ពេញមួយថ្ងៃទី១៤ មិថុនានេះ មជ្ឈមណ្ឌលជាតិផ្ដល់ឈាមបានប្រារព្ធទិវារបរិច្ចាគឈាមថ្នាក់ជាតិ ដោយមានតារាល្បីៗរហូតដល់ជាតិ១០០នាក់មកពីគ្រួសារតារាកម្ពុជាចូលរួមច្រៀងរាំ។ ព្រឹត្តិការណ៍នេះនឹងមានផ្សាយផ្ទាល់លើផេក Post Komsan ចាប់ពីម៉ោង៩ព្រឹកតទៅ ដោយមានការរំពឹងថានឹងមានការចូលរួមបរិច្ចាគឈាមកាន់តែច្រើនជាងមុន បន្ទាប់ពីការប្រគុំតន្ត្រីរបស់គ្រួសារតារាកម្ពុជាជួយដល់មជ្ឈមណ្ឌលជាតិផ្ដល់ឈាមកាលពីលើកទី១ ក្នុងទិវារនៃក្ដីស្រឡាញ់ថ្ងៃទី១៤ កុម្ភៈ ទទួលបានឈាមរហូតដល់៧២០ប្លោកដែលជាចំនួនច្រើនលើសពីការប៉ាន់ស្មាន។

ការប្រគុំតន្ត្រីដែលនឹងធ្វើឡើងនៅមជ្ឈមណ្ឌលជាតិផ្ដល់ឈាមនេះ ត្រូវបានប្រកាសចែកចេញជាពីវគ្គដោយនៅពេលព្រឹកចាប់ពីម៉ោង៨ព្រឹករហូតដល់ម៉ោង១២ថ្ងៃត្រង់ ដោយមានវត្តមានតារាល្បីៗជាច្រើនដូចជាលោក សុះ ម៉ាច អ្នកនាងខាត់ សុឃីម អ្នកនាងម៉ៅ ស៊ីណាត កញ្ញាហ៊ិន លីដា តារាចម្រៀង Cambodian Idol និងតារាកំប្លែង តារាសម្ដែងល្បីៗជាច្រើនរូបចូលរួមរាំច្រៀង។

នៅពេលរសៀលកម្មវិធីនឹងដំណើរការជាថ្មីចាប់ពីម៉ោង១រសៀល រហូតដល់ម៉ោង៥ល្ងាច ដោយមានវត្តមានក្រុមកំប្លែងនាយកុយ ក្រុមកំប្លែងយ៉េយ៉េ លោកសៅ ឧត្តម តារាចម្រៀង Cambodian Idol ក្រុមសម្ដែងShow ពិសេស និងតារាចម្រៀងOriginal Song ជាច្រើនរួមចូលរួម។

លោកផាត់ តារារដ្ឋ ស្ថាបនិកគ្រួសារតារាកម្ពុជាបានអះអាងថា ដើម្បីជួយចូលរួមស្វែងរកឈាមពីការបរិច្ចាគក្នុងទិវារបរិច្ចាគឈាមថ្នាក់ជាតិថ្ងៃ១៤ មិថុនា។ លោកថាការពីលើកទី១ គ្រួសារតារាកម្ពុជាបានដឹកនាំតារាសិល្បៈស្វែងរកឈាមជួយដល់មជ្ឈមណ្ឌលជាតិផ្ដល់ឈាមបាន៧២០ប្លោកម្ដងហើយ ទើបការបង្ហាញខ្លួនជាលើកទី២នៅក្នុងថ្ងៃនេះ មានការរំពឹងយ៉ាងខ្លាំងថាអ្នកទស្សនាដែលនឹងចូលបរិច្ចាគឈាមនឹងមានចំនួនច្រើនជាងនេះ។ លោកថាតារាសិល្បៈដែលបង្ហាញខ្លួននៅក្នុងព្រឹត្តិការណ៍ប្រគុំតន្ត្រីលើកនេះ សុទ្ធតែជាតារាសម្ដែង តារាកំប្លែង ពិធីករ ពិធីការិនី និងតារាចម្រៀងដែលមានឈ្មោះបោះសំឡេងនៅក្នុងវិស័យសិល្បៈច្រើនជាងសមាសភាពគ្រួសារតារាកម្ពុជាកាលពីលើកទី១។ លោកថាតារាសិល្បៈទាំងអស់សុទ្ធតែស្ម័គ្រចិត្តជួយសង្គម ហើយតារាមួយចំនួនក៏បានប្រកាសបរិច្ចាគឈាមផងដែរ ដើម្បីបំផុសឲ្យអ្នកចួលរួម ជាពិសេសគឺយុវវ័យ ឲ្យបរិច្ចាគឈាមឲ្យបានច្រើននៅក្នុងព្រឹត្តិការណ៍នោះ៕