ព័ត៌មានសិល្បៈ និងកម្សាន្ត

យូអ៊ីន ថាមិនមែនហេតុផលក្ស័យធន ទើបចាប់ដៃតារាចម្រៀងក្រោមបង្គាប់

ក្រោយពីមានការប្រកាសថានឹងចាប់ដៃជាមួយតារាចម្រៀងក្រោមបង្គាប់របស់ខ្លួន១រូបគឺលោក វីរ៉ា ប៊ុន ដែលត្រូវបានលោកហៅថាបងធម៌យ៉ាងពេញៗមាត់នោះ ម្ចាស់ផលិតកម្ម JH លោកយូអ៊ីន បានអះអាងថាមិនមែនដោយសារតែហេតុផលផលិតកម្មរបស់លោកឈានដល់សភាពក្ស័យធន ឬមិនមានលទ្ធភាពបន្តដំណើរផលិតកម្មនោះទេ ប៉ុន្តែបណ្ដាលមកពីលោកចង់ពង្រឹងសកម្មភាពផលិតកម្មទើបឈានដល់ការចាប់ដៃ។ លោកបានទាំងអះអាងថាការចាប់ដៃជាមួយតារាចម្រៀងដែលធ្លាប់តែជាកូនចៅក្រោមបង្គាប់ ហើយបានក្លាយជាម្ចាស់ហ៊ុន៥០ភាគរយប្រចាំផលិតកម្មលោកនោះ គឺនឹងធ្វើឲ្យផលិតកម្ម JH មានការឈានឡើងនោះផង។

លោកបញ្ជាក់ថា មានហេតុផលតែមួយគត់ដែលតារាចម្រៀងវីរ៉ា ប៊ុន ដែលជាតារាចម្រៀងប្រចាំនៅក្នុងផលិតកម្ម JH របស់លោក បានក្លាយជាដៃគូភាគហ៊ុនទៅវិញ គឺដោយសារតែលោកជាតារាមួយរូបដែលមានឆន្ទ:ចង់វិនិយោគក្នុងវិស័យផលិតភាពយន្ត និងបណ្ដាលមកពីការសេពគប់គ្នានាប៉ុន្មានខែចុងក្រោយ គឺទំនាក់ទំនងរបស់លោក និងកូនក្រុមរូបនេះបានក្លាយជាបងប្អូនល្អ។ លោកសម្រេចចិត្តឲ្យ អតីតកូនចៅរបស់លោកដែលធ្លាប់តែច្រៀងនៅក្នុងផលិតកម្មJH រូបនេះ ឡើងតំណែងជាដៃគូភាគហ៊ុនធំ គឺដើម្បីរួមគ្នាបោះទុនរួមគ្នាច្រើនម៉ឺនដុល្លារផលិតមួយរឿងនៅអំឡុងចុងឆ្នាំខាងមុខ ដើម្បីឲ្យផលិតកម្ម JH មានភាពយន្តខ្នាតធំមួយប្រកួតប្រជែងទីផ្សារ។

មកទល់ពេលនេះ លោកសារភាពថា ផលិតកម្ម JH មិនទាន់មានភាពយន្តណាមួយចេញថតដូចអ្វីដែលបានប្រកាសឡើងនោះទេ ដោយសារទី១លោកដែលជាម្ចាស់ផលិតកម្មរវល់តែថតរឿងឲ្យផលិតកម្មដទៃមិនមានពេលវេលាក្នុងការផលិត និងទី២ដោយសារតែទុនដែលលោកចង់ប្រើនៅមានកម្រិត ដែលធ្វើឲ្យលោកយល់ថាបើចំណាយផលិតរឿងម្នាក់ឯង អាចមិនមានគុណភាព។ លោកថាវត្តមានចាប់ដៃរបស់តារាចម្រៀង វីវ៉ា ប៊ុន នឹងធ្វើឲ្យផលិតកម្ម JH មានភាពយន្តដំបូងរបស់ខ្លួនក្នុងពេលខាងមុខ ដោយភាពយន្តដំបូងនោះគឺមានឆ្អឹងរឿងរួចហើយដោយនិយាយពីរឿងខ្មោច អបិយជំនឿ តែកំប្លែង ដើម្បីឲ្យត្រូវនឹងចំណូលចិត្តរបស់អ្នកទស្សនា។

ជាមួយគ្នានោះ សកម្មភាពផលិតបទចម្រៀង ឬចេញថត MV ប្រចាំផលិតកម្ម JH ក៏នឹងមានកំណើនផងដែរក្រោយពីតារាចម្រៀងធ្លាប់តែជាកូនចៅរបស់លោកស្រាប់តែក្លាយជាភាគហ៊ុនមួយ ហើយឈានទៅដាក់ហ៊ុនផលិតរឿងជ្រោមជ្រែងផលិតកម្ម។

លោកយូអ៊ីន បញ្ជាក់ថាផលិតកម្ម JH នឹងបញ្ចេញស្នាដៃបន្តបន្ទាប់ក្នុងការផលិតរឿង ដោយរំពឹងថាសម្ព័ន្ធចូលហ៊ុនរវាងលោក និង តារាចម្រៀង វីវ៉ា ប៊ុន ជាបងធម៌ នឹងមានការគាំទ្រ។ លោកក៏ទើបតែបានបញ្ចេញបទចម្រៀងថ្មី និងបានបង្អួតការសម្ដែងជាតួបងធំ និងរំលោភយ៉ាងកាលីបក្នុងរឿងថ្មីរបស់ផលិតកម្មបដិហារ្យ និងផលិតកម្ម Wonderfilm Cambodia ផង ទើបលោករំពឹងថាលទ្ធភាពផលិតរឿងមួយដោយខ្លួនឯងបន្ថែមទៀត នឹងធ្វើឲ្យលោក ក៏ជាដូចជាផលិតកម្ម JH ទទួលការចាប់អារម្មណ៍៕

មតិយោបល់