យោងតាមឯកសារបណ្ដឹងដែលបានទម្លាយចេញពីសាលាដំបូងរាជធានីភ្នំពេញបានអះអាងថា លោក អ៊ឹង សូឡាង ដែលម្ដាយរបស់នី មុន្នីនាថ ទើបតែអះអាងថានៅជាតែគូដណ្តឹងរបស់ នី មុន្នីនាថ បានដាក់បណ្ដឹងប្ដឹងនាងចំនួន១២ម៉ឺនដុល្លារ ដោយតុលាការបានចេញដីកាកោះហៅឲ្យនាងចូលទៅបំភ្លឺក្នុងពេលខាងមុខនោះផង។ បណ្ដឹងនេះត្រូវបានមេធាវីខាងប្រុសយកទៅដាក់សាលាដំបូងនៅភ្នំពេញកាលពីថ្ងៃទី ២៨ ខែ កញ្ញា ក្នុងឆ្នាំ២០១៧ កន្លងទៅ ដោយក្នុងពាក្យបណ្ដឹងគឺប្ដឹងនាងពីបទឆបោក និងរំលោភលើសេចក្ដីទុកចិត្ត ដោយបូកសរុបទាំងប្រាក់ដែលចោទថានាងឆបោក និងប្រាក់ជំងឺចិត្តផងគឺ១២ម៉ឺនដុល្លារ។

ពាក្យបណ្ដឹងដែលបានបែកធ្លាយនោះ គឺ លោក អ៊ឹង សូឡាង បានសរសេរថានី មុន្នីនាថ បានយកប្រាក់ដែលលោកផ្ដល់ឲ្យចំនួន៧ម៉ឺនដុល្លារ ដោយលោកទាមទារឲ្យនាងសងវិញជាដាច់ខាត និងតម្រូវឲ្យនាងបង់ជំងឺចិត្តឲ្យលោកចំនួន៥ម៉ឺនដុល្លារទៀត ដោយបន្ទុកលើការចំណាយក្នុងការប្ដឹងផ្ដល់ក៏លោកតម្រូវឲ្យនាងជាអ្នករ៉ាប់រង។ លោកក៏បានប្រកាសសុំឲ្យតុលាការអនុវត្តសាលក្រមជាបណ្ដោះអាសន្ន ទៅតាមមាត្រា ៩៤៥ មាត្រា ៩៤៦ នៃក្រមរដ្ឋប្បវេណី នៃព្រះរាជាណាចក្រកម្ពុជា ដើម្បីនាំខ្លួនតារាសម្ដែងនី មុន្នីនាថ មកដោះស្រាយនៅក្នុងរង្វង់ក្រចកតុលាការ។

យោងតាមព័ត៌មានដែលបានបែកធ្លាយ គឺអង្គហេតុដែលនាំឲ្យឈានដល់បណ្ដឹងនេះ គឺដោយសារតែ នី មុន្នីនាថ និងបុរសអណិកជនលោក អ៊ឹង សូឡាង បានរាប់អានស្រឡាញ់រហូតឈានដល់ភ្ជាប់ពាក្យ ហើយក្រោយមកលោកក៏បានចុះឡើងស្រុកខ្មែរ និងរត់ច្បាប់យកនាងដើម្បីឲ្យចេញទៅរស់នៅស្រុកអាមេរិកដែលទីកំណើតរបស់លោក។ ប៉ុន្តែត្រូវបានភាគីខាងលោកចោទថានាងមិនព្រមចេញទៅតាមការរត់ច្បាប់នោះទេ គឺបន្តពន្យារៗរហូតក្លាយជារឿងផ្ដាច់ពាក្យ។

យ៉ាងណាមិញ ម្ដាយរបស់នី មុន្នីនាថ រមែងប្រកាសថាកូនស្រី និងលោក សូឡាង មិនមានរឿងផ្ដាច់ពាក្យនោះទេ ដោយអ្នកស្រីបានចាត់ទុកថានោះជាពាក្យចចាមអារ៉ាមនោះផង។ ដោយឡែកសម្រាប់ នី មុន្នីនាថ វិញ មិនទាន់ក្លាហានក្នុងការបកស្រាយទេ ដោយនាងបញ្ជាក់ថាមិនទាន់ចង់និយាយថា នឹងថាបើរង់ចាំមើលរឿងរ៉ាវឈានដល់ដំណាក់កាលដែលត្រូវអស់ការអត់ធ្មត់ជាមុនសិន។ មកទល់ពេលនេះរឿងរ៉ាវបណ្ដឹងនេះត្រូវបានមហាជនចាប់អារម្មណ៍យ៉ាងខ្លាំងដោយសារតែមានការប្ដឹងដូចអ្វីដែលបានប្រកាសឡើងប្រកដមែន នៅសាលាដំបូងរាជធានីភ្នំពេញ៕

​