ខុសពីតារាស្រករក្រោយភាគច្រើន ដែលត្រូវតែលតោលក្នុងមាគា៍សិល្បៈយ៉ាងហោចមួយខ្យល់សិន ទើបមានទ្រនំជ្រកកោន តែសម្រាប់តារាវ័យ ១៦ឆ្នាំ កញ្ញា ដួងច័ន្ទ មរកត ដែលសព្វថ្ងៃជាសិស្ស នៅសាលារៀន AIS អន្តទ្វីបអាមេរិចកាំងនៅឡើយ បែរជាមានឱកាសចូលជ្រកនៅក្នុងផលិតកម្ម N Production ក្នុងជំហានដំបូង សម្រាប់ការហក់ចូលសិល្បៈតែម្ដង។ ក្រោយពីមានបទចម្រៀង២បទ ជារបស់ផ្ទាល់ខ្លួន កញ្ញា ក៏ត្រូវគេឃើញលេចមុខលេខមាត់គួរសម លើឆាកតន្ត្រីនជាពិសេស នៅក្នុងកម្មវិធីសប្បុរសធម៍នាពេលចុងក្រោយ។

នៅក្នុងផលិតកម្ម N Priduction កញ្ញាដួងច័ន្ទ រមកត ត្រូវគេកត់សម្គាល់ថា គឺជាតារាចម្រៀងពន្លកថ្មី មានសមត្ថភាពទេពកោសល្យ និងរូបសម្បត្តិ គួរអោយចាប់អារម្មណ៍។ ទាំងស្អាត ទាំងរួសរាយ និង ទឹកដមសំទ្បេង នាងគឺជាតារាដែលមានឱកាសឡើងឆាកជាងតារារួមក្រុម ទើបធ្វើអោយតារាស្រី ដែលមានស្រុកកំណើត នៅខេត្តត្បូងឃ្មុំរួបនេះ លេចធ្លោគួរសមក្រោយចូលសិល្បៈ។ បទចម្រៀង Original song ២បទរបស់នាង រួមមានបទ “ទឹកចិត្តអ្នកសិល្បៈ” និងបទ”ឈប់ខ្វល់ពីអ្នកណា” ដែលនាងបកស្រាយ ជាមួយតារាចម្រៀង កញ្ញា ដួងច័ន្ទ ដាណែត ជាបងស្រីបង្កើត សុទ្ធតែជួយអោយនាង ទទួលបានការគាំទ្រក្នុងវិស័យចម្រៀង។

ប្រភពពីផលិតកម្ម N Production បង្ហើបថា ដួងច័ន្ទ មរកត គឺជាគ្រាប់ពេជ្រថ្មីរបស់ផលិតកម្ម ដែលក្រុមហ៑ុន នឹងបណ្ដុះអោយក្លាយជាតារាលេចធ្លោម្នាក់។ ផលិតកម្មបង្ហើបថា ក្រុមហ៑ុន នឹងសម្រិតសម្រាំងបទល្អៗ អោយនាងច្រៀងអោយបានច្រើន ដើម្បីជួយជំរុញអោយនាងកាន់តែមានទីផ្សារ។ នាងក៏ត្រូវគេកោតសរសើរថា គឺជាតារាចម្រៀងជំនាន់ថ្មី ដែលមានទឹកដមសម្លេងពិរោះរណ្តំ ហើយអាចច្រៀងបត់បែនបានទាំងបទមរតកដើម បទសម័យបែបមនោសញ្ចេតនា និងបទញាក់កន្ត្រាក់ អារម្មណ៍ផងដែរ។ ផលិតកម្ម N Production ប្រកាសថា នាងនឹងត្រូវបណ្ដុះអោយក្លាយជាតារាវ័យក្មេង ដែលមានក្បាច់រាំរស់រវើក ដើម្បីទាក់ទាញទីផ្សារ។

កញ្ញា ដួងច័ន្ទ មរកត ដែលទើបបង្ហាញខ្លួន ក្នុងការប្រគំតន្ត្រីសប្បុរធម៍នៅផ្សារដំណាក់ធំ បានអះអាងថា ទោះជានាងក្លាយជាតារាមានឈ្មោះ បោះសំទ្បេងក្នុងពេលខាងមុខ តែនាងប្រកាន់ជំហរ មិនហើរចោលផលិតកម្មនេះទេ ដើម្បីជាការតបស្នងផលិតកម្ម N Production ដែលកាន់ដៃនាង អោយនាងបានក្លាយជាតារាសិល្បៈ ក្នុងពេលនាងមិនទាន់មានឈ្មោះ៕