ភ្នំពេញៈ ប្រជាពលរដ្ឋប្រមាណជាង៤០គ្រួសារ រស់នៅក្រុមទី៦ ភូមិបុរី១០០ខ្នង សង្កាត់ទឹកថ្លា ខណ្ឌសែនសុខ រាជធានីភ្នំពេញ បានសម្តែងការខកចិត្តយ៉ាងខ្លាំងចំពោះអាជ្ញាធរខណ្ឌសែនសុខ ដែលគ្មានចំណាត់ការ បញ្ហាមន្ត្រីយោធាម្នាក់បានសង់របងផ្ទះរំលោភយកចំណីផ្លូវសាធារណៈរបស់រដ្ឋ និងបានបង្កឱ្យមានការលំបាកដល់ពលរដ្ឋដែលរស់នៅក្នុងភូមិ ក្នុងការធ្វើដំណើរ។

លោក អ៊ូ សារី ជាតំណាងប្រជាពលរដ្ឋ៤០គ្រួសារបានថ្លែងថា បញ្ហាមន្រី្តយោធាម្នាក់ឈ្មោះ ចុន ផោះ អាងអំណាចរំលោភយកផ្លូវសាធារណៈប៉ះពាល់ដល់ការធ្វើដំណើររបស់ប្រជាពលរដ្ឋ បានកើតឡើងតាំងពីថ្ងៃទី១៩ ខែមិថុនា ឆ្នាំ២០១៤ ដល់បច្ចុប្បន្ននេះ គឺអាជ្ញាធរខណ្ឌសែនសុខ បានត្រឹមតែសន្យាថាដោះស្រាយ តែបែរជាមិនដោះស្រាយ ដោយលើកហេតុផលថារវល់។

តំណាងប្រជាពលរដ្ឋបានបន្តថា នៅថ្ងៃទី២៥ ខែវិច្ឆិកា ឆ្នាំ២០១៦ លោក កែវ សាម៉ុល នាយករដ្ឋបាលសាលាខណ្ឌសែនសុខ បានកោះអញ្ជើញតំណាងពលរដ្ឋចំនួន៦នាក់ឱ្យទៅជួបលោក សាំង សុភៈវិចិត្រ ដែលជាអភិបាលរងខណ្ឌ នៅរសៀលថ្ងៃទី២៨ ខែវិច្ឆិកា ឆ្នាំ២០១៦ ដើម្បីដោះស្រាយបញ្ហានេះ ប៉ុន្តែលោក សាំង សុភៈវិចិត្រ មិនបានជួបប្រជាពលរដ្ឋដូចកាលកំណត់ទេ បែរជាលើកពេលពីម៉ោង ២កន្លះ ទៅម៉ោង ៣ និងចុងបញ្ចប់ គឺថារវល់ណាស់មិនអាចជួបប្រជាពលរដ្ឋបាននោះទេ។

លោក អ៊ូ សារី បញ្ជាក់ថា ដោយអស់ជំនឿលើអាជ្ញាធរប្រជាពលរដ្ឋបាន បង្ហោះសេចក្តីខកចិត្តនេះចូលទៅក្នុង ទំព័រហ្វេសប៊ុក របស់សម្តេច តេជោ នាយករដ្ឋមន្ត្រីផងដែរដើម្បីសុំអន្តរាគមន៍ពីសម្តេច។

លោកស្រី សាន ឡៃហ៊ាង ភរិយាលោក ចុន ផោះ បានថ្លែងប្រាប់អ្នកសារព័ត៌មានថា កន្លងមកប្រជាពលរដ្ឋធ្លាប់បានប្តឹងលោកស្រី និងប្តីទៅសាលាសង្កាត់រឿង រំលោភយកចំណីផ្លូវនេះដែរ ហើយលោកស្រីបានសុំបាំងរបងតែពេលយប់ ពេលថ្ងៃបើកធម្មតា តែប្រជាពលរដ្ឋមិនព្រម និងប្តឹងទៅខណ្ឌ ឱ្យចុះមកដោះស្រាយឱ្យលោកស្រីថយរបងទៅក្រោយ ១,៣ម៉ែត្រ លោកស្រីក៏បានព្រមដែរ។ លោកស្រីបន្ថែមថា បើរដ្ឋត្រូវការពង្រីកផ្លូវត្រូវកាត់សំយ៉ាប ឬត្រូវចូលដីលោកស្រីនោះ គ្រួសារលោកស្រីស្ម័គ្រចិត្តឱ្យរដ្ឋធ្វើតាមច្បាប់។ លោកស្រីបន្តថា បើរដ្ឋចង់ពង្រីក សូមរដ្ឋពង្រីកទាំងអស់គ្នា មិនមែនមកពង្រីកតែចំណុចផ្ទះលោកស្រីនោះទេ។

លោក សាំង សុភៈវិចិត្រ អភិបាលរងខណ្ឌសែនសុខ បានថ្លែងថា លោកធ្លាប់បានកោះហៅពលរដ្ឋមកដោះស្រាយកាលពីថ្ងៃទី២៨ វិច្ឆិកា នោះមែន ប៉ុន្តែការណាត់ជួបដោះស្រាយនោះ ត្រូវបានខកខានដោយសារលោករវល់ការងារចុះឈ្មោះបោះឆ្នោត។ លោកបន្តថា លោកនឹងកោះហៅពលរដ្ឋមកដោះស្រាយបញ្ហានេះ ជាថ្មីទៀតក្នុងពេលឆាប់ៗនេះ៕