ផ្ទះ ព័ត៌មានសិល្បៈ និងកម្សាន្ត ព្រាប សុវត្ថិ...

ព្រាប សុវត្ថិ ប្រាប់ហេតុផលមានការប្រគំតន្ត្រីធំជាថ្មី នៅប្រទេសកូរ៉េ

0

កាលពីរសៀលថ្ងៃទី១១ កញ្ញា ឆ្នាំ២០១៩ សិល្បករមួយក្រុមធំ រួមមានលោក ព្រាប សុវត្ថិ លោក គូម៉ា លោក ខេម និងតារាល្បីៗមួយឈុតធំ បានលើកគ្នាចេញ ទៅច្រៀង នៅក្នុងប្រទេសកូរ៉េជាថ្មីទៀតហើយ ក្រោមការរៀបចំរបស់បុរីឡេង ណាវ៉ាត្រា។ ចំពោះការចំណាយ ត្រូវបានប្រកាសថា មិនក្រោម១៤មុឺនដុល្លារនោះទេ ប៉ុន្តែសម្រាប់គោលបំណង គឺយ៉ាងសាមញ្ញ។

តារាសិល្ប:ដែលចេញទៅសម្ដែង នៅក្នុងប្រទេសនាថ្ងៃនោះរួមមាន លោក ព្រាប សុវត្ថិ និងកូនប្រុសទាំង៣ កញ្ញា អុីវ៉ា លោក គូម៉ា កវីនិពន្ធលោក យឹម តាស្រង់ ក្រុមចចកសមុទ្រ លោក ប៉ែន ចំរ៉ុង លោកខេម និងក្រុមរាំ បូកទាំងក្រុមការងារ សរុបប្រមាណជាង៥០នាក់។ តារាទាំងនេះ នឹងបើកឆាកសម្ដែងជាទ្រង់ទ្រាយធំ ដោយមាន Live Band វង់ភ្លេងចចកសមុទ្រ នៅទីក្រុងអាន់សាន់ ថ្ងៃទី១៣ កញ្ញា ដោយការសម្ដែងទាំងមូល នឹងក្លាយជាការសម្ដែង ដែលមានវង់តន្ត្រីលេងផ្ទាល់ ជាលើកទី១ សម្រាប់ក្រុមតារាខ្មែរ តាំងពីចេញទៅសម្ដែងនៅកូរ៉េ។

លោក ព្រាប សុវត្ថិ ថ្លែងថា ពិតជាមោទនភាពយ៉ាងខ្លាំង ដែលតារាសិល្ប:របស់ខ្មែរ ត្រូវបានឧកញ៉ា ឡេង ណាវ៉ាត្រា អគ្គនាយកបុរីឡេងណាវ៉ាត្រា ធានាយកទៅសម្ដែង ជាទ្រង់ទ្រាយធំនៅក្នុងប្រទេសកូរ៉េ។ លោកថា ហេតុផផលនៃការចំណាយលុយ អ្នករៀបចំកម្មវិធីប្រកាសរួចហើយ ថាទៅប្រគំតន្ត្រីមុនរដូវភ្ជុំបិណ្ឌ ដើម្បីឲ្យបងប្អូនពលករខ្មែរ សប្បាយរីករាយ។ ម្យ៉ាងមកពីអំឡុង ពេលនេះ នៅក្នុងប្រទេសកូរ៉េ មិនសូវរងារដែលជាឱកាសមាស របស់អ្នករស់នៅទីនោះផង ទើបលោកឡេង ណាវ៉ាត្រា មិនដែលខកខាន ដើម្បីកុំឲ្យបងប្អូនខ្មែរ នឹកស្រុកខ្លាំងពេក សម្រាប់អ្នកមិនបានមកលេងភ្ជុំ។

លោកថាលោកឧកញ៉ា ជាអតីតអ្នកបម្រើការតាមរោងចក្រនៅក្នុងប្រទេសកូរ៉េ មុនក្លាយជាអ្នកជំនួញជោគជ័យ ទើបការប្រគំតន្ត្រីធំ ដើម្បីឲ្យបងប្អូនខ្មែរ រស់នៅទីនោះបានសប្បាយ ចេះតែត្រូវបានរៀបចំឡើង៕

មតិយោបល់