរី មានប្រពន្ធរស់នៅក្នុងខេត្តកំពត មិនដែលមកជិតគាត់ទេទោះបីដឹងថាគាត់ ឈឺធ្ងន់ក៏ដោយហើយគាត់ដាច់ពេលសុំលុយតែ៥ម៉ឺនរៀលក៏មិនឲ្យផង។ពេលនេះគាត់រស់វានដោយសាេតែមានអ្នកជិតខាងឱ្យហូបទេជួនកាលបើគេមិនឲ្យក៏គ្មានអីហូបដែរ

ដូច្នេះគាត់មានតែម្រាមដៃដប់សំពះសុំឲ្យសប្បុរសជនជួយផង។ទោះជាយ៉ាងណាគេមិនដឹងថាកូនទាំង២របស់គាត់មានជីវភាពបែបណានោះទេបានជាហាក់ដូចជាមិនសូវអឺអើនិងម្តាយរបស់ខ្លួន៕

//www.youtube.com/watch?v=fJIULvoCGYg&feature=youtu.be