ពិតជាក្ដៅទៀតហើយ ដោយសារតែលោក គាំ ចន្ធី ម្ចាស់ផលិតកម្មFCI ស្រាប់តែចេញមុខបកអាក្រាត និងប្រកាសថានឹងប្ដឹង ឌុច លីដា តែម្ដង បើក្រោយការបង្ហោះរបស់នាង ហើយលោកចេញមុខវាយបក ហើយនាងមិនទៅថតបញ្ចប់រឿង«ទូកបាត់ច្រវ៉ា»របស់លោក។ លោកចេញមុខវាយបក បន្ទាប់ពីឌុច លីដា បង្ហោះលើផេកផ្ទាល់ខ្លួនពីរឿងផលិតករក្រឡិចក្រឡុចដាក់នាង និងគេចវេះមិនព្រមបើកលុយថ្លៃសម្ដែងអោយនាង ដែល លោកគាំ ចន្ធី ប្រកាសថាការបង្ហោះនោះគឺនាងសំដៅចំពោះលោកព្រោះតែមុនការបង្ហោះគឺលោក និងនាងមានជម្លោះដាក់គ្នា។

លោកគាំ ចន្ធី និយាយថា ឌុច លីដា ក្នុងពេលកុងត្រាថតរឿង«ទូកបាត់ច្រវ៉ា» នាងបានឆ្លើយប្រាប់លោកថាអំឡុងខែ៦ នាងអោយថ្ងៃថតមួយសប្ដាហ៍មួយថ្ងៃ ខែ៧អោយអោយ២ថ្ងៃ និងអំឡុងខែ៨ នាងអោយមួយសប្ដាហ៍៣ថ្ងៃ ប៉ុន្តែធាតុពិតគឺនាងអោយ៣ថ្ងៃមួយសប្ដាហ៍តិចបំផុត។ លោកថាភាពយន្តរឿង«ទូកបាត់ច្រវ៉ា»ត្រូវដាក់ផ្សាយលើកញ្ចក់ទូរទស្សន៍PNN តាំងពីថ្ងៃទី១៦ ខែ៩ ប៉ុន្តែមកទល់ពេលនេះនៅតែថតមិនទាន់ចប់ដោយសារតែ ឌុច លីដា អោយថ្ងៃថតតិចពេក។ លោកថាភាគច្រើនឌុច លីដា បើណាត់ម៉ោង៦គឺមកម៉ោង៨ ឬដល់ម៉ោង១០ ខណៈដែលក្នុងខ្លះនាងមកថតក៏សល់ចំហាយស្រវឹងពីយប់ហើយសុំសម្រាកសិនមុនថត។

លោកគាំ ចន្ធ បានពន្យល់ដែលនាំ ឌុច លីដា បង្ហោះសារជាធារណៈថា ដោយសារតែនាងទាក់ទងសុំបើកលុយលោកចំនួន៥០ភាគរយ នៅថ្ងៃទី១០ តុលា ដោយលោកកំណត់អោយនាងមកបើកនៅវេលាម៉ោង១០ព្រឹកក្នុងថ្ងៃនោះ ប៉ុន្តែរហូតម៉ោង៥ល្ងាចទើបនាងអោយគេមកទាក់ទងសុំបើកពីលោកក្នុងពេលដែលលោកក៏មានណាត់មិនអាចនៅចាំបើកលុយអោយនាងបាន។

លោកបានស្នើអោយអ្នកមកបើកលុយជំនួសអោយនាងលើកទៅបើកនៅព្រឹកថ្ងៃស្អែក(ថ្ងៃទី១១ តុលា)ម៉ោង១០ព្រឹកវិញ ដោយអ្នកទាក់ទងនោះក៏ឆ្លើយយល់ព្រម។ ប៉ុន្តែក្រោយពីការយល់ព្រមស្រាប់តែ ឌុច លីដា ឆាតមកមាក់ងាយលោកដោយថានាងសុំបើកលុយសម្ដែង ដោយមិនមែនទៅសុំលុយលោកទេ ទើបបណ្ដាលអោយនាង និងលោកផ្ទុះសម្ដីដាក់គ្នា។ លោកថាឆេះដុំកាន់តែខ្លាំង បន្ទាប់ពីឃើញ ឌុច លីដា បង្ហោះមាក់ងាយលោកនៅលើហ្វេសប៊ុក។

លោកបានបញ្ជាក់ថា ក្នុងកិច្ចកុងត្រាអត់មានកំណត់ថានាងថតបានប៉ុន្មានភាគបើកលុយប៉ុន្មានភាគរយទេ គឺនោះជាការចចាររវាងលោក និងនាងនាងសុទ្ធសាធតែបើមានគឺនាងត្រូវកំណត់មកថតអោយលោកអោយបានចប់ប៉ុណ្ណេះភាគប៉ុណ្ណោះភាគ និងកំណត់កាត់លុយជាដើមបើនាងមកយឺតចាប់ពី២ម៉ោងឡើងទៅ។ លោកថានាងយឺតគ្រប់លើក តែលោកអត់ដែលបានកាត់លុយនាងសូម្បីតែមួយដុល្លារនោះទេ ហើយបើទោះជានាងអោយថ្ងៃថតតិចក្នុងមួយសប្ដាហ៍ក៏លោកស៊ូទ្រាំ សុខចិត្តត្រូវមាត់ខាងPNN នោះដែរ ប៉ុន្តែសម្រាប់ឌុច លីដា វិញ គឺលោកចោទថាបើទារបើកលុយគឺលឿន តែបើពេលមកថតគឺពិបាក។ មកទល់ពេលនេះលោកអះអាងថា រឿង«ទូកបាត់ច្រវ៉ា»ទើបតែថតបានជាង២០ភាគប៉ុណ្ណោះ ក្នុងចំណោម៣០ភាគ ហើយលោកនឹងមានវិធានការចំពោះឌុច លីដា ផងដែរ ប្រសិនបើក្រោយផ្ទុះចម្រូងចម្រាស់ ស្រាប់តែឌុច លីដា មិនព្រមមកថតបញ្ចប់រឿងអោយលោកតាមការកំណត់ក្នុងកុងត្រា។

លោកប្រកាសកែប្រែខ្លឹមសារអោយតួឯកស្រីធ្វើស្លាប់កណ្ដាលទី តែលោកថាបើឈានដល់ដំណាក់កាលនោះ គឺ ឌុច លីដា នឹងឡើងបណ្ដឹងអោយសងផលិតកម្មលោកទាំងស្រុង។ លោកថានៅក្នុងពិភពសិល្បៈបើមានតារាសម្ដែងដូចឌុច លីដា ដែលធ្វើជាមួយលោកត្រឹមតែបួនប្រាំនាក់ គឺផលិតកម្មទាំងនោះនឹងបះជើងហើយដោយសារតែត្រូវខាតថ្ងៃថ្ងៃម៉ោង និងផលិតអោយគេមិនទាន់ហើយត្រូវគេអោយសងជាដើម។

ឆ្លើយតបនឹងការលើកឡើងរបស់លោកគាំ ចន្ធី ឌុច លីដា ធ្លាប់អះអាងថានាងពិបាកតែជាមួយផលិតករដែលមិនច្បាស់លាស់ការងារជាមួយនាងប៉ុណ្ណោះ ប៉ុន្តែសម្រាប់អ្នកច្បាស់លាស់រឿងលុយកាក់ ម៉ោងពេល និងការងារចុះថត គឺនាងក៏ច្បាស់លាស់ដូចគ្នាផងដែរ ដូចជាអ្នកស្រីពាន់ ភួងបុប្ផា ដែលនាងប្រកាសថាជាផលិតករច្បាស់លាស់ជាដើម។ លោកគាំ ចន្ធី និយាយថាលោកធ្វើការផលិតរឿងច្រើនឆ្នាំមកហើយ គឺម៉ោងពេល និងកាលបរិច្ឆេទលោកច្បាស់លាស់ក្នុងការផលិត តែទើបតែបានធ្វើការជាមួយឌុច លីដា ម្នាក់ប៉ុណ្ណោះ ដែលនាងក្រឡុកដល់ការផលិតរបស់លោករហូតធ្វើអោយលោកចង់រាងចាល៕