មានការសោកស្ដាយយ៉ាងខ្លាំង ក្រោយពីស្ថាបត្យកម្មល្បីឈ្មោះរបស់កម្ពុជា លោក វណ្ណ មុលីវណ្ណ ទទួលមរណភាព កាលពីវេលាម៉ោង ៩ និង ៤៥នាទីព្រឹកថ្ងៃទី២៨ កញ្ញាមុននេះ។ លោកបានលាចាកលោកក្នុងជន្មាយុ៩១ឆ្នាំ ដោយបានបន្សល់នូវស្នាដៃជាច្រើន ជាពិសេសគឺគំរូស្ថាបត្យកម្មស្ដាតអូឡាំពិក និងវិមានឯករាជ្យជាដើម។

សពរបស់លោកត្រូវតម្កល់ធ្វើបុណ្យនៅសង្កាត់ស្លក្រាម ក្រុងសៀមរាប ខេត្តសៀមរាប ដោយមានការរំពឹងថា នឹងមានអ្នកចូលរួមយ៉ាងច្រើនកុះករ ពីសំណាក់មហាជន និងអ្នកអភិរក្សស្នាដៃវប្បធម៌ ដែលទទួលស្គាល់នូវស្នាដៃរបស់លោក។ លោក វណ្ណ មូលីវណ្ណ គឺជាស្ថាបត្យករល្បីឈ្មោះ ក្នុងសម័យសង្គមរាស្ត្រនិយម ដោយលោកបានបញ្ចេញស្នាដៃស្ថាបនាសំណង់ធំៗ នៅក្នុងប្រទេសដោយបន្សល់ដល់បច្ចុប្បន្ន។ លោក កើតនៅថ្ងៃទី២៣ខែវិច្ឆិកា ឆ្នាំ ១៩២៦ នៅក្នុងខេត្តកំពត ដោយមរណភាពរបស់លោក បានធ្វើអោយមានការសោកស្ដាយយ៉ាងខ្លាំង ជាពិសេសនៅលើបណ្ដាញសង្គមហ្វេសប៊ុក៕