បរិបទចុងក្រោយ គេកត់សម្គាល់ថា សម្អាងការនៅក្នុងប្រទេសកម្ពុជា កាន់តែប្រកួតប្រជែងម៉ូដគ្នា រំលេចឈុតប្លែកៗ ចម្លងតាមប្រទេសក្បែរខាង ដោយឈុតមួយចំនួន ជាឈុតទិញស្រាប់របស់ប្រទេសជិតខាង ដោយធ្វើឲ្យគេ បារម្ភពីការចុះខ្សោយ នៃទម្រង់ខ្មែរក្នុងវិស័យសម្អាងផង។ អុីចឹងហើយ ទើបអ្នកឯកទេសខាងផ្នែកតែងសម្អាងឲ្យត្រូវទម្រង់ខ្មែរមួយរូប ប្រកាសជា សាធារណ:ថា ខ្លួននឹងផ្ទេរចំណេះជំនាញ ពីការតែងសម្អាងឲ្យត្រូវទម្រង់នោះ ទៅឲ្យអ្នកជំនាន់ក្រោយដោយគ្មានលក្ខណ្ឌ ដើម្បីកុំឲ្យបាត់បង់ការយល់ដឹង។

លោក ហេងឡុង ម្ចាស់សម្អាងការហេងឡុងហ្គោល នៅបណ្ដោយផ្លូវជាតិលេខ៦អា ទល់មុខផ្សារព្រែកលាភ ដែលត្រូវគេស្គាល់ថា ជាអ្នកឯកទេសផ្នែកតែងសម្អាង ត្រូវទម្រង់បែបខ្មែរបានល្អ បានអះអាងកាលពីថ្ងៃទី៥ កញ្ញា ឆ្នាំ២០១៩ ក្នុងពិធីសម្ពោធហាងថ្មី អមជាមួយការផ្លាស់ឈ្មោះ ពីសម្អាងការហេងឡុង មកជាហេងឡុងហ្គោលថា ឯកទេសតែងសម្អាងរបស់លោក ស្ទាត់ជំនាញប្រមាណ២០ឆ្នាំមកហើយ ដោយជំនាញដែលយល់ដឹង មិនមែនចេះតាមគ្នានោះទេ ពោលគឺទទួលការហាត់រៀនច្បាស់លាស់ ពីគ្រូៗនៅក្រសួងវប្បធម៌ និងការសិក្សាស្រាវជ្រាវ។

លោកថា ខ្លួនស្គាល់សំលៀកបំពាក់ទម្រង់ខ្មែរ ស្គាល់ក្បាច់ខ្មែរ តាំងពីក្លាយ ជាម្ចាស់សម្អាង ខណ:ដែលលោក ក៏បានប្រើជំនាញឌីហ្សាញ ជាសំលៀកបំពាក់កូនក្រមុំ កុម្ម៉ង់ជាក្បិន ជាឈៀង ជាខ្សែក្រវាត់ បានជាច្រើនម៉ូដ ក្នុងរចនាបទខ្មែរ ដោយមិនខ្វល់ពីការចំណាយដើមទុនខ្ពស់ ដើម្បីបន្សល់ទុកស្នាដៃ។

យ៉ាងណាមិញលោកថា ខ្លួនមិនអាចប្រើតែទម្រង់ខ្មែរសុទ្ធ ដើម្បីឈរជើង ក្នុងអាជីពសម្អាងការបានទេ គឺត្រូវតែមានឈុតបែបប្រទេសជិតខាង និងឈុតច្នៃបំពេញ តម្រូវការផងដែរ។ លោកថាខ្លួនស្នាដៃ គ្រប់ម៉ូដទាំងបែប ប្រពៃណីសុទ្ធ និងបែបសម័យ ដោយគ្រាន់តែលោករមែងប្រាប់ភ្ញៀវជាប្រចាំ ថានោះមិនមែនជាឈុតទម្រង់ខ្មែរ មិនមែនជារចនាបទខ្មែរ ដើម្បីឲ្យអតិថិជន ធ្វើការជ្រើសរើស។

លោក ហេង ឡុង ប្រកាសថា ខ្លួនមិនយកចំណេះជំនាញ ដែលខ្លួនចេះ ចាំទៅកប់ចោលទេ គឺត្រូវតែចែករំលែក ហើយក៏មិនគិតកម្រៃដែរ ឲ្យតែអ្នកទាំងនោះ ចំណាយពេលមកសួរនាំ ឬ ស្នើឲ្យលោកបង្ហាត់បង្ហាញ។ លោកថាក្នុងវិស័យសម្អាង លោកចង់តែភ្នួងក្នុងឈុត ដែលជាទម្រង់ខ្មែរប៉ុណ្ណោះ ដើម្បីអភិរក្ស ប៉ុន្តែដោយសារតែការប្រកួតប្រជែង ទើបឈុតក្លាយត្រូវតែធ្វើឲ្យខ្លាំងស្របគ្នា។

ក្នុងអាជីព២០ឆ្នាំ លោកថាយល់ដឹងសុីជម្រៅពីទម្រង់ខ្មែរ ទាំងរបៀបស្លៀកសំឡុយ ចងក្បិន រចនាបទគ្រឿង និងពិធីកិច្ចនីមួយៗជាដើម ដោយលោកបន្តថា គឺជារឿងលំបាកមួយ សម្រាប់ម្ចាស់សម្អាងការ ដោយសារតែសំលៀកបំពាក់ និងគ្រឿងទម្រង់ខ្មែរ ត្រូវចំណាយខ្ពស់ ព្រោះត្រូវផលិតថ្មីទាំងអស់ មិនដូចឈុតស្រាប់ៗ របស់ប្រទេសក្បែរខាងឡើយ។

គួរបញ្ជាក់ថា ក្នុងពិធីសម្ពោធសម្អាងការហេងឡុងហ្គោល នៅក្នុងថ្ងៃនោះ គេឃើញមានសុទ្ធតែវត្តមានអ្នកផាត់មុខអាជីព តារាចម្រៀងបុរាណ ម្ចាស់សម្អាងការល្បីៗ និងតារាមួយចំនួនផងដែរ៕