ភ្នំពេញៈ បុរសជនជាតិកូរ៉េម្នាក់សង្ស័យប្រើប្រាស់គ្រឿងញៀនជ្រុលបែកថ្នាំលែងដឹងអីគ្រប់គ្រងសតិខ្លួនឯងលែងបាន បើករថយន្តមួយគ្រឿងម៉ាកSONATA ពណ៌ទឹកប្រាក់ ពាក់ស្លាកលេខ ភ្នំពេញ2AJ-9643បានបើកសម្រុកចូលក្នុងផ្ទះល្វែងម្តុំផ្សារឡា ភូមិទ្រា១ សង្កាត់ស្ទឹងមានជ័យ១ ខណ្ឌមានជ័យ បង្កឲ្យមានការផ្អើលយ៉ាងខ្លាំងកាលពីវេលាម៉ោង៨និង៣០នាទីព្រឹក ថ្ងៃទី២៨ ខែកញ្ញា ឆ្នាំ២០១៧។

ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេឃើញបុរសជនជាតិកូរ៉េខាងលើអាយុប្រហែលជា៣៨ឆ្នាំ បើករថយន្តក្នុងល្បឿនយ៉ាងលឿនសម្រុកចូលទៅក្នុងផ្ទះល្វែងដែលនៅចំណុចខាងលើធ្វើឲ្យស្ត្រីដែលជាម្ចាស់ផ្ទះភិតភ័យយ៉ាងខ្លាំង ហើយក៏បានយកសោមកចាក់ទ្វារហើយក៏បានរត់ចូលទៅផ្ទះអ្នកជិតខាងលើឲ្យជួយខណៈដែលនោះបុរសជនជាតិកូរ៉េខាងលើនោះនៅតែបន្តបើករថយន្តរបស់ខ្លួនសម្រុកចូលក្នុងផ្ទះរបស់គាត់ទៀតបណ្តាលបាក់ទ្វារដែកខាងក្រៅនិងទ្វារកញ្ចក់ខាងក្នុងខូចខាតទាំងស្រុង។

ក្រោយមកបុរសជនជាតិកូរ៉េលើនេះបានរត់ចូលទៅផ្ទះល្វែងមួយទៀតដែលនៅខាងមុខជាផ្ទះរបស់មន្ត្រីចរាចរណ៍ក្រុង ទើបម្ចាស់ផ្ទះដែលជាមន្ត្រីចរាចរណ៍ខាងលើចាប់វាយខ្នោះប្រគល់ឲ្យសមត្ថកិច្ចមូលដ្ឋាន។

ក្រោយពេលទទួលបានព័ត៌មានភ្លាមនគរបាលប៉ុស្តិ៍ស្ទឹងមានជ័យបានចុះទៅដល់កន្លែងកើតហេតុ ដើម្បីសហការជាមួយនគរបាលជំនាញខណ្ឌមានជ័យធ្វើការត្រួតពិនិត្យក្រោយមកក៏បានប្រគល់ជនជាតិកូរ៉េរួមនិងរថយន្តបញ្ជូនទៅកាន់ការិយាល័យចរាចរណ៍ជើងគោកស្នងការនគរបាលរាជនីភ្នំពេញ ចាត់ការតាមនីតិវិធីច្បាប់៕

https://youtu.be/8ktpT-Q8xzg