មិនដឹងលោកហេរ៉ូ និងម្ចាស់បុរី NR VIP លោកវន វណ្ណ: មានទំនាក់ទំនងគ្នាតាំងពីពេលណានោះទេ ប៉ុន្តែអ្វីដែលគេកត់សម្គាល់ គឺលោកបានគៀងអ្នកជំនួញរូបនេះ យកលុយមកបរិច្ចាគជូនគន្ធបុប្ផាតែម្ដង បន្ទាប់ពីលោកទើបតែចុះពីលើយន្តហោះមកពីប្រទេសសិង្ហបុរី ហើយត្រូវបានពិធីការិនីកញ្ញា ឌួង ហ្សូរីដា ដែលបានយកលុយមកប្រគល់ជូនគន្ធបុប្ផាចំនួន៥លានរៀល បបួលឲ្យជូនលុយជាមួយ។

លោកបានមិនត្រឹមតែមកធ្វើជាអ្នកជួយប្រគល់លុយឲ្យកញ្ញាប៉ុណ្ណោះទេ ប៉ុន្តែលោកបានទាំងគៀងលោក វន វណ្ណ: ដោយអះអាងថាជាបងធម៌ ឲ្យយកលុយមកបំពេញបន្ថែមរហូតដល់១១លានរៀលដោយឥតព្រៀងទុក។

លោក ហេរ៉ូ និយាយថាបន្ទាប់ពីពិធីការិនី កញ្ញា ឌួង ហ្សូរីដា ហៅឲ្យមកជួយប្រគល់លុយគ្រាន់បានជាគ្នា លោកក៏នឹងឃើញថាគួរតែមានគៀរគរសប្បុរសជនណាម្នាក់ឲ្យបន្ថែមថវិកាឲ្យបានកាន់តែច្រើនទើបល្អ ដោយលោកនឹកដល់បងធម៌ គឺលោក វន វណ្ណ: ដែលជាម្ចាស់បុរី NR VIP តែម្ដង ដោយសារតែអ្នកជំនួញម្នាក់នោះចូលចិត្តធ្វើបុណ្យ។ លោកថាកាន់តែសប្បាយចិត្តទៅទៀត គឺនៅពេលដែលលោកអញ្ជើញដោយគ្មានការព្រាងទុកសោះស្រាប់តែបងធម៌របស់ខ្លួន សម្រេចចិត្តមកចូលរួម ហើយបានប្រកាសប្រគល់ថវិកាផ្ទាល់ខ្លួនចំនួន៦លានរៀល យកមកបំពេញបន្ថែមពីលើថវិការបស់ឌួង ហ្សូរីដា។ លោកថារវាងខ្លួន និងលោកវន វណ្ណ: រាប់គ្នាជាបងប្អូនធម៌ជាយូរមកហើយ ទើបលោកហ៊ានគៀងមកកាន់មន្ទីរពេទ្យគន្ធបុប្ផា ដោយសារតែបានដឹងមុនថាឲ្យតែលោកបានមកចូលរួម គឺពិតជាបានថវិកាបំពេញបន្ថែម ដើម្បីបានជួយសង្គម។ យ៉ាងណាលោកថា នេះមិនមែនជាលើកទី១ទេ ដែលលោកបានគៀងបងធម៌ ឲ្យមកធ្វើបុណ្យ និងជួយសង្គម ដោយគ្រាន់តែការប្រគល់ថវិកាជួយដល់គន្ធបុប្ផារបស់បងធម៌លើកនេះ គឺជារឿងចៃដន្យបន្ទាប់ពីលោកទើបចុះមកពីសិង្ហបុរី ហើយគ្រាន់តែបបួលលេងៗ ស្រាប់តែលោកចូលរួម។

លោក ហេរ៉ូ និយាយថា លោកមិនមែនជាអ្នកមាន និងជាអ្នកសំបូរទ្រព្យនោះទេ ប៉ុន្តែសម្រាប់ការងារសង្គមលោកបានជួយច្រើន តាមរយ:គៀងគរអ្នកសប្បុរសធម៌ ដែលលោករាប់អានឲ្យបរិច្ចាគលុយ តួយ៉ាងដូចជាលោកបានបបួលបងធម៌ដែលជាម្ចាស់បុរីល្បីឈ្មោះមួយ មកជួយប្រគល់ជូនគន្ធបុប្ផានាពេលនេះ។ ក្នុងនោះលោក និងបងធម៌ ក៏មានគម្រោងធ្វើសកម្មភាពសប្បុរសធម៌ជាមួយមន្ទីរពេទ្យគន្ធបុប្ផាក្នុងពេលបន្តបន្ទាប់ផងដែរ ដោយតាមគម្រោង លោក វន វណ្ណ: នឹងយកម៉ាស៊ីនចម្រោះទឹកស្អាត៣គ្រឿងយកមកប្រគល់ជូនមន្ទីរពេទ្យគន្ធបុប្ផាក្នុងពេលឆាប់ៗ ដើម្បីឲ្យបងប្អូនជាអ្នកយកកូនមកព្យាបាលនៅក្នុងមន្ទីរពេទ្យមានទឹកស្អាតគ្រប់គ្រាន់ទទួលទាន។ លោកថាខ្លួនជាមនុស្សចូលចិត្តធ្វើបុណ្យ ហើយក្នុងចំណោមអ្នករាប់អានលោកភាគច្រើន ក៏មានអ្នកចូលចិត្តធ្វើបុណ្យដូចខ្លួនច្រើននាក់ផងដែរ ទើបលោកឧស្សាហ៍លេចមុខនៅក្នុងសកម្មភាពចែកអំណោយផ្សេងៗមិនសូវខាន៕