ភ្នំពេញៈ បុរសម្នាក់ បានបែកក្បាលស្លាប់ក្នុងថ្លុកឈាមយ៉ាងរន្ធត់ ក្នុងហេតុការណ៍គ្រោះថ្នាក់ចរាចរណ៍រវាងម៉ូតូ២គ្រឿងបុកគ្នាកាលវេលាម៉ោង៦និង៣០នាទីព្រឹកថ្ងៃទី៣ ខែធ្នូ ឆ្នាំ២០១៦ នៅចំណុចមុខផ្ទះលេខ៦៧៥C តាមផ្លូវ៣១០ ស្ថិតនៅភូមិ៥ សង្កាត់អូឡាំពិច ខណ្ឌចំការមន រាជធានីភ្នំពេញ។

ប្រភពពីសាក្សីឃើញហេតុការណ៍បានឲ្យដឹងថា នៅមុនពេលកើតហេតុគេឃើញម៉ាក ZOOMER.X ពណ៌ខ្មៅ ពាក់ស្លាកលេខ ភ្នំពេញ 1FU-៩៩៤៤ បញ្ជ្រាសទិសគ្នា ពេលមកដល់ចំណុចខាងលើ បានបុកជាមួយម៉ូតូម៉ាកវីវ៉ា ពណ៌ខ្មៅ ពាក់ស្លាកលេខ ភ្នំពេញ 1AB-៥៨៥៣ ពេញទំហឹង បណ្ដាលឲ្យបុរសម្នាក់ជិះម៉ូតូវីវ៉ាស្លាប់ភ្លាមៗនៅនឹងកន្លែងកើតហេតុ រីឯភាគីម្ខាងទៀត រងរបួស ត្រូវបានគេបញ្ជូនទៅកាន់មន្ទីរពេទ្យឯកជន។

ជនរងគ្រោះ ដែលបាត់បង់ជីវិតមានឈ្មោះ គឹម សិរី ភេទប្រុស អាយុ៤២ឆ្នាំ មុខរបរសន្តិសុខក្រុមហ៊នខេមបូឌា សេហ្វធី ស្នាក់នៅភូមិក្ដីតាកុយ សង្កាត់វាលស្បូវ ខណ្ឌច្បារអំពៅ រាជធានីភ្នំពេញ។

ក្រោយកើតហេតុនគរបាលចរាចរណ៍ បានចុះទៅអន្តរាគមន៍ ធ្វើការវាស់វែង រួចទំនាក់ទំនងទៅក្រុមគ្រួសារមកទទួលយកសាកសពទៅធ្វើបុណ្យតាមប្រពៃណី។ ដោយឡែកម៉ូតូទាំង២គ្រឿង សមត្ថកិច្ចដឹកយកមករក្សាទុកប៉ុស្តិ៍ ដើម្បីរង់ចាំដោះស្រាយពេលក្រោយ៕