ភ្នំពេញ: បុរសម្នាក់ ត្រូវបានសមត្ថកិច្ចឃាត់ខ្លួនយកមកកាន់ប៉ុស្តិ៍រដ្ឋបាលសង្កាត់ទន្លេបាសាក់ កាលពីវេលាម៉ោង ៩និង ៣០នាទីព្រឹក ថ្ងៃទី ២៩ខែ វិច្ឆិកា ឆ្នាំ ២០១៦ ក្រោយពីបុរសរូបនេះ បានបង្កហិង្សាវាយទៅលើបុរសម្នាក់មួយដៃ បណ្តាលឲ្យរងបួសហូរឈាមបែកចិញ្ចើមវេលាម៉ោង ២ និង៣០នាទី រសៀល ថ្ងៃទី ២៦ ខែ វិច្ឆិកា ឆ្នាំ ២០១៦ នៅក្នុងដារដ្ឋានសំណង់មួយកន្លែងដែលមានទីតាំងនៅក្នុងសង្កាត់ទន្លេបាសាក់ ខណ្ឌចម្ការមន ដោយសម្របសម្រួលគ្នាសងសំណងជាទឹកប្រាក់ចំនួន ១០០ដុល្លារដើម្បីបញ្ចប់រឿង។

តាមប្រភពព័ត៌មានពីនគរបាលប៉ុស្តិ៍បានប្រាប់ឱ្យដឹងថា បុរសជាជនដៃដល់មានឈ្មោះ មាន សារី អាយុ ២២ឆ្នាំ មុខរបរជាកម្មករសំណង់ មានស្រុកកំណើតនៅភូមិ តាពៅ ឃុំ ពញាឮ ស្រុកកោះចិន ខេត្តកណ្តាល។ បុរសរងគ្រោះមានឈ្មោះ ស រ៉ា មុខរបរជាកម្មករសំណង់ មានស្រុកកំណើតនៅភូមិ ក្តីដូង ឃុំ រោងដំរី ស្រុក បាភ្នំ ខេត្តព្រៃវែង។

មុនពេលកើតហេតុ កាលពីវេលាម៉ោង ២ និង ៣០នាទីរសៀល ថ្ងៃទី ២៦ ខែវិច្ឆិកា ឆ្នាំ ២០១៦ កន្លងទៅនេះ បុរសជាជនដៃដល់បានប្រើឲ្យបុរសរងគ្រោះទៅទិញស្រាមកឲ្យគេផឹក ហើយបុរសរងគ្រោះមិនទៅ ក៏ត្រូវបុរសជាជនដៃដល់ស្ទុះទៅវាយមួយដៃបណ្តាលឲ្យបែកចិញ្ចើមខាងឆ្វេងហូរឈាមស្រោចពេញខ្លួនរងរបួសតែម្តង។ ក្រោយពេលកើតហេតុ បុររសរងគ្រោះក៏ត្រូវបានគេបញ្ជូនទៅធ្វើការព្យាបាលនៅគ្លីនិកឯកជនមួយ ដោយដេរអស់ចំនួន២ថ្នេរ និងរត់ទៅដាក់ពាក្យបណ្តឹងនៅនគរបាលប៉ុស្តិ៍ទន្លេបាសាក់ ដើម្បីឲ្យជួយរកយុត្តិធ៌មឲ្យរូបគាត់។

លុះក្រោយពីទទួលបាននូវពាក្យបណ្តឹងពីជនរងគ្រោះរួចហើយ កម្លាំងនគរបាលប៉ុស្តិ៍បាលប៉ុស្តិ៍ទន្លេបាសាក់ ក៏កោះហៅបុរសជាជនដៃដល់ឲ្យមកធ្វើការដោះស្រាយជាមួយនិងបុរសរងគ្រោះផងដែរ ដោយភាគីបុរសជាជនបង្ករបានសងថ្លៃព្យាបាលចំនួន ១០០ដុល្លារដើម្បីបញ្ចប់រឿងប្រើអំពើរហិង្សាខាងលើនេះទៅ៕