(ភ្នំពេញ)៖ ពិតណាស់ នៅឆ្នាំ២០២០កន្លងទៅ អតីត «Miss Universe Cambodia 2017»កញ្ញា ប៊ី សុធារី បានទទួលតំណែងជា «Miss Charm» តំណាងឲ្យប្រទេសកម្ពុជាទៅ ប្រកួតនៅប្រទេសវៀតណាម ប៉ុន្តែដោយសារកត្តាកូវីដ-១៩ ទើបកម្មវិធីទាំងមូលត្រូវបានពន្យាពេលរហូតមកទល់សព្វថ្ងៃ។

យ៉ាងណាមិញ បន្ទាប់ពីខកខាន និងរង់ចាំអស់រយៈពេលជាងមួយឆ្នាំមកនេះ កញ្ញា ប៊ី សុធារី ក៏បានត្រៀមខ្លួនរួចជាស្រេចផងដែរសម្រាប់ទៅ ចូលរួម «Miss Charm International 2021» នាពេលខាងមុខនេះ។

លើសពីនេះ ក្រៅ ពីការត្រៀមខ្លួន ការពង្រឹងសមត្ថភាព ទាំងការដើរនិងការនិយាយជាដើម តារាស្រីរូបនេះ ក៏បានត្រៀមឈុតតំណាងជាតិយ៉ាងស្រស់ស្អាតនិងមានអត្ថន័យល្អផងដែរ។ ជាពិសេស ថ្មីៗនេះនាងក៏ទើបតែបានបង្ហាញឈុតរាត្រីស្រមោលសយ៉ាងគួរឲ្យចាប់អារម្មណ៍ ដោយមានការរចនា ការច្នៃម៉ូតប្លែកភ្នែក មើលទៅ ស្អាតខ្លាំងតែម្ដង ខណៈរ៉ូបមួយនេះធ្វើមិនទាន់រួចមួយរយភាគរយក៏ដោយ ប៉ុន្តែនៅ ពេលដែលបានបង្ហាញលើបណ្ដាញសង្គម យើងឃើញថាពិតជាទទួលបានការសរសើរពីអ្នកគាំទ្រច្រើនខ្លាំងផងដែរ៕