(ភ្នំពេញ)៖ នៅទីបំផុត តារាចម្រៀងសំនៀងពីរោះក្នុងផលិតកម្មសាន់ដេ ចូលចិត្តបង្ហាញភាពសិចស៉ី បញ្ចេញសាច់សខ្ចី ដើមទ្រូងទ្រលុកទ្រលន់លើបណ្តាញសង្គម គឺកញ្ញា វីរៈ និច្ច បានចូលរោងការតាមប្រពៃណីខ្មែរហើយ បន្ទាប់ពីបាននាងនិងស្វាមី បានស្វែងយល់ចិត្តថ្លើមគ្នាអស់រយៈពេលជាច្រើនឆ្នាំ ដោយស្វាមីរបស់តារាស្រីរូបនេះ ជាថៅកែផ្ទះសំណាក់អង្គរពេជ្រ នៅក្រុងកំពង់សោម នាខេត្តព្រះសីហនុ។

មង្គលការរបស់តារាស្រី វីរៈ និច្ច ត្រូវបានធ្វើឡើងកាលពីថ្ងៃទី១៦ ខែតុលា ឆ្នាំ២០២១ ម្សិលមិញនេះ ខណៈក្នុងថ្ងៃរៀបអាពាហ៍ពិពាហ៍ គេឃើញថា វីរៈ និច្ច ពិតជាមានសម្រស់ស្រស់ស្អាតខ្លាំង ស្របពេលបានគ្រងឈុតកូនក្រមុំតាមបែបប្រពៃណីខ្មែរយ៉ាងដូច្នេះ។ លើសពីនេះទៅទៀត នាងនិងអនាគតស្វាមី បានបង្ហាញនូវស្នាមញញឹមយ៉ាងរីករាយក្នុងថ្ងៃមង្គលរបស់ខ្លួន មិនតែប៉ុណ្ណោះបើមើលទៅអ្នកទាំងពីរពិតជាមានភាពសាកសមនឹងគ្នាខ្លាំងផងដែរ។

ជាក់ស្ដែង បើយើងក្រឡេកទៅមើលអ្នកកំដរក្នុងថ្ងៃមង្គលរបស់កញ្ញា វីរៈ និច្ច សុទ្ធតែតារាល្បីប្រចាំប្រទេស ដែលកំពុងទទួលបានការគាំទ្រខ្លាំងពីមហាជនគ្រប់ស្រទាប់។ ហើយអ្នកកំដរតារារូបនេះ ក៏មានរូបសម្បត្តិ ស្រស់ស្អាត ស្រស់សង្ហាគ្រប់ៗគ្នាយ៉ាងគួរឲ្យសរសើរ ដោយអ្នកំដរថ្ងៃរៀបការនាងមានដូចជា នាយ ចឺម លោក វេហារ កញ្ញា រចនា រ៉ាវាឌី និងកញ្ញា នាង ប្រាក់គន្ធា៕