កណ្តាល: កាំភ្លើង AK ស្វាយបត់១ដើម ត្រូវបានក្មេងដើររើសអេតចាយប្រទះឃើញនៅក្នុងព្រៃចេក ត្រង់ចំណុចភូមិរទាំង ឃុំភូមិធំ ស្រុកកៀនស្វាយ ខេត្តកណ្តាលកាលពីវេលាម៉ោង១១ថ្ងៃទី២៥ ខែវិច្ឆិកា ឆ្នាំ២០១៦ ហើយរាយការណ៍ជូនសមត្ថកិច្ច។

លោក យឹម សុខខុម នាយប៉ុស្តិ៍រដ្ឋបាលឃុំភូមិធំបានឲ្យដឹងថា ក្រោយទទួលព័ត៌មានពីពលរដ្ឋថា មានក្មេងដើររើសអេតចាយបានប្រទះឃើញកាំភ្លើងនៅត្រង់ចំណុចកើតហេតុ លោកក៏បញ្ជាឲ្យសមត្ថកិច្ចបានបានចុះទៅធ្វើការត្រួតពិនិត្យភ្លាម។ បន្ទាប់ពីចុះទៅដល់កន្លែតកើតហេតុ សមត្ថកិច្ចបានរកឃើញ អាវុធម៉ាក AK ស្វាយបត់១ដើមលេខ១៩៧១TP១៨៥១ មានបង់១ មានគ្រាប់ចំនួន៤គ្រាប់ ទូរសព្ទដៃ១គ្រឿងម៉ាក imobite គ្មានស៊ីមនិងថ្មទេ។

លោក យឹម សុខខុម បានបន្តថា ក្រោយពីធ្វើការត្រួតពិនិត្យរួចកម្លាំងប៉ុស្តិ៍បានយកអាវុធខាងលើនេះជូនលោកអធិការដ្ឋានស្រុកកៀនស្វាយចាត់ការតាមនីតិវិធី៕