ខុសពីតារាសិល្បៈមួយចំនួនដែលថ្ងូរថាអត់មានការសម្ដែង ឬមិនសូវមានការងារសិល្បៈជាពិសេសក្នុងរដូវសំបូរភ្លៀងធ្លាក់នោះ សម្រាប់តារាសម្ដែងនាងពីង រ៉ូហ្សា បែរត្រូវគេមើលឃើញថាស្ទុះឡើងទីផ្សារដល់កម្រិតឡើងកប់តែម្ដង ដោយសារតែនាងប្រកាសរកពេលសម្រាកលែងឃើញ។ ក្រៅពីបានតំណែងជាពិធីការិនី និងថតស្ពតយ៉ាងកាលីព នាងក៏ជាប់កុងត្រាសម្ដែងរឿងដល់ទៅ៥រឿងនៅក្នុងពេលនេះផងដែរ។

ពីង រ៉ូហ្សា និយាយថានាងសប្បាយចិត្តដែលនាងទទួលបានឱកាសសិល្បៈច្រើនឡើងខុសប្លែកជាងមុន ដោយសូម្បីតែប្រាក់ចំណូលក៏មានកំណើនខ្ពស់ដែរ ទើបធ្វើអោយនាងអាចកែប្រែជីវភាពអោយឡូយឆាយ។ នាងនៅតែលើកឡើងថាជីវិតហ៊ឺហារចុងក្រោយបូករួមទាំងរថយន្ត និងឱកាសមានលុយឡើងទិញទំនិញនៅក្រៅប្រទេសដូចទៅមកភ្នំពេញកំពង់ចាម គឺជាលទ្ធភាពដែលនាងទទួលបានពីការប្រឹងប្រែងពីសិល្បៈទាំងអស់។ នាងថារាល់ថ្ងៃខ្លួនមិនហ៊ានទុកពេលចោលដើម្បីសម្រាកលេងនោះទេ គឺថ្ងៃណាក៏ទទួលការងារចេញថតនោះដែរ បើទោះជាការងារខ្លះទទួលបានកម្រៃមិនស្មើនឹងការទាមទារ។ នាងប្រកាសត្រីតូចក៏ចាប់ត្រីធំក៏ចាប់ ដោយមិនអោយរបូតសាច់ប្រាក់ និងឱកាសតូចធំទាំងអស់ ទើបនាងសឹងមិនមានពេលទំនេរហើយមានមុខច្រើនឡើងក្នុងការងារសម្ដែង។ នាងថាខ្លួនមានរឿងចំនួន៥ជាប់ថតរាល់ថ្ងៃ ដោយក្នុងចំណោមរឿងទាំង៥ទើបតែថតចប់ក្ដៅបានមួយរឿងប៉ុណ្ណោះគឺរឿង«ម្ចាស់ចម្ការ»។ នាងសារភាពថាបើទោះជាទីផ្សារឡើងកប់រហូតមិនមានម៉ោងសម្រាកដល់ម្លឹង តែមិនទាន់មានរឿងណាមួយដែលនាងទទួលបានឱកាសថតតួឯកឡើងទើបនាងយល់ថាខ្លួននៅតែមិនទាន់ឈានដល់គោលដៅសម្រាប់អាជីពសម្ដែង។ យ៉ាងណាមិញ នាងថាសប្បាយចិត្តដែលមានសំណាងបានសម្ដែង៥រឿងបុកគ្នា ហើយសុទ្ធតែជារឿងដែលនាងបានសម្ដែងជាតួអង្គធំតាំងពីដើមរឿងដល់ចប់ ដែលមិនខុសពីតួខ្លាំងបន្ទាប់ពីតួឯក។

ទន្ទឹមនឹងការលេចធ្លោរក្នុងការសម្ដែងរឿង ថតស្ពត ពិធីការិនីកម្មវិធីសម្រស់ ការងារដើរម៉ូដក្នុងក្រុម Cambodia super model របស់ ឌួង ហ្សារីដា ក៏សំបូការងារមិនសូវទំនេរណាស់ដែរ ទើបនាងទទួលស្គាល់ខ្លួនឯងឡើងកប់ដូចគ្នា សម្រាប់អាជីពសិល្បៈនាពេលចុងក្រោយ ជាពិសេសបន្ទាប់ពីនាងមានឱកាសសម្ដែងឈុតខ្លីជាបន្តបន្ទាប់អោយទូរទស្សន៍អប្សរា ក្រោមស្នាដៃលោកហ្វៃ សំអាង។ នាងរំពឹងយ៉ាងខ្លាំងថារឿងដែលនាងសម្រុកថា ហើយគ្រោងនឹងចេញផ្សាយបណ្ដាក់គ្នាទាំង៥រឿងនោះ នឹងហុចភាពលេចធ្លោរអោយនាងទន្ទឹមគ្នា ដោយសារតែរឿងទាំងនោះសុទ្ធតែជារឿងភាគទូរទស្សន៍ដែលមិនខ្វល់រឿងមិនខ្វះអ្នកតាមដាន៕