ម្ចាស់ផលិតកម្មវ័យក្មេង​ ឈុន សុវណ្ណភក្តី បានអះអាងប្រាប់ Post News ឲ្យដឹងថា លោកកំពុងជាប់ដៃសិក្សា​ការថតកុន ជាមួយនឹង​ជនជាតិរុស្ស៊ី ដើម្បីជាដើមទុន​ធំមួយ យកមកផលិត​ខ្សែភាពយន្តថ្មីរបស់ខ្លួន ដែលជាភាពយន្តបែបកំប្លែងនោះ​។​

បច្ចុប្បន្ននេះ ម្ចាស់ផលិតកម្ម BKS កំពុង​ជាប់ដៃសិក្សា​ការធ្វើភាពយន្ត នៅ​នាយកដ្ឋានភាពយន្តថ្មី ខណ:ដែល​ផលិតកម្មខ្លួន កំពុងរៀបចំទុនរាប់ម៉ឺនដុល្លារ ផលិតខ្សែភាពយន្តថ្មីមួយក្រោមចំណងជើងថា «អាស្ទើរទឹក ប៉ះខ្មោចបែកស្លុយ» ។​

ឈុន សុវណ្ណភក្តី បានឲ្យដឹងថា «ក្រៅពីការសិក្សាជាមួយផលិតករថៃ ខ្ញុំចង់បន្ថែមចំណេះដឹងមួយទៀត ដោយរៀនភាពយន្ត ជាមួយផលិតករ​រុស្ស៊ី ធ្វើយ៉ាងណា​យកចំណេះដឹងនោះ ប្រើប្រាស់ជាផ្លូវការជាមួយខ្សែភាពយន្តថ្មីខ្លួន​» ។​

សម្រាប់ភាពយន្ត «អាស្ទើរទឹក ប៉ះខ្មោចបែកស្លុយ» នេះ ផលិតកម្ម BKS នឹងចាយទុន​ ៦ម៉ឺនដុល្លារ អាម៉េរិក ដោយយកទីតាំងថតក្នុងទួលខ្មោច​ពិត នៅទឹកដីខេត្តស្វាយរៀង​៕​