ភ្នំពេញៈ ដើម្បីដោះស្រាយបញ្ហាគ្រោះថ្នាក់ចរាចរណ៍នៅក្នុងប្រទេសកម្ពុជា នាពេលបច្ចុប្បន្ននេះ អង្គការ API និងដៃគូពាក់ព័ន្ធរួមមាន ស្ថាប័នរដ្ឋាភិបាល អង្គការមិនមែនរដ្ឋាភិបាល និងស្ថាប័នផ្សព្វផ្សាយ បានបើកកិច្ចប្រជុំពិគ្រោះយោបល់មួយ ស្តីពី សុវត្ថិភាពចរាចរណ៍ផ្លូវគោកនៅកម្ពុជា និងស្វែងរកយុត្តិសាស្ត្រលុបបំបាត់បញ្ហាប្រឈមនៃការអនុវត្តន៍ច្បាប់ចរាចរណ៍ផ្លូវគោកថ្មី។

កម្មវិធីនេះបានធ្វើឡើងរយៈពេលមួយថ្ងៃទី២៩ ខែវិច្ឆិកា ឆ្នាំ២០១៦ នៅសណ្ឋាគារ អ៊ីនធឺខន ធីណេងតាល់ ក្រោមអធិបតីភាពលោក តូច ចាន់កុសល អនុរដ្ឋលេខាធិការក្រសួងសាធារណៈការ និងដឹកជញ្ជូន និងជាអនុប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក។

លោក ណែប ស៊ីនថៃ នាយកអង្គការ API បានមានប្រសាសន៍ថា កិច្ចប្រជុំនៅថ្ងៃនេះមានគោលបំណងឲ្យភាគីពាក់ព័ន្ធទាំងថ្នាក់ជាតិថ្នាក់មូលដ្ឋាន និងអង្គការដៃគូ ចូលរួមពិភាក្សាគ្នាយ៉ាងផុសផុល ដើម្បីរកនូវចំណុចខ្វះចន្លោះនៃការអនុវត្តន៍ច្បាប់ និងជំរុញឲ្យមានការអនុត្តន៍ច្បាប់ចរាចរណ៍ថ្មីនេះប្រកបដោយប្រសិទ្ធភាព សំដៅកាត់បន្ថយជាអតិបរមានៃអត្រាគ្រោះថ្នាក់ចរាចរណ៍។

លោក តូច ចាន់កុសល បានថ្លែងថា នៅក្នុងឆ្នាំ២០១៥ មានពលរដ្ឋខ្មែរស្លាប់ដោយសារគ្រោះថ្នាក់ចរាចរណ៍មានចំនួន ២.២៣១នាក់ និងរងរបួសចំនួន ៥.៤៥០នាក់ ដែលមានតួលេខអ្នកស្លាប់មានចំនួនច្រើនជាងការស្លាប់ដោយមេរោគអេដស៍ និងរងគ្រោះដោយសារមីនទៅទៀត។លោកបន្តថា កម្ពុជាបានខាតបង់ថវិកា ជាច្រើនពាន់លានរៀលក្នុងមួយឆ្នាំៗដោយសារគ្រោះថ្នាក់ចរាចរណ៍ ដោយមិនទាន់រាប់បញ្ចូលបញ្ហា ជាផលវិបាកសង្គមដែលបន្សល់ពីបញ្ហាគ្រោះចរាចរណ៍នេះរួមមាន ស្រីមេម៉ាយ ក្មេងកំព្រា ជនពិការ ជាដើម។ លោកសង្ឃឹមថា កិច្ចប្រជុំពិភាក្សានៅថ្ងៃនេះនឹងបានចូលរួមចំណែកក្នុងការសម្រេចឲ្យបាននូវ គោលនយោបាយជាតិស្តីពី សុវត្ថិភាពចរាចរណ៍ផ្លូវគោក ២០១១-២០២០ ដែលរាជរដ្ឋាភិបាលប្តេជ្ញាកាត់បន្ថយគ្រោះថ្នាក់ចរាចរណ៍ឲ្យបាន ៥០ភាគរយនៅបំណាច់ឆ្នាំ២០២០។

បើយោងតាមសេចក្តីថ្លែងការណ៍រួមរបស់ស្ថាប័នពាក់ព័ន្ធដែលធ្វើការលើវិស័យសុវត្ថិភាពចរាចរណ៍ផ្លូវគោកនៅកម្ពុជាបានឲ្យដឹងថា យ៉ាងហោចណាស់មានពលរដ្ឋខ្មែរស្លាប់ចំនួន៦នាក់ និងរងរបួសធ្ងន់ចំនួន១៧ នាក់ ក្នុងមួយថ្ងៃៗដោយសារតែគ្រោះថ្នាក់ចរាចរណ៍។

របាយការណ៍របស់គណៈកម្មាធិការសុវត្ថិភាពចរាចរណ៍ផ្លូវគោកបានបង្ហាញថា នៅក្រោយពេលដែលរដ្ឋាភិបាលកម្ពុជាបានដាក់ចេញ ឲ្យអនុវត្តនូវច្បាប់ចរាចរណ៍ផ្លូវគោកថ្មី កាលពីថ្ងៃទី១ ខែមករា ឆ្នាំ២០១៦ មក នៅក្នុងរយៈពេល១១ខែ នៃឆ្នាំ២០១៦នេះ ការគោរពច្បាប់ចរាចរណ៍របស់ពលរដ្ឋខ្មែរហាក់មានការកើនឡើង ជាពិសេសការបើកបរទោចក្រយានយន្តពាក់ពួកសុវត្ថិភាព គឺមានចំនួន ៩០ភាគរយ។ ទោះយ៉ាងណា របាយការណ៍នៅតែបង្ហាញថា បញ្ហាគ្រោះថ្នាក់ចរាចរណ៍នៅតែកើតឡើងគួរជាទីព្រួយបារម្ភនៅឡើយ ដោយកត្តាមនុស្សចំនួន ៩៥ភាគរយ ដូចជា ទី១.ការបើកបរលើសល្បឿនកំណត់ ទី២.ការបើកបរក្រោមឥទ្ធិពលនៃគ្រឿងស្រវឹង និង៣.ការមិនពាក់មួកសុវត្ថិភាព ឬខ្សែក្រវ៉ាត់សុវត្ថិភាពក្នុងពេលបើកបរ៕

https://youtu.be/cqFoyvfUxbM