ភ្នំពេញៈ តាមសេចក្តីរាយការណ៍ពីភ្នាក់ងារ Post News បានឲ្យដឹងថា មុននេះបន្តិច មានករណីគ្រោះថ្នាក់ចរាចរណ៍មួយបានកើតឡើង ដោយបុរសម្នាក់ បានជិះម៉ូតូម៉ាកហុងដាសេ១២៥ ក្នុងល្បឿនលឿនចាប់ហ្វ្រាំងមិនទាន់ ជ្រុលទៅកៀរនិងប៉ះរថយន្តម៉ាកវីស្តូ ពណ៌ក្រហម របស់មន្ត្រីកងរាជអាវុធហត្ថ បណ្តាលឲ្យដួលរងរបួសស្រាលដោយខ្លួនឯង ។
ហេតុការណ៍នេះបានកើតឡើងកាលពីវេលាម៉ោង ៣និង៥០នាទី រសៀលថ្ងៃទី១៧ ខែឧសភា ឆ្នាំ២០១៧ ស្ថិតនៅចំណុចផ្លូវលេខ៥៦៦ កែងនឹងផ្លូវលេខ៣៣៥ ក្នុងសង្កាត់បឹងកក់ទី២ ខណ្ឌទួលគោក រាជធានីភ្នំពេញ។
តាមប្រភពព័ត៌មានបានឲ្យដឹងថា មុនពេលកើតហេតុ គេបានឃើញម៉ូតូម៉ាក ហុងដាសេ១២៥ ពណ៌ខ្មៅ ពាក់ស្លាកលេខ ភ្នំពេញ 1BN-9912 បើកបរដោយបុរសម្នាក់ តាមបណ្តោយផ្លូវលេខ៣៣៥ លុះបានមកដល់ចំណុចកើតហេតុ ខណៈដែលកំពុងបើកលឿន ក៏បានវ៉ាក់ជាមួយនឹងរថយន្តម៉ាក វីស្តូ ពណ៌ក្រហម ពាក់ស្លាកលេខ សៀមរាប 2A-9048 ដែលកំពុងបើកបរដោយមន្ត្រីអាវុធហត្ថម្នាក់ ចាប់ហ្វ្រាំងម៉ូតូមិនទាន់ ក៏ជ្រុលទៅកៀរនិងប៉ះរថយន្តខាងលើ បណ្តាលឲ្យដួលម៉ូតូរងរបួសដោយខ្លួនឯងដោយបានទៅព្យាបាលមុខរបួសនៅគ្លីនិកឯកជន។ ចំណែករថយន្តវិញ ខូចខាតបន្តិចបន្តួច។
ក្រោយកើតហេតុ ភាគីទាំងសងខាង បានធ្វើការសម្របសម្រួលគ្នា ដោយយករថយន្តនិងម៉ូតូទៅជួសជុលដោយខ្លួនឯងរៀងៗខ្លួន ដើម្បីបញ្ចប់រឿង មិនរំខានដល់សមត្ថកិច្ចនោះឡើយ៕
https://youtu.be/ggipPizjdZg
មតិយោបល់