ផ្ទះ ព័ត៌មានបច្ចេកវិទ្យា សិស្សសាលា Sta...

សិស្សសាលា Stanford តវ៉ាមុខហាង Apple ប្រឆាំងការញៀន iPhone

0

និស្សិតនៃសកលវិទ្យាល័យ Stanford រដ្ឋ California សហរដ្ឋអាមេរិក មួយក្រុម កាលពីសប្តាហ៍មុននេះ បានប្រមូលផ្តុំគ្នានៅមុខអគារ Apple Store មួយកន្លែង នាទីក្រុង Palo Alto ដើម្បីតវ៉ាប្រឆាំងនឹងការផលិតចេញទូរសព្ទ iPhone ដែលនាំឱ្យមនុស្សម្នាវក់នឹងការប្រើប្រាស់វា។

យុវនិស្សិតមួយក្រុមដែលបានតាំងឈ្មោះឱ្យក្រុមខ្លួនថា Stanford Students Against Addictive Devices ឬហៅកាត់ថា SSAAD បានស្តីបន្ទោសក្រុមហ៊ុន Apple ដែលមិនបានចាត់វិធានការទប់ស្កាត់អ្នកប្រើប្រាស់ពីការឆែកទូរសព្ទដៃ iPhone និងថេប្លេត iPad របស់ពួកគេមិនឈប់ឈរ។

ក្រុមនិសិ្សតទាំងនោះ បានលើកបាដានៅពីមុខហាងលក់ផលិតផល Apple នោះ ដោយទាមទារឱ្យក្រុមហ៊ុនបច្ចេកវិទ្យាយក្សនៃប្រទេសខ្លួន រិះរកមធ្យោបាយបញ្ឈប់អ្នកមាន iPhone ប្រើក្នុងដៃ លែងវក់វីតែលើអេក្រង់ទូរសព្ទរបស់ពួកគេ។​

និស្សិតឆ្នាំទី៤ ម្នាក់ឈ្មោះ Sanjay Kannan បានបង្ហាញលទ្ធផលស្ទាប់ស្ទង់មតិនៅឆ្នាំ ២០១៦ ដែលរៀបចំឡើងដោយប្រព័ន្ធផ្សព្វផ្សាយ Common Sense Media ដែលរកឃើញថា យុវជន ៥០% ញៀននឹងទូរសព្ទដៃរបស់ពួកគេ ខណ:​ឱពុក​ម្តាយ ៦៩% តែងតែឆែកទូរសព្ទរបស់ខ្លួនជារៀងរាល់ម៉ោង។

ក្រុម SSAAD បានស្នើទៅ Apple ដាក់បញ្ចូលនូវកម្មវិធីលើ iPhone មួយ ដែល​អាចតាមដានការប្រើប្រាស់ទូរសព្ទ និងរាយការណ៍លម្អិតពីលំនាំនៃការប្រើប្រាស់ផ្សេងៗរបស់អ្នកប្រើប្រាស់។

បច្ចុប្បន្ន ម្ចាស់ទូរសព្ទ iPhone អាចត្រឹមតែតាមដានរយ:ពេលដែលពួកគេប្រើប្រាស់កម្មវិធីនីមួយៗគិតជាភាគរយ ដូចជាភាគរយនៃការប្រើប្រាស់ថាមពលថ្ម​សរុបរយ:ពេល ២៤ ម៉ោងក្នុងមួយសប្តាហ៍។

កាលពីខែមករា Apple បាននិយាយថា ខ្លួនកំពុងរកមើលនូវវិធីសាស្រ្តដើម្បីផ្តល់នូវ​បទពិសោធន៍កាន់តែប្រសើរទៅដល់អតិថិជនខ្លួន។ ក្រុមហ៊ុនមានមុខងារ និងកំណែកម្មវិធីថ្មីៗមួយចំនួនដែលបានគ្រោងឡើងសម្រាប់ថ្ងៃអនាគត ហើយខ្លួនគិ​ត​​យ៉ាងល្អិតល្អន់អំពីថាតើអតិថិជនប្រើផលិតផលរបស់ខ្លួនតាមរបៀបណា ហើយ​​តើពួកគេ និងមនុស្សនៅជុំវិញមានរងផលប៉ះពាល់ពីផលិតផលរបស់ខ្លួនដែរ​ឬក៏​អត់​៕

ប្រភពព័ត៌មាន: AppleInsider

មតិយោបល់