កណ្តាលៈ គ្រោះថ្នាក់ចរាចរណ៍មួយបានកើតឡើងរវាងរថយន្តនិងម៉ូតូ ព្រលះគ្នាបណ្តាលឲ្យយុវតីសិស្សសាលាម្នាក់រងរបួសធ្ងន់បញ្ជូនទៅមន្ទីរពេទ្យដើម្បីសង្គ្រោះភ្លាមៗ កាលពីវេលាម៉ោង៦និង២០នាទីព្រឹក ថ្ងៃទី១៥ ខែធ្នូ ឆ្នាំ២០១៦ នៅត្រង់ចំណុចផ្លូវជាតិលេខ៤ ចន្លោះគីឡូមែត្រលេខ២៥និង២៦ ភូមិស្រះសង្គម ឃុំពើក ស្រុកអង្គស្នួល ខេត្តកណ្ដាល។

សមត្ថកិច្ចបានឲ្យដឹងថា ករណីគ្រោះថ្នាក់ខាងលើនេះ បង្កដោយរថយន្ត១គ្រឿងម៉ាកសាំយុង ពណ៌លឿង ពាក់ផ្លាកលេខ ភ្នំពេញ2AI-2884 អ្នកបើកបរមិនស្គាល់ឈ្មោះបានរត់គេចខ្លួនបាត់ ដែលបើកបរក្នុងទិសដៅពីលិចទៅទិសខាងកើត(ព្រះសីហនុទៅភ្នំពេញ) លុះដល់ចំណុចខាងលើរថយន្តបានវ៉ាជែងជ្រុងទៅបុកម៉ូតូ១គ្រឿង ម៉ាកហុងដា សេ១២៥ ពណ៌ខ្មៅ ស្លាកលេខ ភ្នំពេញ1CX-3157 បើកបរដោយយុវត្តីម្នាក់ ឈ្មោះ ហួយ ហ្សាំង ភេទស្រី អាយុ១៧ឆ្នាំ នៅភូមិព្រៃពពេល ឃុំពើក ស្រុកអង្គស្នួល ខេត្តកណ្តាល មានមួក មានកញ្ចក់ មុខរបរសិស្ស ដែលបើកពីទិសខាងកើតទៅទិសខាងលិចក្នុងទិសដៅបញ្ច្រាសគ្នា បណ្តាលឲ្យរបួសធ្ងន់។ សមត្ថកិច្ចបានបន្តថា ករណីនេះបណ្ដាលមកពីអ្នកបើកបរថយន្តបើកក្នុងល្បឿនលឿនខ្វះការប្រុងប្រយ័ត្នប្រជែងក្នុងស្ថានភាពគ្រោះថ្នាក់នៅទីប្រជុំជន។

បច្ចុប្បន្ន កម្លាំងជំនាញបានធ្វើការវាស់វែង និងកសាងសំណុំរឿងចាត់ការទៅតាមនីតិវិធីច្បាប់៕