កំពង់ធំ: ហាងខារ៉ាងូខេ ចំនួន២កន្លែងនៅក្នុងស្រុកស្ទោង ត្រូវបានសមត្ថកិច្ចកងរាជអាវុធហត្ថខេត្តកំពង់ធំ លបឆ្មក់ក្រសោមបានទាំងថៅកែ និងកូនចៅ កាលពីវេលាម៉ោង ៨និង៣០នាទីយប់ ថ្ងៃទី២១ ខែវិច្ឆិកា ឆ្នាំ២០១៦ ដែលមានការសហការបង្រ្កាបដោយ លោក យិត សាអឿន មេបញ្ជាការងកងរាជអាវុធហត្ថខេត្តកំពង់ធំ លោក មាស វឌ្ឍនា ព្រះរាជអាជ្ញារងដឹកនាំផ្ទាល់ដោយលោក អ៊ិតសុធា ព្រះរាជអាជ្ញាអមសាលាដំបូងខេត្តកំពង់ធំ ឆ្មក់ចូលឃាត់ខ្លួនម្ចាស់ហាងការ៉ាអូខេបាន២នាក់ និងនារីចំនួនសរុប២៤នាក់ដែលបង្កប់ការបម្រើសេវ៉ាផ្លូវភេទ។

តាមការឲ្យដឹងពីប្រជាពលរដ្ឋថា ទីតាំងខេរ៉ាអូខេ បម្រើសេវាផ្លូវភេទនេះ បានបើកជាង១០ឆ្នាំមកហើយ ដោយសារតែមានការត្រូវរ៉ូវគ្នាជាមួយនឹងមន្រ្តីសមត្ថកិច្ចមូលដ្ឋាន ទើបបានជាកិច្ចការសេវាផ្លូវភេទប្រកបដោយរលូន មិនបានបង្រ្កាបនោះទេ ថែមទាំងបណ្តែតបណ្តោយឲ្យមានការពង្រីកសាខាកាន់តែច្រើនឡើង នៅក្នុងស្រុកស្ទោង ដែលនេះ វាផ្ទុយទៅនឹងសារាចរណ៍ណែនាំ នៃគោលនយោបាយភូមិឃុំមានសុវត្តិភាពទាំង៩ចំណុ។

កិច្ចប្រតិបត្តិការនេះ សមត្ថកិច្ចបានចុះបង្រ្កាប ហាងទី១ឈ្មោះ (ការាអូខេ ជំនោររីករាយ) មានទីតាំងនៅភូមិត្នោត ឃុំកំពង់ចិនជើង ស្រុកស្ទោង ដែលមានម្ចាស់ហាងឈ្មោះ អ៊ឹង ប៊ុន ឆាយ ភេទប្រុស អាយុ ៥០ឆ្នាំ និងនារីចំនួន១៥នារីនាក់ និងហាងទី២ ឈ្មោះ(ការ៉ាអូខេម្លប់ដូង) មានទីតាំងនៅភូមិ លាបទង ឃុំកំពង់ចិនត្បូង ស្រុកស្ទោង ដែលមានម្ចាស់ឈ្មោះ អ៊ុក រតនា ភេទប្រុស អាយុ ២៣ឆ្នាំ និងនារី៩នាក់ បន្ទាប់មកបានបញ្ចូននារីទាំង២៤នាក់ ទៅសួរចម្លើយ និងធ្វើការអប់រំណែនាំនៅទីបញ្ចាការដ្ឋានកងរាជអាវុធហត្ថស្រុកស្ទោង រួចហើយឲ្យត្រឡប់ទៅផ្ទះវិញ ដោយឡែកម្ចាស់ហាងទាំង២ ត្រូវបានបញ្ចូនទៅសាលាដំបូងខេត្តកំពង់ធំ បើសិនរកឃើញថាពិតជាមានបទល្មើស សេវ៉ាកម្ម និងផ្ដល់ទីតាំង ឬទទួលផលពីសេវ៉ាកម្មទាំងនេះ។

ក្នុងប្រតិបត្តិការនេះដែរ ប្រជាពលរដ្ឋត្រេកអរចំពោះការចុះប្រតិបត្តិការបង្រ្កាបទីតាំងស្រីពេស្សាបម្រើផ្លូវភេទ ដែលបានធ្វើឲ្យសង្គមជាតិមានការ អាប់អោន និងធ្លាក់ចុះ ដោយសារតែក្រុមរកស៊ីផ្លូវភេទ និងសុំឲ្យដាក់ទោសឲ្យធ្ងន់ចំពោះម្ចាស់ហាងទាំង២កន្លែងនេះ ដើម្បីកុំឲ្យមានការប្រព្រឹត្តខុសទៀត៕