ភ្នំពេញៈ បន្ទាប់ពីរូបថតកូនស្រីរបស់ភិន សុដាលីស ត្រូវបានបង្ហោះឡើងជាសាធារណៈ លោកប៉ែន ចំរ៉ុង ដែលត្រូវមហាជនចោទថាជាឪពុកដាច់ធម៌មេត្តា ព្រោះតែគ្មានការទទួលខុសត្រូវចំពោះដំណក់​ឈាមរបស់ខ្លួននោះ ក៏មានប្រភពជិតស្និទ្ធចេញមុខទម្លាយថា លោកក៏មានចិត្តអាណិត និង ចង់ឃើញមុខកូនស្រី​ដោយ​ផ្ទាល់មិនខុសពីឪពុកទូទៅដែរ។ ប្រភពដដែលថែមទាំងអះអាងថា ពាក្យសម្ដីដែលប៉ែន ចំរ៉ុង ប្រកាសប្រាប់​តុលា​ការថាកូននោះសង្ស័យមិនមែនជាឈាមរបស់ខ្លួន គ្រាន់តែជាសម្ដីឌឺភិន សុដាលីសនាពេលនោះប៉ុណ្ណោះ។

តារាម្នាក់ដែលត្រូវគេស្គាល់ថាជាសមាជិកក្នុងGroup «គ្រួសារតារាកម្ពុជា» ទម្លាយថាក្រោយជជែកគ្នាផ្ទាល់មាត់ជា​មួយលោកប៉ែន ចំរ៉ុង នៅប៉ុន្មានម៉ោង ក្រោយពីភិន សុដាលីស សម្រាលកូន គឺ លោកប៉ែន ចំរ៉ុង ដ្បិតថាមើល​ទៅ​ស្ងប់ស្ងាត់ដូចមិនចាប់អារម្មណ៍ចំពោះដំណឹងសម្រាលកូនស្រីរបស់អតីតភរិយា ប៉ុន្តែការពិតលោកបានតាម​ដាន​ស្ថានការណ៍នោះខ្លាំងជាងមហាជនទៅទៀត។ លោកត្រូវបានគេអះអាងថា មានរូបរបស់កូនស្រីក្នុងទូរស័ព្ទដៃ ដោយ​ព័ត៌មានដែលបានចេញផ្សាយពាក់ព័ន្ធនឹងដំណឹងរបស់កូនស្រី គឺតារាពោះម៉ាយរូបនេះ បានទាំងឲ្យគេផ្ញើឲ្យ​មើល និងតាមដានគ្មានបាត់មួយព័ត៌មាននោះផង។ តារាដដែលបន្តថា ប៉ែន ចំរ៉ុង ក៏មិនខុសពីឪពុកទូទៅនោះដែរ គឺលោកចង់ឃើញមុខកូនស្រីដោយផ្ទាល់នៅមន្ទីរពេទ្យដែលភិន សុដាលីស សម្រាល ប៉ុន្តែមកពីលោកមិន​ចង់ប្រ​ឈម​មុខជាមួយគ្រួសាររបស់នាង ទើបសុខចិត្តស្ងប់ស្ងាត់។ តារារូបនោះនិយាយថា«មិចថាចំរ៉ុងមិនចាប់​អារម្មណ៍​(កូន) គ្នាតាមដានរហូតតើ សូម្បីតែសត្វក៏វាចេះស្រឡាញ់កូនវា ចុះទម្រាំគ្នាឪពុក! គ្នារំភើបចង់ងាប់នឹងពេលឃើញ​មុខកូននៅលើហ្វេសប៊ុក!»។ លោកប៉ែន ចំរ៉ុង ត្រូវបានប្រភពនោះបន្តថា មានអារម្មណ៍ក្ដុកក្ដួល នៅពេលបាន​ឃើញ​កូនស្រីដែលជាដំណក់ឈាមរបស់ខ្លួនប្រសូត្រដោយមានសុវត្ថិភាព។ បើទោះជាខាងតុលាការបានចេញ​សាល​ក្រម​ឲ្យលោកមានសិទ្ធិចេញចូលទៅមើលថែកូននោះ តែប្រភពដែលបានទម្លាយពីអារម្មណ៍ពិតរបស់លោកប៉ែន ចំរ៉ុង បានអះអាងថាតារារូបនេះនឹងមិនទៅដោយផ្ទាល់ច្រើនជាងរក្សាភាពសម្ងំស្ងៀម។ អ្នកទម្លាយព័ត៌​មានដដែល​និយាយថា«កុំនិយាយថាគ្នាអត់ចង់ទៅ គ្នាចង់ណាស់ ខ្ញុំឮសម្ដីចំរ៉ុងអាណិតតើ!»។

លោកប៉ែន ចំរ៉ុង មិនអាច​ទំនាក់ទំនងសួរនាំពីអារម្មណ៍ក្រោយពេលកូនស្រីត្រូវបានប្រសូត្រឡើងនេះទេ ក្នុងពេល​តារា​ដែលស្និទ្ធិនឹងលោកសុទ្ធតែអះអាងថាលោកមានហេតុផលធំមួយ ទើបបណ្ដាលឲ្យលោក​សុខចិត្តលែងលះ​ភិន សុដាលីស ដែលហេតុផលនោះគឺលោកមិនព្រមទម្លាយ ទើបបណ្ដាលឲ្យមហាជននៅតែដាក់កំហុសថា​លោកជា​អ្នកមានកំហុសក្នុងរឿងដ៏រសើបមួយនេះតែម្នាក់ឯង៕