នៅក្នុងពិភពសិល្បៈគេស្គាល់តារាគ និងថ្លង់ លោក គង់ វណ្ណៈ មិនខុសពីតារាផ្សេងទៀតនោះទេ ដោយសារតែលោកត្រូវគេឃើញសម្ដែងក្នុងកុនជាយូរមកហើយ ជាពិសេសគឺតួវាយតប់ ជាតួក្រុមចោរ និងតួអ្នកភូមិជាដើម ដែលភាគច្រើនជាតួមិនមានប៉ារ៉ូលនិយាយនោះ។ លោកត្រូវគេស្គាល់កាន់តែខ្លាំងក្នុងភាពយន្ដដុំរឿង«មនុស្សឆ្កួត» ដែលបានជោគជ័យនៅក្នុងរោងកុន និងរឿង«គ្រាប់បាល់អង្រួនបេះដូង!» ដែលជារឿងភាគទើបនឹងដាក់បញ្ចាំងនៅលើកញ្ចក់ទូរទស្សន៍CTN នៅប៉ុន្មានថ្ងៃនេះ ដោយសារតែលោកបានសម្ដែងច្រើនប្លង់ និងត្រូវគេអោយសម្ដែង ជាតួអង្គមនុស្សគ និងថ្លង់ ដូចគ្នានឹងសភាពខាងក្រៅរបស់លោកផង។

លោក លៀក លីណា អ្នកគ្រប់គ្រងការផលិតមួយរូបប្រចាំផលិតកម្ម LD បានថ្លែងប្រាប់ថា លោក គង់ វណ្ណៈ គឺជាមនុស្សគ និងថ្លង់នោះទេ ប៉ុន្តែលោកមានចំណូលចិត្តផ្នែកសម្ដែង និងមានបទពិសោធន៍ខាងផ្នែកសម្ដែងជាយូរមកហើយ ទើបខាងផលិតកម្មLD សម្រេចជ្រើសជាតួប្រចាំរបស់ផលិតកម្ម ដោយអោយសម្ដែងជាលក្ខណៈស៊ីប្រាក់ខែតែម្ដង។ លោកថាលោកគង់ វណ្ណៈ វ័យ៣៥ឆ្នាំ គឺជាអ្នកបាត់ដំបង ដែលខាងផលិតកម្មបានផ្ដល់កន្លែងអោយស្នាក់នៅ និងអោយការងារមួយចំនួនផ្សេងទៀត បន្ថែមពីការសម្ដែង ទើបមួយរយៈចុងក្រោយតារាសម្ដែងគថ្លង់ម្នាក់នេះ មិនខុសពីតារាសម្ដែងកុងត្រារបស់ផលិតកម្មដែលមានការសម្ដែងរាប់មិនអស់។

លោកថា លោកគង់ វណ្ណៈ លុះត្រាតែធ្វើកាយវិការទើបអាចស្ដាប់យល់ ប៉ុន្តែសម្រាប់ការសម្ដែងគឺអោយតែសម្ដែងអ្វីអោយលោកឃើញមុន គឺតារាម្នាក់នេះនឹងសម្ដែងបានដូចតូទូទៅ។ លោកថាលោកគង់ វណ្ណៈ ជាតារាមានការតស៊ូ ហើយនៅពេលដាក់ប្លង់លោកអោយសម្ដែងបានច្រើន គឺមិនខុសពីប្លង់កំប្លុកកំប្លែងទៅវិញ ដោយសារតែការសម្ដែងកាយវិកា គឺគ្រាន់តែអ្នកទស្សនាបានឃើញក៏អស់សំណើច។

លោកប្រកាសជំហរយកតារាគថ្លង់ម្នាក់នេះសម្ដែងក្នុងភាពយន្តរបស់ខ្លួន មិនមានកំណត់ពេលវេលានោះទេ ដើម្បីអោយលោកមានលទ្ធភាពរកប្រាក់ផ្គង់ផ្គង់តម្រូវការរបស់ខ្លួន ខណៈដែលតម្លៃខ្លួន ក៏លោកទទួលបានដូចគ្នានឹងតារាទូទៅ ដោយលោកស្គាល់លុយ និងដឹងពីចំនួននៃការទទួលរបស់ខ្លួនរបស់យ៉ាងច្បាស់លាស់។

ខាងក្រោមនេះ ជាការសម្ដែងផ្ទាល់មួយ ដែលលោកគង់ វណ្ណៈ បានសម្ដែងអោយមើល ក្នុងពេលសម្ដែងពីទេពកោសលល្យ៖

https://youtu.be/v-UDnL4Ujik