កណ្តាល: មន្ត្រីជាន់ខ្ពស់មន្ទីរសាធារណ:ការ និងដឹកជញ្ជូនខេត្តកណ្តាល ជំរុញឲ្យប្រធានការិយាល័យនៅតាមបណ្តាស្រុក ត្រូវតែចុះពិនិត្យផ្លូវ និងស្លាកសញ្ញាឲ្យបានជាប់ជាប្រចាំ ហើយប្រសិនបើមានការខូចខាតត្រូវរាយការណ៍មកមន្ទីរជាបន្ទាន់។

លោក ម៉ឹង យូឡេង ប្រធានមន្ទីរសាធារណ:ការ និងដឹកជញ្ជូនខេត្តកណ្តាល បានជំរុញឲ្យមន្ត្រីទាំងអស់ត្រូវតយកចិត្តទុកដាក់បំពេញតួនាទីភារ:កិច្ច ដែលមន្ទីរប្រគល់ឲ្យ និងមានការទទួលខុសត្រូវលើការងាររបស់ខ្លួនឲ្យបានម៉ឺងម៉ាត់ ហើយមិនត្រូវមានភាពខ្ជិលច្រអូសធ្វើការលំៗ ឃើញកន្ទេលធំបន្លំដេកនោះទេ។ ការលើកឡើងនេះ ក្នុងពិធីបំពាក់សម្ភារ: រួ
មមានអាវចំណាំងផ្លាត មួក ឧបករណ៍សម្គាល់ការដ្ឋានទៅដល់មន្ត្រីកាលពីពេលកន្លងទៅនេះ។

លោកមានប្រសាសន៍បន្តថា ក្នុងនាមមន្ត្រីរាជការដែលទទួលប្រាក់បៀវត្សពីរាជរដ្ឋាភិបាល ត្រូវតែខិតខំបំពេញការងារឲ្យបានល្អប្រសើរ ដើម្បីបម្រើប្រជាពលរដ្ឋ និងសង្គមជាតិ។ ក្នុងការចុះបំពេញការងារត្រូវតែមានការទទួលខុសត្រូវខ្ពស់ ជាពិសេសអស់លោក ដែលជាប្រធានការិយានៅតាមបណ្តារស្រុកនីមួយៗ គឺត្រូវតែមានការទទួលខុសត្រូវខ្ពស់ ក្នុងការដឹកនាំមន្ត្រីក្រោមឱវាទធ្វើយ៉ាងណាឲ្យការងារមានភាពរលូនទៅមុខ ព្រមទាំងមានសាមគ្គីល្អ រវាងថ្នាំដឹកនាំនិងមន្ត្រី។

លោកក៏បានបញ្ជាក់ដែរថា ប្រធានការិយាល័យនៅតាមស្រុកនីមួយៗ ត្រូវតែចុះត្រួតពិនិត្យមើលផ្លូវ ស្ពាន នៅក្នុងភូមិសាស្ត្ររបស់ខ្លួនឲ្យបានជាប្រចាំ និងត្រូវរាយការណ៍អំពីស្ថានភាពផ្លូវស្ពាន ដែលកំពុងរងការខូចខាត និងទ្រុឌទ្រោមមកមន្ទីរជាបន្ទាន់ដើម្បីឲ្យមន្ទីរងាយស្រួលក្នុងការចាត់វិធានការ ចុះទៅធ្វើការជួសជុលសម្រួលដល់ការធ្វើដំណើររបស់ប្រជាពលរដ្ឋទាន់ពេលវេលា។ ជាងនេះទៅទៀតប្រសិនបើស្រុកណាមិនបានរាយការណ៍ឲ្យទាន់ពេលវេលា គឺត្រូវទទួលខុសត្រូវដោយខ្លួនឯង ព្រោះមន្ទីរបានទិញទូរសព្ទស្មាតហ្វូនឲ្យគ្រប់ៗគ្នាអស់ហើយ។ ក្រៅពីនោះត្រូវតែត្រួតពិនិត្យនូវស្លាកសម្គាល់ចរាចរណ៍ឲ្យបានខ្ជាប់ខ្ជួន ព្រោះប្រសិនបើនៅតាមផ្លូវពុំមានស្លាកសម្គាល់ចរាចរណ៍គ្រប់គ្រាន់នោះ វាក៏ជាកត្តាបណ្តាលឲ្យកើតមានគ្រោះថ្នាក់ចរាចរណ៍ជាយថាហេតុផងដែរ៕