ខណ:ពេលក្រុមហ៊ុនជាច្រើនដូចជា Telsa កំពុងព្យាយាមធ្វើទំនើបកម្មលើបច្ចេកវិជ្ជារថយន្តអគ្គីសនី ដើម្បីកាត់បន្ថយការសាយភាយឧស្ម័នផ្ទាំងកញ្ចក់ ក្រុមហ៊ុន Uniti Sweden របស់ប្រទេសស្វីស បានបញ្ចេញគម្រោងកូនរថយន្តអគ្គីសនីបំពាក់បច្ចេកវិជ្ជា ដ៏ទំនើបលំដាប់កំពូលមួយ ដែលរចនាឡើង សម្រាប់ការបើកបរក្នុងទីក្រុង។

ក្រុមហ៊ុនមួយនេះ បានរៃកង្គាស៍ប្រាក់បានជាងមួយលានដុល្លារហើយតាមរយ: FundedByMe សម្រាប់ធ្វើឱ្យគម្រោង រថយន្តការពារបរិស្ថានដ៏ទំនើបរបស់ខ្លួនក្លាយជាការពិត។ កូនឡានកៅអីពីរនេះ ត្រូវបានរចនាឡើងជាពិសេស សម្រាប់ការធ្វើដំណើរទៅមកលើចម្ងាយផ្លូវជិតៗ ដូចជាក្នុងទីក្រុងដែលមានស្ថានភាពចរាចរណ៍មមាញឹក

ទោះបីជាវាអាចបើកបរបានចម្ងាយ ១៥០ គីឡូម៉ែត្រក៏ដោយ។ វាមានទម្ងន់ ៤០០ គីឡូក្រាម និងប្រើម៉ូទ័រកម្លាំង ១៥ គីឡូវ៉ាត់ ប៉ុន្តែអ្វីដែលគួរឱ្យចាប់អារម្មណ៍ខ្លាំងបំផុតនោះគឺ វាបំពាក់បច្ចេកវិជ្ជាអនាគតមួយចំនួនដូចជា កញ្ចក់មុខខាងលើ បំពាក់បច្ចេកវិជ្ជា Augmented Reality សម្រាប់ផ្តល់ព័ត៌មាន អំពីល្បឿនរថយន្តពេលកំពុងបើកបរ លើដងផ្លូវ បច្ចេកវិជ្ជាចាប់ចលនាក្បាល និងដៃរបស់អ្នកបើកបរ និងបច្ចេកវិជ្ជាបើកបរដោយស្វ័យប្រវត្តិ។

តាមការបញ្ជាក់របស់ក្រុមហ៊ុន ប្រាក់ចំនួនជាងមួយលានដុល្លារ ដែលទើបរៃអង្គាស៍បាននោះ នឹងយកទៅធ្វើការអភិវឌ្ឍបច្ចេកវិជ្ជាខាងលើ បង្កើតរថយន្តគំរូ និងពង្រីកក្រុមហ៊ុន ហើយពួកគេគ្រោងនឹងបញ្ចប់រថយន្តគំរូរបស់ពួកគេក្នុងឆ្នាំ ២០១៧៕ ប្រភពព័ត៌មាន៖ inhabitat.com