កំពង់ចាម: កាលពីព្រឹកថ្ងៃទី២៣ ខែវិច្ឆិកា ឆ្នាំ២០១៦ នៅមន្ទីរវប្បធម៌ និងវិចិត្រសិល្ប:ខេត្តកំពង់ចាម បានបើកកិច្ចប្រជុំស្តីពីការត្រួតពិនិត្យ និងរៀបចំបើកបណ្ណាល័យឡើងវិញ ក្រោមអធិបតីភាពឯកឧត្ដម លន់ លឹមថៃ អភិបាលនៃគណ:អភិបាលខេត្តកំពង់ចាម និងឯកឧត្តម លោក លោកស្រី ប្រធានមន្ទីរ អង្គភាពនានាជុំវិញខេត្ត ព្រមទាំងមានការចូលរួមពីអង្គការ និងសប្បុរជនជាច្រើនទៀត។
ជួសមុខឲ្យគណ:អធិបតីក្នុងអង្គប្រជុំ លោកហាន កុសល នាយករដ្ឋបាលសាលាខេត្ត បានធ្វើបទបង្ហាញស្តីពីបច្ចុប្បន្នភាពនៃការរៀបចំបណ្ណាល័យ ការខ្វះខាតសម្ភារ:ផ្សេងៗ និងផែនការត្រូវអនុវត្តបន្តដើម្បីឆ្ពោះទៅមុខទៀត។ ក្នុងឱកាសនោះដែរ ឯកឧត្ដម លន់ លឹមថៃ អភិបាលនៃគណ:អភិបាលខេត្តកំពង់ចាម បានធ្វើការអំពាវនាវ ក៏ដូចជាជំរុញឲ្យគ្រប់មន្ទីរ អង្គភាពនានាជុំវិញខេត្ត និងអង្គការ សប្បុរសជនជាច្រើនទៀត ឲ្យចូលរួមចំណែកជួយឧបត្ថម្ភដល់ការកង្វះខាត ក្នុងការបើកបណ្ណាល័យឡើងវិញ ដើម្បីជាប្រយោជន៍ក្នុងការសិក្សាស្រាវជ្រាវ របស់កូនខ្មែរ និងបរទេសផងដែរ។
ដោយក្តីស្រលាញ់ និងពេញចិត្តចំពោះបណ្ណាល័យ សប្បុរសជនជាច្រើនបានចូលរួមជួយឧបត្ថម្ភ នូវទឹកប្រាក់សរុបចំនួនជាង៧ ០០០ដុល្លារ និងសម្ភារ:សម្រាប់បម្រើក្នុងបណ្ណាល័យជាច្រើនទៀត។ ជាចុងក្រោយលោក ក៏បានថ្លែងអំណរគុណដល់សប្បុរសជនទាំងអស់ ដែលបានគាំទ្រ និងចូលរួមជួយឧបត្ថម្ភ ក្នុងការបើកបណ្ណាល័យនេះ ហើយព្រឹត្តិការណ៍សម្ពោធបើកបណ្ណាល័យ នឹងត្រូវធ្វើឡើងនៅរសៀលថ្ងៃទី១៥ ខែធ្នូ ឆ្នាំ២០១៦ ខាងមុខនេះ៕
មតិយោបល់