ភ្នំពេញៈ គ្រោះថ្នាក់ចរាចរណ៍​រវាងរថយន្តមួយគ្រឿង បានបើកបុកម៉ូតូ មួយគ្រឿងម៉ាកហុងដា សេ១២៥ ពណ៌ខ្មៅ ពាក់ស្លាកលេខ កំពង់ធំ 1B -4025 ដែលជិះឌុបគ្នា បណ្តាលឲ្យ​រងរបួសធ្ងន់ទាំង២នាក់។

ហេតុការណ៍នេះ បានកើតឡើងកាលពីវេលាម៉ោង១១និង៤០នាទីយប់​ថ្ងៃទី១៧ ខែធ្នូ ឆ្នាំ២០១៦ ស្ថិតនៅតាមបណ្តោយផ្លូវសហព័ន្ធរុស្ស៊ីកែងផ្លូវលេខ២៥៩ សង្កាត់ទឹកល្អក់១ ខណ្ឌទួលគោក រាជធានីភ្នំពេញ។

បន្ទាប់ពីកើតហេតុភ្លាមៗ រថយន្តបង្កបានបន្ថែមល្បឿន​បើកគេចខ្លួនបាត់ស្រមោល តែសំណាងអាក្រក់រថយន្តនោះ ក៏បានធ្លាក់កាងដែលមានជាប់ស្លាក់លេខជាមួយ គឺមានលេខ ភ្នំពេញ 2AE-4470។

ក្រោយកើតហេតុ ជនរងគ្រោះទាំងពីរនាក់ ត្រូវបានរថយន្តសាមុយដឹងយកទៅសង្គ្រោះភ្លាមៗ។ចំណែកម៉ូតូរបស់ជនរងគ្រោះ ត្រូវសមត្ថកិច្ចចរាចរណ៍ខណ្ឌទួលគោក វាស់វែងយកទៅរក្សាទុក និងស្រាវជ្រាវ រករថយន្ត បង្កដើម្បីឲ្យ​ចូលខ្លួនមកដោះស្រាយគ្នាជាមួយជនរងគ្រោះទៅតាមផ្លូវច្បាប់៕