គិតត្រឹមម៉ោងនេះ នៅមិនទាន់មានការចូលរួម ធ្វើពិធីបុណ្យសពរបស់លោកយាយ ចាន់ សុីផាន់ ដែលជាអតីតតារាសម្ដែងល្បីឈ្មោះ ក្នុងជំនាន់ អ្នកមនាង អម្ពរ ទេវី និងលោក ខៃ ប្រសិទ្ធិ ជាដើមនៅឡើយទេ បើទោះជាតារាសិល្បៈច្រើននាក់ សុទ្ធតែធ្លាប់សម្ដែង និងស្គាល់ស្នាដៃរបស់លោកយាយ។

លោកយាយបានទទួលមរណៈភាពក្នុងជន្មាយុ៩៣ ឆ្នាំ កាលពីល្ងាចថ្ងៃទី១១ វិច្ឆិកា ដោយមុនមរណភាពរបស់លោកយាយ គឺមានតារារួមសម្ដែងតិចណាស់ ដែលលោកយាយប្រាថ្នាចង់ជួបដោយផ្ទាល់ ចំណាយពេលទៅសួរសុខទុក្ខ លោកយាយដោយផ្ទាល់ៗ លោកយាយត្រូវបានទទួលមរណភាព ដោយសារជំងឺក្រពៈ និងជំងឺចាស់ច្រើនប្រភេទដែលញាំញុី។

លោកយាយបានទទួលមរណៈភាពនៅវេលាម៉ោង៤រសៀល នៅគេហដ្ឋានរបស់លោកយាយ ក្រោយស្ថានទូតចិន ដោយពិធីបុណ្យសពលោកយាយ ក៏កំពុងតម្កល់ធ្វើបុណ្យនៅទីនោះដែរ។

មរណៈភាពរបស់លោកយាយ ចាន់ សុីផាន់ គឺជាការបាត់បង់វីរះសិល្បៈករខ្មែរ ដែលមានវ័យចំណាស់ជាងគេនៅកម្ពុជា ហើយក៏ជាការសោកស្ដាយផងដែរ ចំពោះតារាសម្ដែងដែលធ្លាប់រួមសម្ដែងជាមួយលោកយាយ ដែលលោកយាយប្រកាសសុំឃើញមុខ ដោយផ្ទាល់នៅមុនដង្ហើមចុងក្រោយ ប៉ុន្តែចុងក្រោយ គឺមានតែតារាប៉ុន្មានរូបបំផុត ចំណាយពេលទៅជួប។

គួបញ្ជាក់ថា លោកយាយ ចាន់ សុីផាន់ បានចូលរួមសម្តែងជាមួយអ្នកសិល្បៈ ៣ជំនាន់ តាំងពីទស្សវត្សន៍ឆ្នាំ៦០ ៩០ និងរហូតដល់អំឡុងឆ្នាំ៩០ជាង៕