នៅសល់តែប៉ុន្មានថ្ងៃទៀតប៉ុណ្ណោះ ភាពយន្តដំបូងរបស់តារាសម្ដែងជើងចាស់ យស បូវណ្ណ: នឹងដាក់បញ្ចាំងជាផ្លូវការ នៅតាមរោងកុនហើយ ខណ:ដែលភាពយន្តមួយនេះ គ្រាន់តែឃើញឈុតខ្លី Trailer ក៏ក្ដុកក្ដួលចិត្ត ព្រោះស្ដែងចេញពីការតស៑ូ របស់ឳពុក ដើម្បីកូន។ នេះជាភាពយន្តជីវិត ដែលផលិតកម្មមហាហង្សបោះទុនខ្ពស់ក្នុងការផលិត ដោយនេះ ក៏ជាភាពយន្តដែលលោក យស បូវណ្ណ: សម្ដែងលើកដំបូងក្រោយបាត់មុខ ទៅរស់នៅអាមេរិក។

ភាពយន្តមួយនេះ គម្រោងដាក់បញ្ចាំងនៅថ្ងៃទី១០ តុលា ដោយផលិតកម្មមហាហង្ស រំពឹងយ៉ាងខ្លាំងថា ភាពយន្តជីវិតរបស់ខ្លួន នឹងទទួលបានជោគជ័យ។ លោក អុិន សុភិន ចាងហ្វាងផលិតកម្មបានអះអាង ថាដើម្បីបំពេញតម្រូវការរបស់អ្នកទស្សនា ឲ្យកាន់តែយល់ដឹងពីភាពកត្តញូចំពោះអ្នកមានគុណ ផលិតកម្មមហាហង្ស បានសម្រេចនិពន្ធ និងផលិតភាពយន្តរឿង “លោកឳពុក” ដោយបានទាំងប្រមូលផ្ដុំ តារាប្រុសជើងចាស់ៗល្បីៗ៣រូប រួមមានលោក ហម ឈរ៉ា និង លោក យស បូវណ្ណ: ឲ្យមករំលេចស្នាដៃរួមគ្នា។ លោកថាភាពយន្តនេះ បានបង្កប់នូវការអប់រំលើសលប់ ហើយក៏នឹងក្លាយជាសារពញាក់អារម្មណ៍ធំមួយដល់កូនៗគ្រប់រូប ដែលមើលរំលង ពីការលះបង់របស់ឳពុក។

លោក យស បូវណ្ណ: បានថ្លែងពីសហរដ្ឋអាមេរិកថា លោកពិតជាសប្បាយចិត្ត យ៉ាងខ្លាំង ដែលលោកបានបង្ហាញ ស្នាដៃជាថ្មីក្នុងស្រុក បន្ទាប់ពីលោកខកខាន បង្ហាញខ្លួនក្នុងស្រុកអស់ច្រើនឆ្នាំ។ លោកក៏មានអារម្មណ៍ក្ដុកក្ដួល ជាមួយនឹងភាពយន្ត ជីវិតមួយនេះផងដែរ ដោយសារតែសាច់រឿងទាំងមូល ពោរពេញដោយឈុតទឹកភ្នែក។
ខាងក្រោមនេះ ជាឈុតខ្លី ក្នុងរឿង”លោកឳពុក”