ភ្នំពេញៈ មន្រ្តីអាវុធហត្ថចូលនិវត្តន៍ និងជាតៃកុងរថយន្តហាងពេជ្រ ម៉ារីណា ម្នាក់ បានសម្រេចចិត្តចងកសម្លាប់ខ្លួនឯង បង្កឲ្យមានការភ្ញាក់ផ្អើលកាលពីវេលាម៉ោង១០និង៣០នាទីព្រឹកថ្ងៃទី១៧ ខែធ្នូ ឆ្នាំ២០១៦ ស្ថិតនៅក្រុមទី៦ ភូមិភ្នាត សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។
ប្រភពព័ត៌មាននៅក្បែរផ្ទះកើតហេតុបានឲ្យដឹងថា មុនពេលកើតហេតុនាម៉ោង៨ព្រឹក បុរសវ័យចំណាស់ខាងលើ បានជិះម៉ូតូម្នាក់ឯងមកចតនៅមុខផ្ទះ ហើយដើរចូលផ្ទះបិទទ្វារ សំងំតែម្នាក់ឯង ខណៈដែលអ្នកជិតខាងមានការសង្ស័យ ដោយរូបគាត់ទុកម៉ូតូចោលបែបនេះ ក៏បានទៅគោះទ្វារ និងស្រែកហៅថា ពូៗ ម៉េចក៏មិនយកម៉ូតូទុកក្នុងផ្ទះប្រយ័ត្នចោរលួចបាត់ ប៉ុន្តែគ្មានសំឡេងឆ្លើយតប ទើបបងប្អូនប្រជាពលរដ្ឋដែលរស់នៅជិតខាងនាំគ្នា អើតមើលតាមប្រហោងបង្អួច ក៏ស្រាប់តែប្រទះឃើញគាត់ចងកសម្លាប់ខ្លួនបាត់ទៅហើយ។ បន្ទាប់ពីឃើញហេតុការណ៍ ពួកគាត់ក៏បានរាយការណ៍ជូនសមត្ថកិច្ចប៉ុស្តិ៍ស្ទឹងមានជ័យ និងនគរបាលជំនាញឲ្យចុះមកពិនិត្យ។
ក្រោយកើតហេតុសមត្ថកិច្ចជំនាញបានចុះទៅពិនិត្យសាកសព ហើយបានសន្និដ្ឋានថា បុរសរូបនេះ ពិតជាចងកសម្លាប់ខ្លួនឯងប្រាកដមែន ពុំមានពាក់ព័ន្ធ និងអំពើឃាតកម្មនោះឡើយ។
សមត្ថកិច្ចបានឲ្យដឹងថា បុរសដែលធ្វើអត្តឃាតនេះ មានឈ្មោះ ប៉ែន សំអឿន អាយុ៥០ឆ្នាំ ស្នាក់នៅផ្ទះកើតហេតុ មុខរបរជាអ្នកបើកបររថយន្តហាងពេជ្រ ម៉ារីណា។
ប្រជាពលរដ្ឋនៅក្បែរកន្លែងកើតហេតុបានខ្សឹបប្រាប់ថា មូលហេតុដែលឈានដល់ការដាច់ចិត្តសម្លាប់ខ្លួនឯងបែបនេះ គឺមកពីបញ្ហាឈ្លោះទាស់ទែងជាមួយគ្រួសារ។
ក្រោយពិនិត្យចប់ សាកសព ត្រូវបានសមត្ថកិច្ចប្រគល់ជូនក្រុមគ្រួសារ ដើម្បីយកទៅធ្វើបុណ្យតាមប្រពៃណី៕
https://youtu.be/LfbcWbkwvAc
មតិយោបល់