សុខ ស្រីមុំ ជាតារាភាពយន្តខ្មែរដ៏ល្បី ដែលបានដើរតួសំដែងខ្សែភាពយន្ត ជាង ១០០ រឿង។ បច្ចុប្បន្ននេះ អ្នកស្រី សុខ ស្រីមុំ រស់នៅឯ សហរដ្ឋអាមេរិក ក្នុង រដ្ឋកាលីហ្វញ៉ា ជាអ្នកចម្រៀងទេសចរណ៏ ។
ជីវប្រវត្តិសង្ខេប
អ្នកស្រីសុខ ស្រីមុំ ជាអតីតតារាភាពយន្តដ៏មានកេរ្តិ៍ឈ្មោះបោះសម្លេងក្នុងប្រទេស កម្ពុជាកាលពីចុងទសវត្សរ៍ទី៨០និងទសវត្សរ៍ទី៩០ដែលមានទេពកោសល្យ សម្ដែងយ៉ាងសក្តិសមឥតខ្ចោះក្នុងឈុតក្រមិចក្រមើម រឡិករឡក់ ក្និកក្នក់ គួរឱ្យស្ញើចសរសើរ។ អ្នកស្រីកើតនៅឆ្នាំ១៩៧៣ នៅទីក្រុងភ្នំពេញ។ ឪពុកឈ្មោះគ្រួចនារី ជាអតីតអ្នកប្រដាល់សេរីដ៏ល្បីឈ្មោះកាលពីសម័យសាធារណរដ្ឋខ្មែរ(ស្លាប់ក្នុងជំនាន់ប៉ុល ពត) ម្តាយឈ្មោះសុខ យ៉ាន ជាមេផ្ទះ។ អ្នកស្រី ជាកូនទី៤ ក្នុងចំណោមបងប្អូន៦នាក់។ មុនពេលចាប់អាជីពជាតារាសម្ដែងភាពយន្ត អ្នកស្រីសុខ ស្រីមុំ ឈ្មោះហៅក្រៅ ក្លឹង្គមានអតីតភាពជាអ្នកលក់បារីនៅត្រង់ម្ដុំអតីតរោងកុនឋានសួគ៌ (ផ្លូវកម្ពុជាក្រោម) ជិតសាលាបាក់ទូក។ អ្នកស្រីបានរៀបអាពាហ៍ពិពាហ៍ជាលើកដំបូងជាមួយលោក ខៃ ចាន់តារា ហៅ អ៊ួក នៅឆ្នាំ១៩៩៣។ ប៉ុន្ដែពួកគេទាំងពីរក៏បានលែងលះគ្នាក្រោយពីបានទៅរស់នៅសហរដ្ឋអាមេរិកបានប៉ុន្មានឆ្នាំដោយបន្សល់ទុកកូនប្រុសម្នាក់អាយុ ១៩ឆ្នាំ (គិតមកដល់ឆ្នាំ២០១២នេះ)។ នៅឆ្នាំ២០០០ អ្នកស្រីបានជួបជាមួយស្វាមីក្រោយដែលជាជនបរទេសមានអាជីពជាផលិតករ ភាពយន្ដនៅសហរដ្ឋអាមេរិក។ សព្វថ្ងៃនេះអ្នកស្រីសុខ ស្រមុំ កំពុងរស់នៅរដ្ឋកាលីហ្វញ៉ា សហរដ្ឋអាមេរិក។ អតីតតារាភាពយន្តរូបនេះមានអាយុ៣៨ឆ្នាំហើយ(គិតមកទល់ឆ្នាំ២០១១នេះ) ។
ជីវិតសិល្ប: និង ស្នាដៃ
អ្នកស្រីបានចូលប្រឡូកសិល្ប:ភាពយន្តនៅឆ្នាំ១៩៨៩រួមជំនាន់ស្របាលគ្នាជាមួយនឹងអ្នកស្រីអម្ពរទេវី,អ្នកស្រីចាន់ តារាទី,អ្នកស្រីអ៊ុំ សុវណ្ណនី,អ្នកស្រីចាន់ សេរីរ័ត្ន ,អ្នកស្រីឯក អមរា ជាដើម។ ស្នាដៃដំបូងដែលអ្នកស្រីចាប់ផ្ដើមល្បីឈ្មោះក្នុងពិភពសិល្ប:ធ្វើឱ្យទស្សនិកជនស្គាល់ច្បាស់គឺរឿងកាត់បេះដូងដើម្បីបង រួមសម្ដែងជាមួយតួឯកប្រុសគឺលោកសម តារា។ អ្នកស្រីធ្លាប់រួមុំសម្ដែងភាពយន្តជាមួយតួប្រុសជាច្រើននៅជំនាន់នោះដូចជាលោកទេព រិន្ទដារ៉ូ,លោកសម តារា,លោកខៃ ប្រសិទ្ធ,លោកពេជ្រ ភិរុណ,លោកយស បូវណ្ណ:,លោកសុវណ្ណ មុនី ជាដើម។ ខ្សែភាពយន្តដែលអ្នកស្រីបានចូលរួមសម្ដែងមានដូចជា៖
- រឿងកាត់បេះដូងដើម្បីបង
- រឿងនាងរំសាយសក់
- រឿងខឹងខ្នាញ់ស្រឡាញ់អង្អែល
- រឿងស្រណោះក្លិនស្រែម្អម
- រឿងមួយសប្ដាហ៍នៃបេសកកម្មខ្មោច
- រឿងព្រលឹងអារក្សអន្ទាក់និស្ស័យ
- រឿងម៉ាក់អូននៅក្រមុំ
- រឿងព្យាណូបាក់ខ្ទង់
- រឿងផ្កាចុងសន្លឹក
- រឿងមេផ្ទះលេខមួយ
- រឿងដួងចិត្តខ្មោច
- រឿងច្រឡំខ្ញុំហើយ
- រឿងពៅម្លិះលា
- រឿងឥន្ទធនូបីពណ៌
- រឿងកវីផ្សងស្នេហ៍
ជីវិតថ្មីលើដីអាមេរិក
អ្នកស្រីសុខ ស្រីមុំ បានចាកចេញពីមាតុភូមិទៅរស់នៅសហរដ្ឋអាមេរិកនៅខែកញ្ញា ឆ្នាំ១៩៩៤រួមដំណើរជាមួយលោកយស បូវណ្ណ: និងសិល្បករមួយចំនួនទៀត។ នៅទីនោះ ដំបូងអ្នកស្រីចេញច្រៀងក្រោយមកទើបមានគេទាក់ទងឱ្យសម្ដែងជាចម្រៀងកាយវិការ។ ក្រៅពីនេះអ្នកស្រីត្រូវប្រកបមុខរបរផ្សេងទៀតបន្ថែមលើអាជីពសិល្ប:ដើម្បីរក ប្រាក់ចំណូលផ្គត់ផ្គង់ជីវភាព។ កាលពីឆ្នាំ២០០៧កន្លងទៅថ្មីៗនេះក្រោយពីបានឃ្លាតពីមាតុភូមិអស់រយ:ពេលជាង១០ឆ្នាំ អ្នកស្រីក៏បានត្រលប់មកលេងស្រុកខ្មែរជាលើកដំបូងជាមួយស្វាមីក្រោយ ជិតមួយខែ ហើយបានចេញមុខជាសាធារណ:ក្នុងការប្រគំតន្រ្តីតាមស្ថានីយ៍ទូរទស្សន៍ មួយចំនួន។ ទោះបីជាស្ថិតក្នុងវ័យជាង៣០ទៅហើយក្ដី ក៏អ្នកស្រីសុខ ស្រីមុំ នៅតែរក្សាសម្រស់បានស្រស់ផូរផង់ក្មេងជាងវ័យធ្វើឱ្យទស្សនិកជនគ្រប់ មជ្ឈដ្ឋានស្ញើចសរសើរមិនដាច់ពីមាត់៕
មតិយោបល់