ក្នុងប៉ុន្មានខែនេះមានការផលិតវីដេអូបំភ័ន្តភ្នែកជាច្រើន ដោយវីដេអូទាំងនោះត្រូវបានអ្នកចែកចាយជេរប្រទិចតួសម្ដែងយ៉ាងចាស់ដៃ ប៉ុន្តែចុងក្រោយក៏មានការបកស្រាយថាគឺជាវីដេអូអប់រំ ខណ:ដែលវីដេអូចុងក្រោយគឺបានស្ដែងឡើងពីជម្លោះរបស់លោកម៉ាដូណា និងអ្នកលួចថតម្នាក់ ខណ:ដែលវីដេអូនេះក៏ត្រូវអ្នកផលិតបញ្ជាក់ដើម្បីអប់រំពីបរិស្ថាន។ តារាល្បីៗ២រូបគឺលោកសុះ ម៉ាច និងលោកសាវិន ហ្វីលីប បានហៅការផលិតវីដេអូនោះថាជាការធ្វើឲ្យច្របូកច្របល់ និងថាបើចង់ឲ្យមានការអប់រំពីបញ្ហាណាមួយគឺគួរតែរកមធ្យោបាយផ្សេង។

លោក សុះ ម៉ាច វិរ:សិល្បករល្បីឈ្មោះ បានសម្ដែងការហួសចិត្តដែលខាងផលិតករបានតម្រូវឲ្យលោក ម៉ាដូណា បញ្ចេញចរិតច្រងេងច្រង៉ាងនៅរមណីដ្ឋានគីរីរម្យ បន្ទាប់ពីវីដេអូជម្លោះដ៏អាក្រក់មើលនោះត្រូវបានគេរិះគន់ពេញផ្ទៃប្រទេស។

លោកថាជារឿងហួសចិត្តដែលខាងផលិតនឹកឃើញគំនិតនោះ ហើយយកតារាសម្ដែងល្បីឈ្មោះម្នាក់ទៅឲ្យគេជេរ ដែលមិនខុសពីការទម្លាក់តម្លៃរបស់តារាស្រុកខ្មែរ។ លោកថាសង្គមហាក់មានភាពច្របូកច្របល់ នៅពេលគ្រាន់តែចង់បញ្ចេញសារអប់រំពីអ្វីមួយ ហើយស្រាប់តែបង្កើតគំនិតឲ្យអ្នកលេងហ្វេសប៊ុកខឹងសម្បារ រហូតផ្ទុះការជេរប្រទិចតួអង្គឡើងផ្អើលផ្ទៃប្រទេស ហើយទើបបញ្ចេញវីដេអូបញ្ជាក់ថាជាការសម្ដែង។

លោកថាបើចង់អប់រំឲ្យមនុស្សស្រឡាញ់បរិស្ថានមិនខ្វះមធ្យោបាយក្នុងការណែនាំនោះទេ ដោយមិនគួរយកតារាល្បីម្នាក់ទៅធ្វើអត្តចរិតឲ្យមហាជនជេរផ្ដាសាធ្វើឲ្យប៉ះពាល់ដល់តម្លៃតារាសិល្ប:ផ្សេងទៀត ដែលមិនបានដឹងថានោះគឺជាការសម្ដែងអ៉ីចឹងទេ។ លោកតារាសិល្ប:មិនគួរផលិតការសម្ដែងណាមួយ ដែលបង្កឲ្យមានការយល់ច្រឡំ ហើយធ្វើឲ្យមានការប៉ះពាល់ចំពោះកិត្តិយសរបស់ខ្លួននោះទេ ដោយសារតែអ្នកសិល្ប:គួរតែជៀសឲ្យឆ្ងាយពីការប្រមាថផ្សេងៗ ដើម្បីប្រជាប្រិយភាពរបស់ខ្លួនផង។

លោកថាមិនមែនជារឿងល្អនោះទេ ដែលតារាសិល្ប:មួយរូបសុខចិត្តប្រថុយយកកិត្តិយសរបស់ខ្លួនទៅប្រឡូកប្រឡាក់នឹងការរិះគន់ដោយសារតែចង់ល្បី ហើយបែរជាមកអះអាងថាដើម្បីអប់រំពីនេះពីនោះ ក្នុងពេលដែលវីដេអូនោះបានបង្ហាញនូវឥរិយាបទមិនល្អ និងខ្វះការអធ្យាស្រ័យគ្នា ដែលមិនខុសពីការបង្ហាញឲ្យឃើញនូវតម្លៃអសីលធម៌ និងការចង់ឈ្នះចង់ចាញ់ក្នុងវីដេអូនោះច្រើនជាង។

មិនខុសគ្នាដែរលោកសាវិន ហ្វីលីព បានអះអាងថាបើវីដេអូដែលបានផលិតនោះល្អ គឺមិនទាល់តែមានអ្នកជេរឡើងផ្អើលហ្វេសប៊ុកទើបហៅថាល្អនោះទេ គឺប្រើមធ្យោបាយមួយផ្សេងទៀតក៏នៅតែល្បី និងមានការចាប់អារម្មណ៍នោះដែរ។ លោកប្រកាសមិនគាំទ្រចំពោះការផលិតវីដេអូដែលគេជេរឡើងពេញផ្ទៃប្រទេសបែបហ្នឹងនោះទេ ជាពិសេសការយកតារាល្បីទៅសម្ដែងឲ្យគេជេរឡើងទក់សាច់នោះតែម្ដង។

តារាសិល្ប:ជាច្រើនផ្សេងទៀតសុទ្ធតែបង្ហាញពីការមិនគាំទ្រចំពោះវីដេអូដែលលោក ម៉ាដូណា បានសម្ដែង ដោយម្នាក់ៗយល់ថានោះជាការប៉ះពាល់ដល់តម្លៃរបស់អ្នកសិល្ប: និងបង្ហាញឲ្យឃើញពីសញ្ញាណអវិជ្ជមានក្នុងសង្គមសិល្ប:ខ្មែរកាន់តែអាក្រក់ទៅៗក្នុងពេលតារាខ្មែរនាពេលចុងក្រោយសម្បូររឿងឲ្យគេរិះគន់នោះផង។ តារាភាគច្រើនសុទ្ធតែបានបង្ហាញទស្សន:រិះគន់ជុំវិញការបង្កើតវីដេអូអប់រំ ដែលមានខ្លឹមសារធ្វើឲ្យសង្គមខ្មែរអាប់អោន ជាពិសេសគឺការបង្កើតវីដេអូដែលនាំឲ្យមានការភន្ត័ច្រឡំហើយនាំគ្នាជេរឡើងផ្អើលសង្គមហ្វេសប៊ុកនោះតែម្ដង។

ក្នុងនោះវីដេអូជុំវិញជម្លោះរបស់លោក អ៉ឹង សុធារិទ្ធិ ហៅដុកទ័ររិទ្ធិ និងលោក ហម ឈរ៉ា ក៏ត្រូវគេយកមករិះគន់ព្រមគ្នាផងដែរ ក្នុងពេលវីដេអូជុំវិញជម្លោះរបស់លោក ម៉ាដូណា ត្រូវបានគេអះអាងថាជាវីដេអូ ធ្វើឲ្យអាប់ឱនដល់តម្លៃអ្នកសិល្ប: និងថាជាការបណ្ដុះគំនិតឲ្យមានការជេរប្រទិចគ្នាក្រោយពីទស្សនាវីដេអូនោះ។

យ៉ាងណាមិញ លោកតាន់ គឹមសួរ ដែលជាអ្នកផលិតវីដេអូនោះនៅតែបានប្រកាសថាលោកមានចេតនា ក្នុងការអប់រំច្រើនជាង ដោយលោកបញ្ជាក់គ្រប់ពេលបកស្រាយថា ទាល់តែផលិតវីដេអូទម្រង់បែបនេះ ទើបធ្វើឲ្យការអប់រំពីអ្វីមួយរបស់លោកបានដល់ត្រចៀកមហាជននោះផង។ លោករមែងប្រកាសសុំទោសក្រោយការយល់ច្រឡំ បើទោះជាអ្នកមិនពេញចិត្តនឹងការផលិតវីដេអូនោះបានលើកឡើងថា លោកធ្វើឡើងដើម្បីឲ្យតែល្បីស្នាដៃរបស់ខ្លួន និងល្បីផេកដែលបានបង្ហោះ៕

//youtu.be/KWZdnfJB5Fs