កណ្តាលៈ គ្រោះថ្នាក់ចរាចរមួយបានកើតឡើងរវាងម៉ូតូនឹងម៉ូតូ បណ្តាលឲ្យមនុស្សចំនួន៣នាក់រងរបួសធ្ងន់ស្រាល កាលពីវេលាម៉ោង១០និង៥នាទី ថ្ងៃទី១១ ខែធ្នូ ឆ្នាំ២០១៦ ត្រង់ចំណុចមុខផ្ទះលក់គ្រឿងសំណង់យីហោ ង៉ូវ ងួនហេងII លើផ្លូវជាតិលេខ២ ស្ថិតក្នុងភូមិដើមគ សង្កាត់ដើមមៀន ក្រុងតាខ្មៅ។

សមត្ថកិច្ចបានឲ្យដឹងថា ករណីគ្រោះថ្នាក់ចរាចរនេះ បង្កដោយម៉ូតូម៉ាក Honda Dream C125 ពណ៌ខ្មៅ សេរី2015 ពាក់ស្លាកលេខ ភ្នំពេញ 1CW-4164(គ្មានកញ្ចក់មើលក្រោយនិងមិនពាក់មួកសុវត្ថិភាព) បើកបរដោយឈ្មោះ ផាត សុខហេង ភេទប្រុស អាយុ២៩ឆ្នាំ(របួសធ្ងន់បាក់ស្មងជើងស្តាំ) មានទីលំនៅក្នុងភូមិព្រែកតាគង់ សង្កាត់ចាក់អង្រែលើ ខណ្ឌមានជ័យ និងអ្នករួមដំណើរពីក្រោយឈ្មោះ គាំ វិច្ឆិកា ភេទប្រុស អាយុ២៨ឆ្នាំ(របួសស្រាល)មានទីលំនៅក្នុងភូមិ ឃុំជាមួយអ្នកបើកបរខាងលើ ហើយ បើកបរក្នុងទិសដៅឆ្លងផ្លូវពីលិចមកកើត(បត់ឆ្វេង)(បញ្ច្រាសផ្លាកសញ្ញាហាមចូល)មកដល់ចំណុចខាងលើបានបុកជាមួយម៉ូត ម៉ាក Honda Dream C125 ពណ៌ខ្មៅ ស៊េរី2014 ពាក់ស្លាកលេខ ភ្នំពេញ 1CR-5648(មានកញ្ចក់មើលក្រោយតែមិនពាក់មួកសុវត្ថិភាព)បើកបរដោយឈ្មោះ សឿន សុខធូ ភេទប្រុស អាយុ២១ឆ្នាំ (របួសធ្ងន់) មានទីលំនៅក្នុងសង្កាត់ចាក់អង្រែក្រោម ខណ្ឌមានជ័យ ធ្វើដំណើរក្នុងទិសដៅគ្នាពីជើងមកត្បូង។

បច្ចុប្បន្ន អ្នកបើកបរម៉ូតូទាំង២នាក់ដែលរងរបួសធ្ងន់ ត្រូវបានសាច់ញាតិដឹកយកទៅព្យាបាលនៅមន្ទីរពេទ្យបង្អែកជ័យជំនះ។ រីឯមធ្យោបាយទាំង២ ត្រូវបានសមត្ថកិច្ចយកមកកាន់អធិការដ្ឋានក្រុងតាខ្មៅដើម្បីចាត់ចែងតាមនីតិវិធី៕