ព័ត៌មានសិល្បៈ និងកម្សាន្ត

សិល្បករមួយក្រុម ត្រូវបានព្រះញាតិវង្សកម្ពុជា និងថៃ លើកកិត្តិយសនៅសុរិន្ទ

សិល្បករប្រមាណជាង១០រូប មកពីគ្រួសារតារាកម្ពុជា ទទួលបានការស្វាគមន៍ យ៉ាងកក់ក្ដៅ ក្នុងពិធីធំមួយនៅសុរិន្ទ ក្រោមការយកចិត្តទុកដាក់ ពីសែស្រឡាយ ព្រះរាជវង្ស ថ្នាក់ដឹកនាំកម្ពុជា និងថ្នាក់ដឹកនាំជាន់ខ្ពស់របស់ថៃ ។ តារាទាំងនោះ ត្រូវបានបង្ហាញខ្លួន បន្ទាប់ពីមានការអញ្ជើញពីអង្គម្ចាស់ក្សត្រីយ៍ ស៊ីសុវត្ថិ កុសុម:នារីរតនា ដែលជាបុត្រីព្រះអង្គម្ចាស់ ស៊ីសុវត្ថិ ឌួងសារាវ័ន្ត និងក្សត្រីយ៍ នរោត្តម រង្សី ច័ន្ទតារា ជាព្រះរាជវង្សខ្មែរមួយអង្គ ដែលមានកិត្តិយស និងទទួលបានការគោរពក្នុងប្រទេសថៃ។

សិល្បករ ដែលបានបង្ហាញខ្លួន នៅខេត្តសុរិន្ទនោះ រួមមាន លោក ផាត់ តារារដ្ឋស្ថាបនិក គ្រួសារតារាកម្ពុជា, អ្នកនាង ឆ័យលី ដាឡែន តារាចម្រៀងប្រចាំ គ្រួសាតារាកម្ពុជា, លោក រុន ណាកូ ម្ចាស់ពានគ្រងឈុតបុរាណត្រូវទម្រង់ឆ្នាំ២០១៨ និងជាទូតសុឆន្ទ:របស់គ្រួសារតារាកម្ពុជា, កញ្ញា អ៊ុង នីនិច្ច តារាចម្រៀងប្រចាំ ក្រសួងព័ត៌មាន និងជាសមាជិកគ្រួសារតារាកម្ពុជា, អ្នកស្រី រ៉េតរ៉ូស តារាសម្ដែង សមាជិកគ្រួសារតារាកម្ពុជា, អ្នកស្រី វ៉ាន់ថុន ជាតារាសម្ដែង និងជាសមាជិកគ្រួសារ តារាកម្ពុជា, អ្នកស្រី ញឹម សុខា តារាសម្ដែង និងជាសមាជិកគ្រួសារតារាកម្ពុជា, អ្នកស្រី គឹម វណ្ណ: តារាសម្ដែង, លោក មាន ប៊ុនធឿន សិល្បករ, លោក សាយ័ណ្ណ ម្ចាស់សម្អាងការមរកតមង្គល នៅផ្សារតាខ្មៅថ្មី អ្នកស្រី សយ ណារីរ័ត្ន តារាសម្ដែង និងក្រុមការងារគ្រួសាររតារាកម្ពុជា ផ្នែកផ្សព្វផ្សាយ និងអ្នកយកព័ត៌មាន សរុបចំនួន ១២រូប។

លោក ផាត់ តារារដ្ឋ បង្ហាញអារម្មណ៍រំភើបចិត្តយ៉ាងខ្លាំង ដែលព្រះអង្គម្ចាស់ក្សត្រី ស៊ីសុវត្ថិ កុសុម:នារីរតនា និងក្រុមព្រះញាតិវង្ស បានយកចិត្តទុកដាក់ចំពោះអ្នក សិល្បករខ្មែរ ដោយក្រៅពីបានយកចិត្តទុកដាក់ ទាំងការជូនក្រុមការងារ របស់លោកឲ្យបានធ្វើទស្សនកិច្ច ក្នុងតំបន់មួយចំនួននៅសុរិន្ទ ក៍ផ្ដល់មហាកិត្តិយស ដល់អ្នកសិល្បករទាំងអស់ ក្នុងពិធីកឋិនទានដែលម្ចាស់ក្សត្រី បានរួមចំណែក ផ្ដើមបុណ្យ ដើម្បីឲ្យថ្នាក់ដឹកនាំថៃបានស្គាល់ និងបានផ្ដល់ការស្វាគមន៍ ដល់តារារបស់ខ្មែរផងដែរ។

ម្ចាស់ក្សត្រី ស៊ីសុវត្ថិ កុសុម:នារីរតនា បានបន្តថា ដោយសារពិធីនេះ ជាកឋិនទ្រង់ទ្រាយធំនៅសុរិន្ទ ទើបព្រះអង្គម្ចាស់ក្សត្រីយ៍ យាងម្ចាស់ប្អូនជីដូនមួយ របស់ព្រះនាង ដែលជាព្រះញាតិវង្សត្រកូលអង្គឌួង ឲ្យអញ្ជើញតារាសិល្ប: ក្នុងក្រុមគ្រួសារតារាកម្ពុជា មកលេង និងតែងបុរាណ ឲ្យជនជាតិថៃបានឃើញ។ ម្ចាស់ក្សត្រីយ៍បន្ត ពិធីនេះមានការចូលរួមដោយព្រះញាតិវង្សខ្មែរ និងថៃ រួមទាំងថ្នាក់ដឹកនៃប្រទេសទាំង២យ៉ាងច្រើនកុះករ ខណ:ដែលម្ចាស់ផ្ដើមបុណ្យ និងប្រជាជនខ្មែរសុរិន្ទ នៅក្នុងប្រទេសថៃសប្បាយរីករាយខ្លាំងណាស់ នៅពេលបានឃើញអ្នកសិល្ប:ខ្មែរ ចូលរួម៕

មតិយោបល់