ជាយូរមកហើយតារាសម្ដែងកញ្ញា ដេនី ក្វាន់ រមែងប្រកាសថាកញ្ញាមិនទាន់មានស្នេហានោះទេ អ៊ីចឹងហើយទើបម្នាក់ៗ មានការភ្ញាក់ផ្អើលស្ទើរ ពេញបណ្ដាញហ្វេសប៊ុក បន្ទាប់ពីមានបុរសម្នាក់ដែលគេឃើញឧស្សាហ៍ជូននាងទៅណាមកណាផង ប្រកាសជាសាធារណ:តែម្ដងថា លោកគឺគូស្នេហ៍របស់នាង ហើយលោក និងនាងក៏កំពុងតែមានសេចក្ដីសុខនៅលើកោះមួយក្នុងខេត្តព្រះសីហនុ។

អ្នកលេងក្នុងសង្គមហ្វេសប៊ុកដែលស្និទ្ធិនឹងលោក បានទាំងបង្ហាញអារម្មណ៍អបអរ ដែលលោកសម្រេចចិត្តចេញមុខ ដែលហាក់ជាបានដឹងថាលោក និងតារាសម្ដែងដេនី ក្វាន់បានចាប់ចិត្តជាមួយគ្នាជាយូរមកហើយនោះផង។ នៅលើហ្វេសប៊ុកលោក ចាន់ មករា ដែលត្រូវគេស្គាល់ថា ជាអ្នកដឹកនាំថតស្ពតធំៗមួយចំនួន ដែលធ្លាប់ទាំងដឹកនាំថតស្ពតរបស់លោកព្រាប សុវត្ថិ កាលពីអតីតកាល និងជាម្ចាស់អាជីវកម្មលក់រថយន្តធំមួយ បានបង្ហាញរូបថតផ្អែមល្ហែម ជាមួយតារាសម្ដែងកញ្ញា ដេនី ក្វាន់ អមជាមួយសំណេរគួរឲ្យចាប់អារម្មណ៍ថា «សម្រាកការងារ! មកលំហែកាយជាមួយ My Honey នៅកោះឋានសួគ៌។ Holiday time to relax a Paradise Island with my honey!»។

ការបង្ហោះរបស់លោកមិនត្រឹមតែមានអ្នកចូលរួមបញ្ចេញមតិ ក្នុងន័យអបអរសាទរនោះទេ តែក៏មានអ្នកចែកចាយធ្វើឲ្យមានការចាប់អារម្មណ៍ មិនតិចនោះដែរ ដោយសារតែលោកបានក្លាយជាម្ចាស់បេះដូងរបស់ស្រីស្អាតនាងដេនី ក្វាន់ ដែលបុរសណាៗក៏ក្រឺតក្នាញ់នឹងសម្រស់។ ម្នាក់ៗភ្ញាក់ផ្អើលនឹងការបង្ហោះរបស់លោកមិនតិចនោះទេ ហើយលោកក៏បានឆ្លើយតបនឹងការចោទសួររបស់អ្នកគាំទ្រ ដោយបានបញ្ជាក់ថានោះដេនី ក្វាន់ គឺជាម្ចាស់បេះដូងរបស់លោក ដោយមិនមែនជាការសម្ដែង ឬការថតរូបបែបរ៉ូម៉ាទិកលេងៗនោះផងដែរ។ អ្នកគាំទ្រនៅលើហ្វេសប៊ុក សុទ្ធតែសរសើរថាលោកចាន់ មករា គឺជាបុរសសំណាងផុតលេខ ដែល កញ្ញា ដេនី ក្វាន់ យល់ព្រមទទួលជាស្នេហា ប៉ុន្តែអ្នកដែលស្គាល់លោកចាន់ មករា បានច្បាស់ ក៏បានសរសើរចំពោះតារាសម្ដែងកញ្ញា ដេនី ក្វាន់ ផងដែរ ដែលបានក្លាយខ្លួនជា តារាស្រីល្បីឈ្មោះ តែមិនឈ្លក់វង្វេងនឹងបុរសមានបុណ្យស័ក្ដសំបូរទ្រព្យស្ដុកស្ដម្ភ ហើយសុខចិត្តទទួលយកបុរសម្នាក់យ៉ាងសាមញ្ញ ដែលមិនភ័យពីរឿងក្ដៅក្រហាយថ្ងៃក្រោយ។

យ៉ាងណាមិញ កញ្ញា ដេនី ក្វាន់ មិនទាន់អាចសុំការបញ្ជាក់ជុំវិញការបង្ហោះ និងការបញ្ជាក់របស់លោកចាន់ មករា ជុំវិញថាកញ្ញា គឺជាគូស្នេហ៍របស់លោកនោះទេ ក្នុងពេលដែលនាងត្រូវបានគេដឹងថា បានចាកចេញទៅលេងនៅកោះឋានសួគ៌ពិបាកទំនាក់ទំនងសួរនាំ៕