បន្ទាយមានជ័យ: ប្រជាពលរដ្ឋជាច្រើនបាន ខ្សឹបប្រាប់មក នាយក្តាមប្រៃ ឲ្យដឹងថា ក្លឹបម៉ាស្សា នឹងស្នូកឃើរ មួយកន្លែង ស្ថិតនៅក្បែរផ្សាររាត្រី ក្នុងភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត មានលួចបង្កប់លេងល្បែងបៀស៊ីសងគ្រប់ប្រភេទ លេងជា ទ្រង់ទ្រាយធំ ដែលអ្នកលេងមួយចំនួនជាមន្ត្រីសមត្ថកិច្ច និងអាជីវករក្រុងប៉ោយប៉ែត នឹងមានក្មេងៗស្ទាវជាច្រើនផងដែរ។
ប្រភពខាងលើបានខ្សឹបប្រាប់នាយ ក្តាមប្រៃ ឱ្យដឹងទៀតថា អ្នកលេងល្បែងបៀស៊ីសងមានទាំងប្រុស មានទាំងស្រី មិនតិចជាង១០០នាក់នោះទេបានចូលមកលេងល្បែងនៅក្លឹងខាងលើនេះ។
ប្រភពនៅខ្សឹបទៀតថា អ្នកញៀនល្បែងពេលលេងអ្នក ឈ្នះមុខខ្លាញ់ អ្នកចាញ់មុខសេះ ដោយម្នាក់ៗលេងចាញ់ រាប់ម៉ឺនរៀល ខ្លះរាប់លាន់រៀល នឹងខ្លះទៀតអស់រាប់ពាន់ដុល្លារផងដែរ នៅទីតាំងខាងលើ។
ប្រភពដដែលបានខ្សឹបប្រាប់នាយ ក្តាមប្រៃ ឱ្យដឹងទៀតថា ពីមុនអ្នកញៀនល្បែងមួយចំនួនធំគេធ្លាប់តែលេងនៅហាងគុយទាវយីហោ «តាំង ប៊ុនហេង» ប៉ុន្តែដោយសារតែហាងគុយទាវនេះ ត្រូវសមត្ថកិច្ចបង្ក្រាបនឹង ឃាត់ខ្លួនអ្នកលេង និងម្ចាស់កាល២ខែមុននោះរួចមក ទើបពួកគេទៅលេងនៅក្លឹបម៉ាស្សា ហាត់ប្រាណនិងស្នុកឃើរគ្មានយីហោ ដែលគេដឹងថាមានអ្នកមើលការខុសត្រូវនិងម្ចាស់ជាមន្ត្រីកងរាជអាវុធហត្ថខេត្តបន្ទាយមានជ័យ ។
ប្រជាពលរដ្ឋបានខ្សឹបប្រាប់នាយ ក្តាមប្រៃ ទៀតថា ក្រៅពីទីតាំងក្លឹបម៉ាស្សាបង្កប់ល្បែងស៊ីសងខាងលើ ក៏មានការបើកល្បែងស៊ីសងជាច្រើនទៀតនៅក្បែរនោះដែរដូចជាហ្គេមបាញ់ត្រី ដែលគេស្គាល់ថាទីតាំងហ្គេមបាញ់ត្រីនេះជារបស់មន្ត្រីច្រកទ្វារអន្តរជាតិប៉ោយប៉ែតដែលមានអំណាចម្នាក់ ។
ប្រជាពលរដ្ឋក៏បានសំណូមពរដល់លោកស្នងការនគរបាលខេត្ត លោកអភិបាលខេត្តនឹងអភិបាលក្រុងប៉ោយប៉ែត ចុះទៅបង្ក្រាបទីតាំងក្លឹបម៉ាស្សាបង្កប់ល្បែងស៊ីសង និងទីតាំងល្បែងភ្នាល់បាល់តាមអនឡាញជាច្រើនទៀតនៅក្នុងក្រុងប៉ោយប៉ែត ។
បើនៅតែបណ្តែតបណ្តោយបែបនេះបទល្មើសនឹងកើតឡើងកាន់តែច្រើន ដែលផ្ទុយពីគោលការណ៍ភូមិឃុំមានសុវត្តិភាព៕
មតិយោបល់