គ្មានអ្នកមិនស្គាល់ផលិតករល្បីឈ្មោះ ​លោក គួច ខេវិន នោះទេ ដោយសារតែលោក គឺជាអ្នកផលិតកម្មវិធីទូរទស្សន៍ជាន់ខ្ពស់ និងជាស្ថាបនិក «ក្លឹបសម្រាប់មិត្តសិល្បៈ និងសង្គម» ដែលបានជ្រោមជ្រែងតារាល្បីៗភាគច្រើន អោយបានខ្ទរខ្ទារកេរ្តិ៍ឈ្មោះ។ អុីចឹង ទើបកាន់តែមានការចាប់អារម្មណ៍ ថែមទៀត នៅពេលដែលលោកបោះសម្ដីជាច្រើនម៉ាត់ គួរអោយចាប់អារម្មណ៍ ក្នុងពេលដែលលោកស្ថិតនៅសហរដ្ឋអាមេរិក នាពេលនេះ។

​លោកគួច ខេវិន បានបង្ហោះសារ ភ្ជាប់ជាមួយរូបភាពនៅលើទឹកដីអាមេរិក កាលពីពេលថ្មីៗនេះថា «ដែនដីខ្មែរប្រែថា សុវណ្ណភូមិ គឺជាទឹកដីមាស»។ ក្នុងរូបនេះ ខ្ញុំកំពុងស្ថិតនៅកោះហាវ៉ៃ (Hawaii) របស់សហរដ្ឋអាមេរិក ដ៏ស្រស់ស្អាតតែវាគ្មានអ្វីដែលអស្ចារ្យនោះទេ ប៉ុន្ដែវាជាមហាអស្ចារ្យត្រង់ថា ជនជាតិអាមេរិកគេចេះថែររក្សារការពារ និងអភិរក្ស រួមទាំងអភិវឌ្ឍន៍ដោយនិរន្ដរភាព។ ជនជាតិអាមេរិក ក៏ជាមនុស្សខ្មែរ ក៏ជាមនុស្ស! កោះ និង ឆ្នេរសមុទ្រខ្មែរក៏ល្អ ហើយស្រស់ស្អាតមិនចាញ់ កោះហាវ៉ៃនោះទេ ប៉ុន្ដែហេតុអីបានជាខ្មែរយើងមួយចំនួន បណ្ដែតបណ្ដោយឲ្យទឹកដីមាស ក្លាយជាទឹកដីអាចម៍អំបិល? បើទោះជារាជរដ្ឋាភិបាល ខិតខំស្ដារមាតុភូមិ ឲ្យចេញផុតពីភ្នក់ភ្លើងសង្រ្គាម និងជំរុញការអភិវឌ្ឍន៍ជាង៣០ឆ្នាំទៅហើយនោះ? ខ្មែរអើយ ពូជអ្នក គឺជាពូជអ្នក កសាងប្រាង្គប្រាសាទអង្គរ ដ៏មហាអច្ឆរិយៈ សូមអ្នកកុំធ្វើឲ្យខូចឈ្មោះពូជពង្សរបស់អ្នក ដោយសារតែជនអគតិ មួយចំនួននោះឲ្យសោះ!។ «ខ្មែរ» ត្រូវតែតាំងចិត្តឲ្យមាំខិតខំប្រឹងវិញ ជួយលើកតម្កើងតម្លៃនៃជាតិខ្មែរ យើងឲ្យបានរុងរឿង តាមសាវតា ដូចន័យក្នុងបទ «ព្រះរាជពង្សសាវតាខ្មែរ»។

សារប៉ុន្មានម៉ាត់របស់លោក ត្រូវគេមើលឃើញថា មានខ្លឹមសារពញាក់ស្មារតី កូនខ្មែរ ដែលមិនចេះអោយតម្លៃតំបន់ទេសចរណ៍របស់ខ្មែរ អោយភ្ញាក់ខ្លួនព្រឺត ជាពិសេសចំពោះអ្នក ដែលបានរួមចំណែកធ្វើអោយកខ្វក់ និងរួមចំណែកបំផ្លាញបរិស្ថាន ដែលលោកចង់សំដៅថា បើទោះជារដ្ឋាភិបាលចេញច្បាប់ និងមានវិធានការយ៉ាងណា ក៍មិនអាចទប់ជាប់។ លោកទទូចអោយកូនខ្មែរ រួមគ្នាផ្សព្វផ្សាយ និងថែរក្សាតំបន់ទេសចរណ៍អោយបានល្អ ដើម្បីរួមចំណែកជួយដល់សង្គម។ លោកបានបន្តថា ​ក្រោយត្រឡប់ពីសហរដ្ឋអាមេរិកវិញ លោកនឹងត្រៀមរៀបចំផលិតកម្មវិធីទូរទស្សនន៍ថ្មីៗ សម្រាប់ឆ្នាំ២០១៩ ខណៈដែលលោក ក៏នឹងធ្វើសកម្មភាពសប្បុសធម៍តាមរយៈ «ក្លឹបសម្រាប់មិត្តសិល្បៈនិងសង្គម» អោយកាន់តែសកម្មភាព ដើម្បីជាប្រយោជន៍ដល់សង្គម៕