ភ្នំពេញ: បុរសម្នាក់សង្ស័យប្រើប្រាស់ថ្នាំញៀនជ្រុលដល់កម្រឹតរហូតបែក វង្វេងលោតផ្លោះរបងចូលក្នុងសាលារៀនអាមេរិចកាំងប្រីដ ត្រូវបានសមត្ថកិច្ចឃាត់ខ្លួន កាលពីវេលាម៉ោង១០និង៥០នាទីព្រឹក ថ្ងៃទី២៤ ខែវិច្ឆិកា ឆ្នាំ២០១៦ ខាងកើតជាប់ស្តុបកាណាឌីយ៉ា ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ ។

សមត្ថកិច្ចបានឲ្យដឹងថា បុរសខាងលើស្ថិតក្នុងសភាពវង្វេងវង្វាន់ស្មារតី មានឈ្មោះ យិន ឌីណា អាយុ៣១ឆ្នាំ ស្នាក់នៅភូមិឫស្សី មានស្រុកកំណើតនៅខេត្តកំពង់ចាម ។

តាមប្រភពនៅកន្លែងកើតហេតុបានឲ្យដឹងថា មុនកើតហេតុ បុរសខាងលើបានផ្លោះរបងចូលទៅក្នុងបរិវេណសាលាអាមេរិចកាំងប្រីដ ទៅឈរកន្លែងផ្ញើរម៉ូតូ ឃើញដូច្នេះ សន្តិសុខសាលាស្រែកសួរ បែរជារត់គេច ទើបស្រែកចោរៗ ផ្អើលនាំគ្នាដេញចាប់បានភ្លាមៗ ដឹកយកមកប្រគល់ឲ្យនគរបាលប៉ុស្តិ៍ចោមចៅ។

បុរសខាងលើ តាមការពិនិត្យជាក់ស្តែងជាមនុស្សបែកថ្នាំ រហូតដល់វង្វេងស្មារតី និយាយស្តីលែងដឹងខុសត្រូវ។ បើតាមបុរសខាងលើ បានឲ្យដឹងថា រូបគេនិងបក្ខពួកសរុប៧នាក់ បានជួបជុំគ្នាជក់ថ្នាំរួចរាល់ហើយ ចែកផ្លូវគ្នាទៅផ្ទះ ចំណែកខ្លួនក៏ដើរត្រឡប់ទៅផ្ទះវិញ។

ក្រោយពីចាប់ឃាត់ខ្លួនបុរសខាងលើ យកមកប្រគល់ឲ្យប៉ុស្តិ៍សមត្ថកិច្ច ទុកឲ្យអង្គុយមួយសន្ទុះរងចាំស្វាងបន្តិច ធ្វើការអប់រំរួច ទើបអនុញាតិឲ្យវិលត្រឡប់ទៅវិញ៕