មុនចាកចេញទៅរស់នៅប្រទេសអូស្ត្រាលី តារាចម្រៀង លោក សុីម សុីណាត បានប្រកាសយ៉ាងក្ដែងៗថា លោកនឹងបាត់សកម្មភាពពីការងារសិល្បៈ ដោយមិនដឹង ពេលណានឹងមានសកម្មភាព លើវិស័យមួយនេះ អោយខ្លាំងដូចដើមនោះទេ ក្នុងពេលដែលលោកទៅរស់នៅទីនោះ ក៏ត្រូវគេឃើញបំពេញការងារ ផ្សេងៗដាច់ឆ្ងាយ ពីច្រៀងរាំដែរនោះ។ យ៉ាងណាមិញ ផ្ទុយពីអ្វីដែលបានប្រកាស លោកបែរជាមាន ឱកាសសម្ដែងជាមួយតារាល្បីៗពីកម្ពុជា ស្ទើររកពេលសម្រាកមិនបាន ជាពិសេសក្នុងអំឡុង បុណ្យភ្ជុំមុននេះតែម្ដង។

យោងតាមគណនេយ្យហ្វេសប៑ុក លោក សុឹម សុីណាត កាន់តែអ៑ុនអ៑ៀយ៉ាងខ្លាំង ជាមួយនឹងការងារចេញសម្ដែងនាពេលចុងក្រោយ ខុសស្រលះពីពេលលោក ទៅរស់នៅប្រទេសអូស្រ្តាលីភ្លាមៗ។ លោកត្រូវគេឃើញសកម្ម ក្នុងការច្រៀងរាំតាំងពី អំឡុងមុនភ្ជុំ ខណៈដែលអំឡុងបុណ្យភ្ជុំនិងក្រោយភ្ជុំ លោកកាន់តែសកម្ម នឹងការចេញសម្ដែង។ ធៀបនឹងទីផ្សារសិល្បៈនៅកម្ពុជា តារាចម្រៀងក្រមុិចក្រមើម រូបនេះ ក្ដោបក្ដាប់បានសំណាងចេញច្រៀង តាមបណ្ដារដ្ឋ និងក្រុង នៅក្នុងប្រទេស អូស្ត្រាលី ឡើងកាលីបជាង នៅកម្ពុជានោះផង។ ខុសពីនៅក្នុងស្រុក ដែលគ្រាន់តែជាអ្នក ចម្រៀងអកកេស ហើយយូរៗម្ដង ទើបមានឱកាសឡើង ឆាកទូរទស្សន៍ លោក សុឹម សុីណាត ត្រូវបានគេចាប់អារម្មណ៍ច្រើន គ្រប់ពេលលោកបង្ហាញវត្តមាន ច្រៀងរាំនៅលើទឹកដីអូស្ត្រាលី ដោយសារតែសកម្មភាព ចេញសម្ដែងរបស់លោក មានការចូលរួមពីតារាចម្រៀងមានកេរ្តិ៍ឈ្មោះល្បីៗពីកម្ពុជា ជាការប្រគំតន្ត្រីធំៗរបស់សិល្បករខ្មែរ នៅអូស្ត្រាលី និង ជាសកម្មភាពច្រៀងរាំ ដែលមានការលក់សំបុត្រ ហើយមានអ្នកចូលទស្សនាច្រើនៗ។

ក្នុងនោះលោកក៏មានឱកាសបង្ហាញវប្បធម៌ខ្មែរ ដោយឈុតប្រពៃណី គួរអោយសរសើរផងដែររាល់ពេលច្រៀងរាំម្ដងៗ។

លោក សុឹម សុីណាត ទទួលស្គាល់ថា ក្នុងមួយរយៈចុងក្រោយការងារ សិល្បៈរបស់លោក ពិតជាមានម្ចាស់ស្ពុនស័រច្រើនឡើង ទាក់ទងអោយចេញសម្ដែង តាមបណ្ដារដ្ឋផ្សេងៗ នៅលើទឹកដីអូស្ត្រាលីពិតមែន ចាប់តាំងពីម្ចាស់ស្ពុនស័រដឹងថា លោកគឺជាតារាចម្រៀង ហើយកំពុងរស់នៅអូស្ត្រាលីស្រាប់។ យ៉ាងណាមិញលោកថា មិនបានបោះបង់ការងារខាងក្រៅនោះទេ ដោយនៅតែហ្វឹកហាត់ការងារផ្នែកចុងភៅ និងការងារផ្សេងៗ បន្ថែមពីលើសិល្បៈដដែល បើទោះជាការងារសិល្បៈ កាន់តែមមាញឹក។

លោកទើបតែត្រូវបានស្ពុនស័រទាក់ទងអោយចេញសម្ដែងជាមួយតារាចម្រៀងស្រីល្បីឈ្មោះ២ដួង គឺស្រីស្អាត រតនៈ ពិសី ដែលជាតារាចម្រៀងថោន និង កញ្ញាសន ផល្លីកា តារាចម្រៀងហង្សមាស ដែលទើបទៅដល់អូស្ត្រាលី កាលពីមុនភ្ជុំក្នុងកុងត្រា ៣ខែនោះផង។ លោក សុឹម សុីណាត បន្តថា លោកពិតជាមានអារម្មណ៍ រីករាយយ៉ាងខ្លាំង ដែលបានប្រឡូកការងារសិល្បៈនៅលើទឹកដីអូស្ត្រាលី ក្នុងពេលដែលលោកស្មានថា ទៅដល់ទីនោះ ប្រហែលមហាជនភ្លេចមុខ ព្រោះតែដាច់ឆ្ងាយពីសិល្បៈ។

លោកកាន់តែជាប់ចិត្ត នៅពេលចេញច្រៀងម្ដងៗ ជួបសុទ្ធតែតារាៗជាមិត្តក្នុងអាជីពដូច នៅស្រុកខ្មែរ និងបានស្គាល់ខ្មែរច្រើនរដ្ឋ ជាពិសេសបានមកឃើញផ្ទាល់ភ្នែកថា ទីអារាមខ្មែរនៅអូស្ត្រាលី ក៏មានសកម្មភាពធ្វើបុណ្យធ្វើទាន និងស្រស់ស្អាត ដូចវត្តនៅកម្ពុជាដែរ នាអំឡុងភ្ជុំកន្លងទៅ។ លោកមិនទាន់មានគម្រោង ចុះមកលេងស្រុកនោះទេ ក្នុងពេលមិនទាន់ទទួលបានកាតចេញចូល ឬ សញ្ជាតិពីអូស្ត្រាលី នាពេលនេះ៕