ភ្នំពេញ: តំណាងសហគមន៍ជ្រោយចង្វា បាននាំគ្នាស្នើដល់អាជ្ញាធរសាលារាជធានីភ្នំពេញជួយអន្តរាគមន៍ជាបន្ទាន់ចំពោះវិវាទដីធ្លី ដែលត្រូវក្រុមហ៊ុនវិនិយោគទុនអនិកជនកម្ពុជា(OCIC) យកមកអភិវឌ្ឍទីក្រុងរណបជ្រោយចង្វា។
សំណើនេះ បានធ្វើឡើងជាថ្មីម្តងទៀតនៅក្នុងវេទិកាសាធារណ:ដែលរៀបចំឡើងដោយអាជ្ញាធរខណ្ឌជ្រោយចង្វា និងគណ:អភិបាលរាជធានីភ្នំពេញ កាលពីព្រឹកថ្ងៃទី២៤ ខែវិច្ឆិកា ក្រោមវត្តមានលោក ជួប ខុន តំណាង លោកម៉ប់ សារិន ប្រធានក្រុមប្រឹក្សារាជធានីភ្នំពេញ និងលោក ស៊ុយ សេរិទ្ធ អភិបាលរងរាជធានីភ្នំពេញ។
តំណាងសហគមន៍ដែលរងគ្រោះពីការបាត់បង់ដីធ្លី បានឲ្យដឹថា ដីធ្លីរបស់ពួកគាត់កំពុងត្រូវបានក្រុមហ៊ុនឈូសឆាយ ខណ:មិនទាន់មានការដោះស្រាយ។ លោក ជា សុផាត តំណាងសហគមន៍នៅភូមិដើមគ សង្កាត់ជ្រោយចង្វា បានស្នើឲ្យអាជ្ញាធរសាលារាជធានីភ្នំពេញបញ្ឈប់ក្រុមហ៊ុនOCICឈូសឆាយដី នៅពេលមិនទាន់បានដោះស្រាយ និងបានស្នើឲ្យឆ្វៀលដីពីគម្រោងអភិវឌ្ឍន៍ជាលក្ខណ:ស្បែកខ្លា ដោយមានតម្លាភាព មានសុក្រិតភាព។ លោកបានបន្តថា ដីលំនៅដ្ឋាន និងស្រែចម្ការរបស់សហគមន៍នៅភូមិដើមគ ត្រូវបានសាលាក្រុងផ្តល់ជម្រើសដល់ម្ចាស់ដីតែ១០ភាគរយប៉ុណ្ណោះ ចំណែក៩០ភាគរយទៀត ត្រូវបានបែងចែកគ្នារវាងសាលាក្រុង និងក្រុមហ៊ុនOCIC ក្នុងនោះសាលាក្រុងដល់៥០ភាគរយ។ បញ្ហានេះហើយដែលធ្វើឲ្យសហគមន៍នៅភូមិដើមគ មិនអាចទទួលយកបាននូវគោលការណ៍ដោះស្រាយមួយនេះ។ លោក បានបញ្ជាក់ទៀតថា មានដីប្រជាពលរដ្ឋក្នុងភូមិដើមគ និងតាមបណ្តោយមាត់ទន្លេសាបរហូតដល់សង្កាត់តាសេកសរុប៦៦គ្រួសារ ស្មើនឹងផ្ទៃដីជាង៩៤ម៉ឺនម៉ែត្រការ៉េ មិនទាន់ឯកភាពយកគោលការណ៍ដោះស្រាយរបស់សាលាក្រុង។
លោក យស សុផាត ប្រជាពលរដ្ឋក្រុម៧នៃភូមិដើមគ បានឲ្យដឹងថា ដីនៅក្រោយតំបន់១០០ម៉ែត្រ ពីច្រាំងទន្លេដែលកំណត់ដោយអាជ្ញាធរ មិនត្រូវបានគេវាស់វែង ដើម្បីចេញប្លង់កម្មសិទ្ធិឲ្យទេ ដោយអាជ្ញាធរវាស់វែងចេញប្លង់កម្មសិទ្ធិឲ្យតែដីណា ដែលនៅមុខតំបន់ដែលកំណត់១០០ម៉ែត្រប៉ុណ្ណោះ។ លោកបានស្នើដល់អាជ្ញាធរក្រុងធ្វើការពិចារណាប្រកបដោយតម្លាភាព និងអាចទទួលយក បានពីការបែងចែកគម្លាតនេះ។
តំណាងអាជ្ញាធរខណ្ឌជ្រោយចង្វា បានឲ្យដឹងថា អាជ្ញាធរខណ្ឌកំពុងជំរុញការដោះស្រាយឲ្យបានឆាប់តាមអាចធ្វើទៅបាន។ លោកបញ្ជាក់ថា បញ្ហាទំនាស់ដីរវាងក្រុមហ៊ុនOCIC និងប្រជាពលរដ្ឋក្នុងសង្កាត់ព្រែកលាប សង្កាត់ជ្រោយចង្វា និងសង្កាត់ព្រែកតាសេក ត្រូវបានអាជ្ញាធរវាស់វែងរួចហើយ ដោយផ្អែកតាមអនុក្រិតរបស់រាជរដ្ឋាភិបាល។ លោកថ្លែងថា ការដោះស្រាយជូនប្រជាពលរដ្ឋដែលនៅសេសសល់ គឺប្រគល់ទៅឲ្យអាជ្ញាធរសាលារាជធានីភ្នំពេញ និងភាគីក្រុមហ៊ុន។
លោក ស៊ុយ សេរិទ្ធ បានគាំទ្រគោលការណ៍ដោះស្រាយដែលមានតម្លាភាព។ ប៉ុន្តែលោកថា កិច្ចការនេះ មិនអាចដោះស្រាយម្តងឲ្យចប់ទាំងអស់នោះទេ។ លោកបន្ថែមថា «មកដល់ពេលនេះយើង ដោះស្រាយបានច្រើនហើយ ហើយខ្ញុំនឹងបន្តដោះស្រាយទៀត»។
សាលារាជធានីភ្នំពេញ កាលពីឆ្នាំ២០១១ បានចុះកិច្ចសន្យាជាមួយ ក្រុមហ៊ុនOCIC របស់លោកឧកញ៉ា ពុង ឃាវសែ ដើម្បីជួលដីតំបន់ជ្រោយចង្វាចំនួន៣៨៧ហិកតា រយ:ពេល៩៩ឆ្នាំ ដើម្បីអភិវឌ្ឍន៍ទៅជាទីក្រុងរណប ក្នុងទុនវិនិយោគចំនួន៤៨៦លានដុល្លារអាមេរិក ដើម្បីប្រែក្លាយតំបន់នោះទៅជាតំបន់ពាណិជ្ជកម្ម ផ្សារទំនើប កន្លែងកម្សាន្ត អគារពាណិជ្ជកម្មខ្ពស់ៗ ផ្ទះល្វែង ផ្ទះវីឡា កន្លែងធ្វើការ ដែលប្រកបដោយផាសុខភាព។ មានប្រជាពលរដ្ឋជាច្រើនរយគ្រួសារបានរងផលប៉ះពាល់លើដីលំនៅដ្ឋាន ស្រែចម្ការ ពីគម្រោងអភិវឌ្ឍន៍មួយនេះ៕
មតិយោបល់