តារាសម្ដែងដ៏ល្បីឈ្មោះ និងមានប្រជាប្រិយភាពរបស់ចិន លោក Jackie Chan (ឈិនឡុង) នឹងចូលរួមសម្ដែងនៅក្នុងភាពយន្តរឿង “The Expendables 3” នេះបើយោងតាមសេចក្ដីរាយការណ៍របស់សារព័ត៌មានចិន Ming Pao និង Yahoo។
ប្រភពព័ត៌មានខាងលើបានបញ្ជាក់ថា លោក ឈិនឡុង បានចុះកិច្ចព្រមព្រៀងក្នុងការថតរឿងនេះជាលោក Sylvester Stallone (រ៉ាមបូ)ដែលជាអ្នកដឹកនាំ និងក៏ជាតួសម្ដែងនៅក្នុងសាច់រឿងនេះផងដែរ។
កាលពីឆ្នាំកន្លងទៅ មានក៏មានព័ត៌មានដូចនេះផងដែរថា លោក ឈិនឡុងនឹងមានវត្តមានក្នុងរឿង The Expendables 2 ប៉ុន្តែបែរជាគ្មានរូបលោកទៅវិញ។
ប្រភពព័ត៌មានខាងលើបានឲ្យដឹងទៀតថា អ្នកដែលជិតស្និទ្ធនឹងលោក ឈិនឡុង បានបង្ហើបប្រាប់ថា លោក រ៉ាមបូ បានអញ្ជើញ ឈិនឡុង ឲ្យចូលរួមក្នុងការសម្ដែងវគ្គថ្មីនេះ ហើយលក្ខណៈនៃកិច្ចព្រមព្រៀងក៏បានធ្វើរួចរាល់ហើយដែរ។
ប៉ុន្តែបើទោះជាយ៉ាងនេះក្ដី ក៏នៅមិនទាន់ប្រាកដបានថា លោក ឈិនឡុងពិតជាមានវត្តមាននៅក្នុងរឿង The Expendables 3 នោះទេ ព្រោះថា លោកមិនបានប្រកាសជាសាធារណៈ។
នៅក្នុងសាច់រឿងនេះ ក៏មានតារាសម្ដែង កំពូលក្បាច់គុណមួយរូបផងដែរគឺលោក Jet Li (លីលានជា)។
គួរបញ្ជាក់ផងដែរថា រឿង The Expendables 3 នឹងចាប់ផ្ដើមថតនៅក្នុងខែវិច្ឆិកា ឆ្នាំ ២០១៣ ហើយនឹងដាក់បញ្ចាំងនៅក្នុងខែសីហា ឆ្នាំ ២០១៤៕
មតិយោបល់