ភ្នំពេញៈ តារាសម្តែងកំពុងពេញនិយម លោក ផប់ ឃីស បានអះអាងប្រាប់ Post News ថា លោកបានសម្រេចបំណង ក៏ដូចជាខសន្យា ជាមួយនឹង លោក សាន ផានិត ដែលបានជំពាក់សម្តីគ្នា កាលពី ៤ ទៅ ៥ ឆ្នាំមុននោះ ។

បើទោះបីជាកន្លងមក លោក ផប់ ឃីស បានប្រកាសថា ចង់បោះបង់ពីពិភពសិល្បៈ ព្រោះតែមានផលលំបាកស្មុគស្មាញ ដោយសារតែចំណង់ចំណូលចូលចិត្តលេងស្តាយ៍ប្លែកៗ តែលេងៗយូរៗ ទៅដូចអស់ ដោយគ្មានអ្វីថ្មី ចឹងត្រូវតែផ្អាក ដើម្បីរកអ្វី ដែលថ្មី ទាំងស្តាយ៍ និងអារម្មណ៍ ដើម្បីវាយលុកក្នុងពិភពសិល្បៈវិញ ។

ក៏ប៉ុន្តែក្រោយ ការលើកទឹកចិត្តពីអ្នកលេងភ្លេង ឈ្មោះ បូទី ជួយធ្វើភ្លេង ខណៈដែលលោក ធ្វើទំនុកច្រៀង បែកស្លុយ ដើម្បីយកទៅរាំ ជាមួយនឹងមិត្តភក្តិនៅបន្ទាយមានជ័យ ក្នុងឱកាសបុណ្យចូលឆ្នាំ។ ការឆ្លៀតសរសេរទំនុកច្រៀងនេះ លោកក៏បានបញ្ជាក់ថា ដោយឃើញ បងៗក្នុងពិភពសិល្បៈ បង្ហោះបទខ្លួនឯង ក៏សាកសរសេរតែម្តងទៅ និងឆ្លៀត ឲ្យអ្នកនិពន្ធ ខាងលើ ជួយ។ ទន្ទឹមជាមួយនឹងមិត្តភក្តិ ក្នុងសិល្បៈ ក៏បានលើកទឹកចិត្ត កុំឲ្យបោះបង់ ព្រោះសមត្ថភាពនៅមាន ចឹងធ្វើរួមគ្នា ហើយក៏នៅតែបន្ត នៅពេលដែលទទួលបានការលើកទឹកចិត្តយ៉ាងដូច្នោះ។
ប្រឡូកក្នុងវិស័យសិល្បៈ ជាថ្មី ផប់ ឃីស បានបង្ហាញសមត្ថភាពជាច្រើន តាមរយៈខ្សែភាពយន្ត និង ចម្រៀងកាយវិការ ដែលធ្វើឲ្យកេរ្តិ៍ឈ្មោះ តារារូបនេះស្ទុះឡើងវិញ រហូតត្រូវបាន តារាជើងចាស់ម្នាក់ ហៅថត ទៀតផង។

គេថាពាក្យសន្យា គឺសន្យា បើសន្យាហើយគឺត្រូវតែធ្វើ ។ ជាក់ស្តែង តារាចម្រៀង សាន ផានិត បានបំពេញនូវសន្យា របស់ខ្លួន ជាមួយនឹង លោក ផប់ ឃីស ដែលជាតារាសម្តែងកំពុងច្បាមប្រជាប្រិយភាពពីទស្សនិកជន ដោយ យកតារារូបនេះ មកសម្តែងរួមគ្នា តាមរយៈបទ «ផ្កាយព្រះអង្គារ» និងបទ «គ្មានសិទ្ធ» ដែលថតនៅលើទឹកដីមណ្ឌលគិរី។
លោក ផប់ ឃីស ថា «សម្រាប់បង សាន ផានិត គឺជា idol ខ្ញុំ ជាង២០ឆ្នាំហើយ ជំនាន់បទ ទូរស័ព្ទប្រាប់ផង បទ ជាប់រវល់ បទធូលីផ្តាច់ស្នេហ៍ និងបទមនុស្សដំបូង ដែលខ្ញុំជា Fan គាត់តាំងពីខ្ញុំមិនទាន់ចូលសិល្បៈ ហើយក៏ខ្ញុំស្រម៉ៃចង់សម្តែងក្នុងបទគាត់ នៅពេលឃើញគាត់សម្តែងក្នុងទូរទស្សន៍ »។
តារាសម្តែងខាងលើ បានបន្ថែមថា «នៅពេលដែលខ្ញុំជួបគាត់ កាលពី ៤ ទៅ៥ឆ្នាំមុន ដោយបងផានិត គាត់ថាចូលចិត្តត្រេមុខ ស្តាយ៍ និងទេពកោសល្យរបស់ខ្ញុំ ចឹងគាត់ថា នៅថ្ងៃណាមួយគាត់មានឱកាសចូលជាមួយនឹងសិល្បៈវិញ គាត់មានលទ្ធភាពធ្វើបទខ្លួនឯង គាត់នឹងទាក់ទងមកខ្ញុំ ដើម្បីហៅខ្ញុំថត ជាមួយគាត់ »។
ដោយសារតែលោក សាន ផានិត ជា idol របស់ ផប់ ឃីស និងឃើញ ម្ចាស់បទ ទូរស័ព្ទប្រាប់ផង មានឆន្ទះខ្ពស់ នៅលើវិថីសិល្បៈ ចឹងហើយក៏បានពោលពាក្យសន្យា ជាមួយគ្នា។
ផប់ ឃីស បានបន្ថែមទៀតថា «ខ្ញុំមិននឹកស្មានថា ការសន្យា ៥ឆ្នាំមុន អាចធ្វើបាននៅថ្ងៃនេះ តាមរយៈបទ Original Song របស់គាត់ »៕