ភ្នំពេញៈ វាហាក់ដូចជារឿងកម្រខ្លាំងណាស់ ដែលតារាសម្តែងជើងចាស់ដ៏ល្បីល្បាញ លោក ហម ឈរ៉ា បង្ហាញមុខភរិយារបស់ខ្លួននោះ ប៉ុន្តែបំបែកនូវភាពកម្រនេះ លោកក៏បានបង្ហោះរូបថតជាមួយនឹងភរិយា ជាផ្លូវការនៅលើគណនីហ្វេសប៊ុក របស់ខ្លួន នៅរសៀលថ្ងៃទី៦ ខែកក្កដា ឆ្នាំ២០១៦។

លោក ហម ឈរ៉ា បានសរសេរនៅលើហ្វេសប៊ុកខ្លួនថា ជំរាបសួរបងប្អូន នេះមិនមែនជាភាពអំនួត តែវាជាមោទនភាពសំរាប់យើងដែលជាឪពុក ម្តាយ គ្រប់រូបដែលចង់បាននឹងចង់ឃើញលទ្ធផលបែបនេះ ស្តែងចេញពីការខិតខំរបស់គាត់កន្លងមកតាំងពីចំណាត់ថ្នាក់លេខបី បីឆ្នាំជាប់ៗគ្នាមក។ឆ្នាំនេះគាត់ធ្វើបានសំរេចដោយមានការជំរុញលើកទឹកចិត្តបង្ហាត់បង្រៀនពីអ្នកម្តាយរបស់គេនឹងពីលោកគ្រូអ្នកគ្រូ។(ពុកក៏មានចំណែកដែរតើកូនស្រី) ។ អរគុណនឹងសុំការអធ្យាស្រ័យពីបងប្អូនផងបាទ ។

ការបង្ហាញមុខភរិយា និងកូនស្រី នៅលើហ្វេសប៊ុកជាលើកដំបូង និងជាសកម្មភាពដ៏កម្រ ម្លោះហើយប្រភពព័ត៌មានក្នុងចង្កោមអ្នកសិល្បៈម្នាក់ សូមមិនបញ្ចេញឈ្មោះ បានធ្វើការអះអាងប្រាប់ Post News ថា នេះគឺជាសកម្មភាពដ៏កម្រ របស់ លោក ហម ឈរ៉ា ដោយកន្លងមក លោកនឹងភរិយា ឈ្មោះ កែវ ផល្លីណេត មិនដែលបង្ហោះរូបរួមគ្នាឡើយ ។

ដើម្បីបញ្ជាក់ លើចំណុចនេះដែរ ខាង Post News បានខលទៅកាន់លោកក្នុងរសៀលថ្ងៃដដែល ប៉ុន្តែខលចូល គ្មានអ្នកលើកទទួលនោះទេ៕