បើទោះជាមានការខ្ទាស់ពីសំណាក់លោក សាយ រតន: ពិធីកររបស់ទូរទស្សន៍CTN នៅពេលអ្នកនាងយុគ ចិន្តា ផ្ដល់សម្ភាសន៍ឲ្យអ្នកសារព័ត៌ក្នុងពេលអ្នកនាងចុះទៅដល់ផ្ទះរបស់លោកអ៊ិត សេដ្ឋា ក្រោយពីត្រឡប់ពីអាមេរិកភ្លាមៗ ក៏អ្នកនាងនៅតែបានបង្ហើបឲ្យដឹងខ្លះៗពាក់ព័ន្ធនឹងរឿងអវិជ្ជមានមួយចំនួនរបស់អតីតភរិយាលោកអ៊ិត សេដ្ឋា។

អ្នកនាងថាខ្លួនមានអាថ៌កំបាំងរបស់លោកអ៊ិត សេដ្ឋាច្រើនណាស់ គឺច្រើនជាងម្ដាយរបស់លោកទៅទៀត ប៉ុន្តែបណ្ដាលមកពីអ្នកនាងនិយាយមិនបានទើបអ្នកនាងប្រាប់ថាតឹងទ្រូងនៅពេលអ្នកនាងទ្រាំលាក់រឿងរ៉ាវទាំងនោះទាំងអ្នកនាងគិតចង់ទម្លាយ។

អ្នកនាងបញ្ជាក់ថា លោកអ៊ិត សេដ្ឋា លោកមានភរិយាតែម្នាក់គត់គឺអ្នកស្រីសុភាព ជាម្ដាយរបស់កូនៗទាំង៣ហើយក្រោយពេលរួមរស់ គឺភរិយារបស់លោកបានទទូចចង់ចេញទៅរស់នៅអាមេរិក ទើបបណ្ដាលឲ្យលោកសម្រេចចិត្តលក់ផ្ទះ សម្បែង និងទ្រព្យសម្បត្តិច្រើនទៀត យកលុយធានាភរិយាឲ្យចេញទៅរស់នៅអាមេរិកតាមការចង់បានផងដែរ។ អ្នកនាងថា លោករស់នៅអាមេរិកមិនខុសពីកូនគូលីម្នាក់នោះទេដោយសារតែលោកត្រូវធ្វើការទាំងយប់ទាំងថ្ងៃ ដើម្បីដោះស្រាយជីវភាពនៅទីនោះផង និងសងបំណុលនៅឯស្រុកខ្មែរផង ដោយសារតែគេប្រមូលលុយកាក់ធានាយកភរិយាឲ្យបានចេញទៅអាមេរិក។ អ្នកនាងបន្តថាក្រោយឡើងទៅដល់អាមេរិក ជិវិតស្នេហារវាងលោកអ៊ិត សេដ្ឋា និងអតីតភរិយាក៍ត្រូវរង្គោះរង្គើ ហើយក្រោយមក អតីតភរិយារបស់លោកក៏រើអីវ៉ាន់ចុះចេញពីលោក និងកូន ទៅរស់នៅប្រទេសអូស្រ្តាលីបាត់ដំណឹងស្ងាត់ឈឹងមកទល់ពេលនេះ។

អ្នកនាងនិយាយថាលោកអ៊ិត សេដ្ឋា នៅមានចំណុចដែលអ្នកនាងត្រូវនិយាយច្រើនទៀត ដើម្បីកុំឲ្យមានការវាយប្រហារថា បណ្ដាលមកពីលោក ជាមនុស្សជក់ល្បែង ឬមានស្រីច្រើនក្នុងពេលរួមរស់ជាមួយភរិយា ទើបបណ្ដាលឲ្យភរិយារបស់លោកចុះចេញ ពេលធានាទៅដល់អាមេរិក។ គាប់ជួនជាពេលមិនទាននាំភរិយាចេញទៅអាមេរិក លោកក៍បានខ្ចីបុលធនាគារ និងលុយកាក់រាប់មិនអស់ពីអ្នកចងការដើម្បីបើកហាងឲ្យភរិយាផងនោះ ទើបជាមូលហេតុធ្វើឲ្យលោកធ្លាក់ខ្លួន ក្រោយត្រឡប់ពីអាមេរិក មករស់នៅស្រុកវិញ។ អ្នកនាងថាមកទល់ពេលនេះអតីតភរិយារបស់លោកស្ថិតនៅអូស្រ្តាលី ហើយអ្នកស្រីក៏ដឹងពាក់ព័ន្ធនឹងរឿងរ៉ាវរបស់ស្វាមីនោះដែរ ប៉ុន្តែអាចមកពីហេតុផលសំខាន់ធំមួយ ទើបអ្នកស្រីបន្តបាត់ស្រមោលមិនទាក់ទងមកកូនក្រោយលោកអ៊ិត សេដ្ឋា ស្លាប់។

យ៉ាងណាមិញអ្នកនាងក៏បានបង្ហើបថា មិនមានម្ដាយណាម្នាក់ដាច់ចិត្តចោលកូននោះទេ ប៉ុន្តែវាបណ្ដាលមកពីហេតុផលទើបអតីតភរិយារបស់លោក បន្តបាត់ដំណឹង។ អ្នកនាងបញ្ជាក់បានត្រឹមពេលនោះ លោក សាយ រតន: ដែលអមមកជាមួយបានកាត់សម្ដី និងស្នើកុំឲ្យអ្នកនាងនិយាយពាក់ព័ន្ធនឹងអតីតកាលរបស់លោកសេដ្ឋាបន្តទៀត។ អ្នកនាងបង្ហូរទឹកភ្នែក នៅពេលរំលឹកដល់រឿងលោកសេដ្ឋា លក់ផ្ទះលក់សម្បែងយកលុយធានាភរិយាទៅដល់អាមេរិក ប៉ុន្តែចុងក្រោយអតីតភរិយារបស់លោកបែរជាសុំលះលែង និងឈានទៅរស់នៅអូស្ត្រាលីមិននឹកលោក និង កូនៗទាំង៣។

អ្នកនាងយុគ ចិន្តាបន្តថាអ្នកនាងបានដឹងរឿងរ៉ាវរបស់លោកអ៊ិត សេដ្ឋាច្រើនណាស់ មុនលោកចែកឋាន តែអ្នកនាងបានប្រកាសនៅចំពោះមុខរូបថតរបស់លោកអ៊ិត សេដ្ឋា ថាអ្នកនាងនឹងឈប់រំលឹកពីរឿងរ៉ាឯកជនរបស់លោក ដើម្បីឲ្យលោកស្ងប់ចិត្ត។ ក្រោយពីអ្នកនាងពន្លយចំណុចសំខាន់ៗបានប៉ុន្មានចំណុច ហើយត្រូវបានពិធីករលោកសាយ រតន:កាត់សម្ដី និងស្នើមិនឲ្យនិយាយ៕